03/11/2025
کبھی میرے موبائل میں ایک نمبر ہوا کرتا تھا... جو میرے لیے زندگی کی مانند تھا۔ اُس کی طرف سے لکھا ہر لفظ ہر بات میرے وجود میں نئی روح پھونکتا تھا۔
ہمارے دن رات کچھ یوں گزرتے جیسے کوئی معصوم بچپن کا خواب۔ وہ خود سے زیادہ میرا خیال رکھتی تھی... جیسے ماں اپنے بچے کی پرواہ کرتی ہے۔
پھر وقت نے کروٹ لی، ہمارے درمیان ایسا فاصلہ ڈال دیا کہ سوچ کر دل کانپ اٹھتا ہے۔ شروع سے جینا سیکھنا پڑا ... جیسے سب کچھ صفر ہو گیا ہو۔ وقت نے ہمارے درمیان سرحدیں کھینچ دیں۔
اگرچہ وہ نمبر اب محفوظ نہیں، لیکن مجھے آج بھی زبانی یاد ہے۔
آج بھی میں اُس کی تصویر ویڈیوز یا آوازیں دیکھتا ہوں... جن سے خوشبو سی آتی ہے، لیکن یہ خوشبو اب تکلیف دیتی ہے۔ اُس کا خیال میرے جسم میں خون کی مانند دوڑتا ہے۔
مجھے معلوم ہے صدائیں کچھ نہیں بدل سکتیں، اسی لیے بہت یاد کیا... مگر کبھی پکارا نہیں۔
میں تمہاری مسکراہٹ، انداز اور وہ آنکھیں نہیں بھول سکتا۔ میں تمہیں ایسے یاد کرتا ہوں، جیسے یتیم اپنی غربت کو یاد رکھتا ... ہے۔ جیسے روزہ دار کو افطاری یاد رہتی ہے۔
تمہارے ہم ناموں سے آج بھی دل کانپتا ہے... درد ہوتا ہے، لیکن وہ درد اچھا لگتا ہے۔
واقعی تم نے سچ کہا تھا، میں تمہیں بھلا نہیں سکوں گا کیونکہ تم واقعی انمول ہو۔
جب بھی کوئی کال یا میسج کی آواز آتی ہے، تم یاد آتے ہو۔
تم مجھ میں ایسے گم ہو جیسے خوشبو پھول میں... نظر تو نہیں آتی لیکن ہر لمحہ محسوس ہوتی ہو۔
۔۔۔
آسان نہیں آباد کرنا گھر محبت کا
یہ اُن کا کام ہے جو زندگی برباد کرتے ہیں۔
