04/04/2025
تازہ کلام
کر دیا تیرے جنوں نے مجھے جانی، برباد
تو سمجھتا ہے ناں؟ برباد معانی برباد
خود سے وحشت ہے کہ جب تو ہی نہیں، میں کیوں ہوں؟
کرنی ہو گی یہ مجھے تیری نشانی برباد
مدتوں سے یہاں آباد ہے اک شخص جسے
کر گئی تھی کبھی اک نقل مکانی برباد
اندھی آنکھوں پہ ہوئے دیپ، الاؤ ضایع
بہرے کانوں پہ ہوئی شعلہ بیانی برباد
اس کی تصویر ابھی تک ہے مرا ٹھوس جواز
میں نے ایسے ہی نہیں کی تھی جوانی برباد
کتنا سمجھایا بجھایا تھا تجھے میں نے عدیل
دل کے صحرا پہ نہ کر آنکھ کا پانی برباد
------ شاہد عدیل
