25/05/2026
ਜਦੋਂ ਜਲੰਧਰ ਨੇੜਲੇ ਇੱਕ ਪੰਜਾਬੀ ਪਿੰਡ ਦਾ ਮੁੰਡਾ ਦੌੜਨਾ ਸ਼ੁਰੂ ਹੋਇਆ ਸੀ, ਸ਼ਾਇਦ ਕਿਸੇ ਨੇ ਨਹੀਂ ਸੋਚਿਆ ਹੋਣਾ ਕਿ ਇੱਕ ਦਿਨ ਉਹ ਪੂਰੇ ਭਾਰਤ ਦਾ ਸਭ ਤੋਂ ਤੇਜ਼ ਦੌੜਾਕ ਬਣ ਜਾਵੇਗਾ। ਪਰ ਗੁਰਿੰਦਰਵੀਰ ਸਿੰਘ ਨੇ ਇਹ ਕਰ ਦਿਖਾਇਆ।
ਮਈ 2026 ਵਿੱਚ ਰਾਂਚੀ ਦੇ ਬਿਰਸਾ ਮੁੰਡਾ ਸਟੇਡੀਅਮ ਵਿੱਚ ਹੋਏ ਫੈਡਰੇਸ਼ਨ ਕੱਪ ਦੌਰਾਨ ਗੁਰਿੰਦਰਵੀਰ ਨੇ 100 ਮੀਟਰ ਦੀ ਦੌੜ ਸਿਰਫ਼ 10.09 ਸਕਿੰਟ ਵਿੱਚ ਪੂਰੀ ਕਰਕੇ ਭਾਰਤੀ ਐਥਲੈਟਿਕਸ ਦਾ ਇਤਿਹਾਸ ਬਦਲ ਦਿੱਤਾ। ਉਹ ਪਹਿਲੇ ਭਾਰਤੀ ਬਣੇ ਜਿਨ੍ਹਾਂ ਨੇ 100 ਮੀਟਰ ਦੌੜ 10.10 ਸਕਿੰਟ ਤੋਂ ਘੱਟ ਸਮੇਂ ਵਿੱਚ ਪੂਰੀ ਕੀਤੀ।
ਪਰ ਇਹ ਸਫ਼ਰ ਇੰਨਾ ਆਸਾਨ ਨਹੀਂ ਸੀ।
2025 ਵਿੱਚ ਗੁਰਿੰਦਰਵੀਰ ਨੇ 10.20 ਸਕਿੰਟ ਦਾ ਰਾਸ਼ਟਰੀ ਰਿਕਾਰਡ ਬਣਾਇਆ ਸੀ, ਪਰ ਕਈ ਲੋਕਾਂ ਨੇ ਕਿਹਾ ਕਿ ਸ਼ਾਇਦ ਇਹ ਇੱਕ ਵਾਰ ਦੀ ਕਾਮਯਾਬੀ ਹੈ। ਇੱਕ ਸਾਲ ਤੱਕ ਉਹ ਇਸ ਸਮੇਂ ਨੂੰ ਹੋਰ ਬਿਹਤਰ ਨਹੀਂ ਕਰ ਸਕੇ ਅਤੇ ਸਵਾਲ ਉੱਠਣ ਲੱਗੇ। ਪਰ ਪੰਜਾਬ ਦੇ ਇਸ ਗੱਭਰੂ ਨੇ ਹਾਰ ਨਹੀਂ ਮੰਨੀ। ਮਿਹਨਤ ਜਾਰੀ ਰੱਖੀ, ਆਪਣੇ ਆਪ ‘ਤੇ ਭਰੋਸਾ ਰੱਖਿਆ ਅਤੇ ਫਿਰ ਦੁਨੀਆ ਨੂੰ ਜਵਾਬ ਟਰੈਕ ‘ਤੇ ਦਿੱਤਾ।
