01/05/2026
Nakikiisa ang UP Fair Quests sa palabang uring manggagawa at anakpawis sa paggunita ng Mayo Uno, ang Pambansang Araw ng Manggagawa! Kaisa ang Quests sa malawak na hanay ng manggagawang kababaihan at sangkabaklaan na patuloy na lumalaban para sa marangal, nakabubuhay, at ligtas na kabuhayan.
Sa kasalukuyan, patuloy na nakararanas ng samu’t-saring uri ng kaapihan ang mga manggagawang kababaihan at LGBTQ+. Laganap ang iba’t ibang anyo ng diskriminasyon, mula sa pang-aapi at karahasan, hanggang sa hindi patas at mapanlinlang na sistema ng promosyon at benepisyo. Maraming manggagawang kababaihan at LGBTQ+ ang napipilitang magtrabaho sa ilalim ng mga mapanganib at mapanghamak na kundisyon. Higit sa lahat, patuloy na nakakatanggap ang mga manggagawang babae at LGBTQ+ ng sahod na hindi nakabubuhay at hindi patas batay sa trabahong kanilang ginampanan.
Ang mga kundisyong ito ay pinalala pa ng mas malawak at patuloy na krisis sa ekonomiya at pulitika sa bansa—bunga ng tumataas na presyo ng langis at pangunahing bilihin, at ng laganap na korapsyon sa pamahalaan na pinangungunahan ng kasalukuyang administrasyong Marcos Jr.-Duterte. Nananatiling mataas ang presyo ng langis dahil sa imperyalistang agresyon ng US at Israel laban sa Iran na pinalala ang epekto ng Oil Deregulation Law, habang nananatiling mataas ang presyo ng mga bilihin dahil sa patuloy na pagpataw ng VAT at excise tax na katibayan ng kakulangan ng pagkilos ng kasalukuyang administrasyon. Patuloy na nananatiling kakarampot ang minimum wage, kung kaya’t mas lalong nahihirapan ang mga Pilipinong masang-api na makamit ang kanilang mga pang araw-araw na pangangailangan. Habang ito ay nagaganap, sadyang binabalewala at pinipiling huwag pakinggan ng kasalukuyang administrasyon ang mga panawagan ng masang-api, na lalo lamang naaagit.
Kaya naman, makatarungan lamang na ang uring manggagawa, kabilang na ang mga manggagawang kababaihan at LGBTQ+, ay magkaisa, mag-organisa at kumilos upang mangahas na labanan ang iba't ibang anyo ng pang-aapi at kawalang-katarungang kinakaharap nila sa kanilang trabaho at sa mas malawak na lipunan. Kinakailangang ipagpatuloy ng uring manggagawa ang kanilang militanteng pagkilos, dahil sa patuloy na pagsupil ng estado at ng mga dambuhalang kapitalistang korporasyon sa karapatan ng mga manggagawa. Kailangang patuloy na lumaban, sa kabila ng iba't ibang anyo ng panliligalig, pang-aabuso at karahasan na ginagamit ng mga pwersa ng estado para takutin at patahimikin ang mga aktibista at lider-manggagawa.
Ang welga na inorganisa ng mga manggagawa ng Kowloon House kamakailan lamang ay matagumpay na ehemplo ng epektibong kapangyarihan ng mga manggagawa na magkaisang-hanay upang idemanda ang mas mabuting kundisyon at seguridad sa trabaho kasabay ng makatarungang sahod na patas at nakabubuhay. Sa kabilang banda, ang mga kamakailang transport strike na isinagawa ng mga tsuper at manggagawa ay nagpapakita ng patuloy na kahalagahan na ipagpatuloy ang pagdemanda ng sapat na aksyon na pababain ang presyo, itaas ang sahod at bigyang-reporma ang kundisyon ng manggagawa mula sa gobyerno, na nakatengga lamang habang milyun-milyong Pilipino ang nagugutom at naghihirap.
Kung kaya, malinaw lang na mahalagang ipagpatuloy ng manggagawa at mamamayan, ng kababaihan at sangkabaklaan, ang pagsasabuhay ng militanteng diwa at kumilos laban sa kahirapan at korapsyon ng rehimeng Marcos Jr.-Duterte, at sa banta ng lalong paghihirap dulot ng agresyon ng imperyalistang US. Kinakailangan na ipagpatuloy na palakasin ang panawagan para sa nakabubuhay, patas, at makatarungang kabuhayan.
Mabuhay ang Uring Manggagawa at Mamamayang Pilipino! Ipagpatuloy ang militante at kolektibong pakikibaka at pagkilos para sa kabuhayan at karapatan!
Kasama ang Gabriela Youth UP Diliman at Bahaghari UP Diliman.
Kababaihan at Sangkabaklaan, Magkaisa, Mangahas na Makibaka Kontra Karahasan at Katiwalian Para sa Hustisya!
Free Marielle Domequil! Free Fatima Banjawan! Free Alex Pacalda! Free Verdy Pongasi! Palayain ang mga Bilanggong Politikal! Panagutin ang Korap at Pasistang Rehimeng Marcos-Duterte!
