13/09/2026
CASAMA MOBILE SERVICE PROGRAM, GINAPALAPIT ANG SERBISYO SANG GOBYERNO SA MGA KASIMANWA
Padayon ang pagdala sang serbisyo sang nagkalain-lain nga ahensya sang gobyerno sa mas malapit nga lugar para sa mga pumuluyo sang 2nd District.
Pinaagi sa CASAMA Mobile Service Program, ginapangitaan sang paagi ni 2nd District Representative Alfredo “Thirdy” Marañon III nga indi na kinahanglan magbiyahe pa sing layo ang mga pumuluyo para lamang makakuha sang pila ka serbisyo sang gobyerno.
Sugod Hunyo 2026, naglibot na ang programa sa nagkalain-lain nga barangay sa Cadiz City, Sagay City kag Manapla.
Sini nga bulan, ginahatagan sang pagtalupangod ang mga pumuluyo sang Manapla kag Sagay, ilabi na ang mga mangigisda nga mas ginauna ang ila pangabuhian kag kabudlayan sa pagkadto sa mga opisina sang gobyerno.
Kaupod sa programa ang SSS, PAG-IBIG, NBI, PhilHealth kag PSA.
Makabulig man ini sa mga wala pa sang National ID kag sa mga kinahanglan sang authenticated copy sang birth certificate, marriage contract, CENOMAR kag death certificate.
Para kay Marañon, ang importante amo nga ang serbisyo sang gobyerno mismo ang makalapit sa mga tawo, ilabi na sa mga pumuluyo nga kulang sa tion bangud sa ila adlaw-adlaw nga pangabuhian.
