29/07/2026
ITIGIL ANG SIKOLOHIKAL NA PANONORTYUR SA 9 NA NATITIRANG NAKADETINE MULA SA SONA51!
Mariing kinokondena ng Sining na Naglilingkod sa Bayan (SINAGBAYAN) ang patuloy na sikolohikal na panonortyur at pananakot na nararanasan ng siyam na nananatiling nakadetine matapos ang marahas na pag-aresto sa mga lumahok sa mapayapang pagkilos sa SONA ng Bayan noong Hulyo 27.
Ayon sa KARAPATAN, isinailalim ang mga kasalukuyang nakadetine sa interogasyon nang wala ang kanilang mga abogado. Pinilit silang magbigay ng personal na impormasyon, tukuyin ang iba pang mga lumahok sa protesta, at umamin sa mga alegasyong wala namang sapat na batayan. Naiulat din na may mga hindi kilalang indibidwal na nagpakilalang mga kinatawan ng National Union of Peoples’ Lawyers (NUPL) at Commission on Human Rights (CHR), ngunit tumanggi silang magpakita ng kanilang pagkakakilanlan nang hilingin ng mga nakadetine na beripikahin ang kanilang mga identidad.
Anumang uri ng pananakot, pamimilit, panlilinlang, at matagal o mapang-abusong interogasyon laban sa mga detenido ay hindi kailanman katanggap-tanggap. Ang mga gawaing ito ay tahasang lumalabag sa kanilang mga karapatan at dignidad habang sila ay nasa kustodiya ng estado.
May pananagutan ang mga awtoridad na tiyakin ang kaligtasan, seguridad, at paggalang sa mga karapatan ng lahat ng taong nasa kanilang kustodiya. Dapat ding igalang ang karapatan ng mga detenido na magkaroon ng agarang akses sa kanilang mga abogado, mga pamilya, at tiyaking hindi sila sasailalim sa anumang anyo ng pananakot o pamimilit.
Ang patuloy na pananakot at sikolohikal na panonortyur sa mga nakadetine ay ipinapakita nito kung hanggang saan handang gamitin ng pasistang makinarya ng estado sa ilalim ng administrasyon ni Marcos Jr. ang pananakot at panunupil upang patahimikin ang mga mamamayang lumalaban at nananawagan ng pananagutan sa krisis ng ating lipunan na kinahaharap. Sa halip na tugunan ang mga lehitimong hinaing ng taumbayan, pinipili nitong gipitin at sindakin ang mga mamamayang nakikibaka laban sa katiwalian, malaganap na korapsyon, at ang lalong paglugmok ng taumbayan sa krisis na ating pinapasan.
Kaya’t naninindigan ang Sining na Naglilingkod sa Bayan (SINAGBAYAN) laban sa anumang anyo ng panunupil sa karapatan ng mamamayan na malayang magpahayag at mapayapang magtipon. Nananawagan kami na itigil ang lahat ng anyo ng sikolohikal na panonortyur at iba pang mapang-abusong gawain laban sa mga nakadetine, igalang ang kanilang mga karapatan, panagutin ang mga may sala sa mga paglabag na ito, at kagyat na palayain ang 9 na natitira pang nakadetine mula sa SONA51.
ITIGIL ANG PAGSUPIL SA MGA MAMAMAYANG LUMALABAN!
PALAYAIN ANG SONA9!
PALAYAIN ANG LAHAT NG DETINIDONG PULITIKAL!
