19/05/2026
“RISA, BAM, RAFFY AT ERWIN, TINANGGALAN NG COMMITTEE CHAIRMANSHIPS MATAPOS ANG SENATE LEADERSHIP SHAKEUP”
Tinanggalan ng committee chairmanships sina Senadora Risa Hontiveros, Senador Bam Aquino, at magkapatid na Senador Raffy at Erwin Tulfo isang linggo matapos ang leadership change sa Senado kung saan naluklok si Senate President Alan Peter Cayetano kapalit ni dating Senate President Vicente “Tito” Sotto III.
Ayon sa ulat, kabilang ang apat na senador sa bagong minority bloc na bumoto laban kay Cayetano noong Senate presidency race nitong nakaraang linggo.
Si Hontiveros ay tinanggal bilang chairperson ng Senate Committee on Health at pinalitan ni Senador Christopher “Bong” Go.
Samantala, si Bam Aquino naman ay pinalitan ni Senadora Loren Legarda bilang chairperson ng Senate Committee on Basic Education.
Si Senador Raffy Tulfo naman ay tinanggal bilang chairman ng Senate Committee on Public Services na ngayon ay pamumunuan na ni Senador Rodante Marcoleta, habang si Senador Erwin Tulfo ay nawalan ng pamumuno sa Committee on Games and Amusement na napunta kay Senador Jinggoy Estrada.
Nauna nang napaulat na siyam na senador ang bumoto para kay Sotto habang 13 naman ang sumuporta kay Cayetano. Nag-abstain naman sina Senador Migz Zubiri at JV Ejercito.
Kasunod ito ng patuloy na realignment at reorganisasyon sa Senado sa gitna ng umiinit na political tensions kaugnay ng impeachment proceedings laban kay Vice President Sara Duterte at ng kontrobersiyal na kaguluhan sa Senado noong Mayo 13.
Sa kabila nito, nanatili si Senadora Loren Legarda bilang chairperson ng Committee on Culture and Arts bukod pa sa paghawak niya ngayon sa Basic Education panel.
Patuloy rin sa kanilang mga komite sina Senadora Pia Cayetano at Senador Robin Padilla, habang si Acting Majority Leader Joel Villanueva ay muling namuno sa Committee on Higher, Technical and Vocational Education.
Samantala, sinabi rin ni Senate President Cayetano na pinag-iisipan pa kung sino ang papalit kay Senador Panfilo Lacson bilang chairman ng makapangyarihang Blue Ribbon Committee na kasalukuyang nagsisiyasat sa kontrobersyal na flood control projects.
“We’re considering Sen. Marcoleta but we’re also considering someone else… we’re considering Senator Pia.”
Nauna nang sinabi ni Cayetano na mula pa lamang sa simula ay malinaw umano na walang senador ang maaaring mag-demand ng committee assignments.
Dumating ang mga pagbabagong ito habang patuloy ang bangayan at pagkakahati ng majority at minority blocs sa Senado kasunod ng pagbabago ng liderato sa mataas na kapulungan.
゚viralシ ゚