ਰਾਂਚੀ ਵਿੱਚ ਰਿਕਾਰਡ ਟੁੱਟਣ ਤੋਂ ਬਾਅਦ ਉਨ੍ਹਾਂ ਦੀ ਪਹਿਲੀ ਫੋਨ ਕਾਲ ਕਿਸੇ ਅਫ਼ਸਰ ਜਾਂ ਮੀਡੀਆ ਨੂੰ ਨਹੀਂ ਸੀ। ਉਨ੍ਹਾਂ ਨੇ ਆਪਣੀ ਮਾਂ ਨੂੰ ਫੋਨ ਕਰਕੇ ਪੁੱਛਿਆ, “ਮੰਮੀ, ਤੁਸੀਂ ਦੌੜ ਵੇਖੀ?” ਇਹ ਇੱਕ ਚੈਂਪੀਅਨ ਦੀ ਨਹੀਂ, ਇੱਕ ਸਧਾਰਨ ਪੰਜਾਬੀ ਪੁੱਤ ਦੀ ਕਹਾਣੀ ਹੈ ਜੋ ਆਪਣੀ ਕਾਮਯਾਬੀ ਸਭ ਤੋਂ ਪਹਿਲਾਂ ਆਪਣੀ ਮਾਂ ਨਾਲ ਸਾਂਝੀ ਕਰਨਾ ਚਾਹੁੰਦਾ ਸੀ।
ਗੁਰਿੰਦਰਵੀਰ ਸਿਰਫ਼ ਖਿਡਾਰੀ ਹੀ ਨਹੀਂ, ਭਾਰਤੀ ਨੇਵੀ ਵਿੱਚ ਪੈਟੀ ਅਫ਼ਸਰ ਵੀ ਹਨ। ਦੇਸ਼ ਦੀ ਸੇਵਾ ਵੀ ਕਰਦੇ ਹਨ ਅਤੇ ਦੇਸ਼ ਦਾ ਨਾਮ ਵੀ ਰੌਸ਼ਨ ਕਰ ਰਹੇ ਹਨ।
ਅੱਜ ਸਚਿਨ ਤੇਂਦੁਲਕਰ ਵਰਗੀਆਂ ਮਹਾਨ ਹਸਤੀਆਂ ਉਨ੍ਹਾਂ ਦੀ ਤਾਰੀਫ਼ ਕਰ ਰਹੀਆਂ ਹਨ, ਜਦਕਿ ਕਈ ਲੋਕ ਉਨ੍ਹਾਂ ਨੂੰ ਨਵੇਂ ਯੁੱਗ ਦਾ “ਫਲਾਇੰਗ ਸਿੱਖ” ਕਹਿ ਰਹੇ ਹਨ।
ਗੁਰਿੰਦਰਵੀਰ ਸਿੰਘ ਦੀ ਕਹਾਣੀ ਹਰ ਪੰਜਾਬੀ ਨੌਜਵਾਨ ਨੂੰ ਇਹ ਸੰਦੇਸ਼ ਦਿੰਦੀ ਹੈ ਕਿ ਜੇ ਸੁਪਨੇ ਵੱਡੇ ਹੋਣ, ਮਿਹਨਤ ਸੱਚੀ ਹੋਵੇ ਅਤੇ ਹੌਸਲਾ ਕਦੇ ਨਾ ਟੁੱਟੇ, ਤਾਂ ਪਿੰਡ ਦੀਆਂ ਗਲੀਆਂ ਤੋਂ ਨਿਕਲ ਕੇ ਵੀ ਦੁਨੀਆ ਦੇ ਸਭ ਤੋਂ ਤੇਜ਼ ਦੌੜਾਕਾਂ ਦੀ ਕਤਾਰ ਵਿੱਚ ਖੜ੍ਹਿਆ ਜਾ ਸਕਦਾ ਹੈ।
ਅੱਜ ਜਦੋਂ ਗੁਰਿੰਦਰਵੀਰ ਦੌੜਦਾ ਹੈ, ਤਾਂ ਸਿਰਫ਼ ਇੱਕ ਖਿਡਾਰੀ ਨਹੀਂ ਦੌੜਦਾ...
ਨਾਲ ਦੌੜਦਾ ਹੈ ਪੰਜਾਬ ਦਾ ਮਾਣ, ਭਾਰਤ ਦਾ ਸੁਪਨਾ ਅਤੇ ਕਰੋੜਾਂ ਨੌਜਵਾਨਾਂ ਦਾ ਵਿਸ਼ਵਾਸ।
