22/08/2026
جہاں بھی ہو وہیں سے دو صدا سرکار سنتے ہیں
سرِ آئینہ سنتے ہیں پسِ دیوار سنتے ہیں
میرا ہر سانس ان کی آہٹوں کے ساتھ چلتا ہے
میرے دل کے دھڑکنے کی وہ رفتار سنتے ہیں
گنہگارو درودِ والہانہ بھیج کر دیکھو
وہ اپنے اُمتی کا نغمۂ کردار سنتے ہیں
کھڑے رہتے ہے اہلِ تخت بھی دہلیز پہ انکی
فقیروں کی صدائیں بھی شہہِ ابرار سنتے ہیں
میں صدقے جاؤں ان کی رحمت اللعالمینی کے
پکارو چاہے کتنی بار وہ ہر بار سنتے ہیں
وہ یوں ملتے ہے جیسے زندگی میں کوئی ملتا ہے
وہ سنتے ہیں ہر اک کی اور سارے دربار سنتے ہیں
مظفر جب کسی محفل میں ان کی نعت پڑھتے ہیں
میرا ایمان ہے وہ بھی میرے اشعار سنتے ہیں
======================
وہ جان خبر ہیں اور ہر خبر ہے ان سے وابستہ
ارے او بے خبر انہیں بے خبر مانا تو کیا مانا
شفیع و حاکم و مختار مان ان کو دنیا میں
قیامت میں یہ سب کچھ دیکھ کر مانا تو کیا مانا
آج لے ان کی پناہ اور آج مدد مانگ ان سے
پھر نہ مانیں گے قیامت میں اگر مان گیا
انہیں مانا انہیں جانا نہ رکھا غیر سے کام
للہ الحمد میں دنیا سے مسلمان گیا
(صل اللہ تعالٰی علیہ والہ وسلم )
======================
*جو گذری ہے وہ کس کس کو بتائیں یارسول اللہ*
*کسے حالِ دلِ مضطر سنائیں یارسول اللہ*
*پڑے ہوں رکھ کے زنجیرِ غلامی آپ ﷺ کے در پر*
*سجائی ہیں لبوں پر التجائیں یارسول اللہ**
*نہیں پانی کا قطرہ آبخوروں میں کوئی باقی*
*کرم کی بھیج دیں کالی گھٹائیں یارسول اللہ*
*کھڑی رہتی ہیں اپنے گھر کے دروازے میں پہروں تک*
*کدھر جائیں، جواں بیٹوں کی مائیں، یارسول اللہ*
*رعونت کے جَھروکے میں کھڑی ہیں تان کر سینہ*
*ابھی تک اَن گنت جُھوٹی انائیں یارسول اللہ*
*نکل کر قبرِ انور سے دلاسہ دیں غلاموں کو*
*سجی ہیں ہر قدم پر کربلائیں یارسول اللہ*
یہ حسرت ہے کہ تصویرِ ادب بن کر مواجھے میں
چراغِ دیدۂ پُرنم جلائیں یارسول اللہ
تصور میں جوارِ گنبدِ خضرا میں سب بچے
گھروندے آرزوؤں کے بنائیں یارسول اللہ
شبِ میلاد بچے شوق سے گھر کے منڈیروں پر
ادب سے جل رہی آنکھیں بچھائیں یارسول اللہ
کنیزیں اپنے اشکوں کی زباں میں عرض کرتی ہیں
ہمیں بھی اپنی چوکھٹ پر بلائیں یارسول اللہ
دہائی دے رہی ہیں آپ کے اسمِ گرامی کی
کئی صدیوں سے زخمی فاختائیں یارسول اللہ
غلاموں کے مقدر میں سکونِ دل کی دولت دیں
صفِ ماتم اندھیرے بھی بچھائیں یارسول اللہ
ادب کی اوڑھنی لے کر درِ اقدس پہ آ جائیں
کہاں جنگل میں بھٹکیں گی صدائیں یارسول اللہ
بدن پر اَن گنت زخموں کے اب تک ہیں نشاں باقی
