Ghame-E-Ashiqui

26/09/2026

25/09/2026

تازہ غزل
کبھی کبھی مجھے اِتنا دکھائی دیتا ہے
ہر اِک طرف ترا چہرہ دکھائی دیتا ہے

میں اُس سے دُور بھی بھاگوں تو کتنی دوُر بھلا ؟
وہ جتنا دُور ہو اُتنا دکھائی دیتا ہے

بھلے ہو لاکھ بُرا کوئی اِس زمانے میں
نظر ہو اچھی تو اچھا دکھائی دیتا ہے

تمہیں میں پیار بھی تو میری جان کرتا ہوں
تمہیں تو بس مرا غصّہ دکھائی دیتا ہے

وہ چُبھتا کانٹوں کی طرح ہے میری آنکھوں میں
تمہارے ساتھ جو لڑکا دکھائی دیتا ہے

تمہارے سینے پہ سر رکھ کے سو رہا تھا میں
مجھے بھی خواب میں کیا کیا دکھائی دیتا ہے

تو خود کو ایک نظر دیکھ اور مجھکو بھی
جو جیسا ہوتا ہے ویسا دکھائی دیتا ہے

یہ مُمکنات میں شامل ہے دل کا کالا ہو
تمہیں جو شکل سے گورا دکھائی دیتا ہے

کہاں کہاں سے بچوں میں کہاں کہاں سے رُکوں
ہر ایک سمت پہ پہرہ دکھائی دیتا ہے

میں اپنے آپ سے حسام ڈرنے لگتا ہوں
وہ ہاتھ چھوڑ کے جاتا دکھائی دیتا ہے
حمزہ حسام