انہیں دامانِ رحمت میں چھپائیں یارسول اللہ
سوئے افلاک اڑنے سے ذرا پہلے مواجھے میں
درودِ پاک پڑھتی ہیں دعائیں یارسولب اللہ
مرے آنسو بھی لے جائیں، مری آنکھیں بھی لے جائیں
مدینے کی طرف جاتی ہوائیں یارسول اللہ
مدینے میں کھڑا ہے ایک مجرم ہتھکڑی پہنے
اسے بھی عمر بھر کی ہوں سزائیں یارسول اللہ
اتاریں پیرہن جرمِ ضعیفی کا غلام آخر
تماشا کیا زمانے کو دکھائیں، یارسول اللہ
صدی کی آخری تقریبِ میلادِ مقدّس میں
ملیں مدحت نگاروں کو ردائیں یارسول اللہ
ریاضِؔ بے نوا کی التجا ہے اپنے بردے کو
بڑی شفقت سے سینے سے لگائیں یارسول اللہ
=====================
ہم سوئے حشر چلیں گے شہِ ابرار کے ساتھ
قافلہ ہوگا رواں قافلہ سالار کے ساتھ
رہ گئے منزل سدرہ پہ پہنچ کر جبریل
چل نہیں سکتا فرشتہ تری رفتار کے ساتھ
یہ تو طیبہ کی محبت کا اثر ہے ورنہ
کون روتا ہے لپٹ کر در و دیوار کے ساتھ
اے خدا دی ہے اگر نعتِ نبی کی توفیق
حُسنِ کردار بھی دے لذت گفتار کے ساتھ
پُل سے مجھ سا بھی گنہگار گزر جائے گا
ہوگی سرکار کی رحمت جو گنہگار کے ساتھ
رات دن بھیج سلام انُ پہ ملائک کی طرح
پڑھ درود انُ پہ غلامانِ وفادار کے ساتھ
دیکھ اے معترض نعتِ رسول عربی!
قُرب حساں کو ملا تھا انہی اشعار کے ساتھ
سب عطائیں ہیں خدا کی میرے مولا کے طفیل
ورنہ یہ لطف و کرم مجھ سے گنہگار کے ساتھ
ہم بھی مظہر سے سنیں گے کوئی نعت رنگیں
گر ملاقات ہوئی شاعرِ دربار کے ساتھ
===================
غلام ہیں غلام ہیں رسول کے غلام ہیں
غلامی رسول میں موت بھی قبول ہے.🌹
پڑھیں درود آپ ﷺ پر ملی زباں اِسی لئے
فدا ہوں انﷺ کے دین پر ہے تن میں جان اِسی لئے
جو اُن کے واسطے نہیں وہ زندگی فضول ہے
غلامی رسول میں موت بھی قبول ہے..
غلام ہیں غلام ہیں رسول کے غلام ہیں
غلامی رسول میں موت بھی قبول ہے.🌹
ڈھلا ہے اُسﷺ کے رنگ میں قریب اُسﷺ کے جو گیا
مِلا ہے ایک بار اُسے غلام اُسﷺکا ہو گیا
وہ ایسا خوش بیان ہے وہ ایسا خوش اصول ہے
غلامی رسول میں موت بھی قبول ہے..
غلام ہیں غلام ہیں رسول کے غلام ہیں
غلامی رسول میں موت بھی قبول ہے.🌹
چل اُس کے شہر کی طرف یہ دل اگر اداس ہے
بہشت ان کے روضے ہی کی جالیوں کے پاس ہے
خدا کی خاص نعمتوں کا اس جگہ نزول ہے
غلامی رسول میں موت بھی قبول ہے
غلام ہیں غلام ہیں رسول کے غلام ہیں
غلام ہیں غلام ہیں رسول کے غلام ہیں
غلامی رسول میں موت بھی قبول ہے
جو ہو نہ عشق مصطفٰیﷺ تو زندگی فضول ہے...
🌹صَلَّی اللّهُ عَلٰی حَبِیْبِهٖ ســیّدنا مُحَمَّــدٍ وَّآلِـهٖ وصحبهٖ وبارك وسلم..💚
