18/05/2026
|| MAYO 19, 2026 – Martes
IKAPITO NGA SEMANA SA PAGKABANHAW
Dili nato mailarawan sa hingpit ang kinabuhing dayon tungod kay wala kini mahisakop sa atong tawhanong kasinatian. Samtang nabuhi kita dinhi sa kalibutan, limitado ra ang atong pagsabot ug kasinatian.
Giingnan kita ni Jesus nga ang kinabuhing walay katapusan mao “ang pag-ila sa Ginoo ug sa Usa nga iyang gipadala.” Kini nga pag-ila dili lang kay kahibalo sa mga pagtulon-an, kundili usa ka buhi ug mauswagong pakigsuod sa Ginoo. Pananglitan, dili igo nga makabalo lang ta bahin Kaniya; mas importante nga atong masinati Siya diha sa pag-ampo, sa paghigugma, ug sa pagtabang sa uban.
Ang kinabuhing dayon dili usa ka kahimtang nga moabot dayon ug mohunong na; dili kini sama sa usa ka destinasyon nga atong maabot unya mahuman na ang tanan. Hinunoa, kini usa ka walay katapusang panaw diin magkaanam ug kalawom ang atong pakigsuod Kaniya.
Sama kini sa gugma nga samtang magdugay, mas motubo ug mas molalom. Sa matag higayon nga moduol kita sa Ginoo—sa pag-ampo, sa pagpasaylo, sa paghigugma sa uban—mas masabtan pa nato Siya, ug mas motubo ang atong relasyon Kaniya.
Sa pagkatinuod, kulang gayud ang mga pulong aron ihulagway kon unsa ang kinabuhing dayon. Apan bisan dili nato kini hingpit masabtan karon, makasalig kita nga kini matahum, puno sa gugma, ug labaw pa sa tanan nga atong mahunahuna—kay kini nagagikan sa Ginoo nga nahigugma kanato.
KINUTLO GIKAN SA MGA BUHAT SA MGA APOSTOLES (Acts 20:17-27)
Samtang didto si Pablo sa Mileto gipasugo-an niya ang mga pangulo sa simbahan sa Efeso aron paghangyo kanila sa pagpakigkita kaniya. Sa pag-abot nila, miingon siya, “Nasayod kamo gi-unsa ko paggamit ang tibuok kong panahon samtang ako uban pa kaninyo, sukad sa unang adlaw pag-abot ko sa lalawigan sa Asya. Uban sa dakung pagpaubos ug sa mga luha, nag-alagad ako ingon nga sulugoon sa Ginoo, bisan pa sa mga kalisdanan nga midangat kanako gumikan sa mga dautang laraw sa mga Judio. Nasayod kamo nga wala akoy gihikaw bisan unsa nga makatabang kaninyo samtang nagwali ug nagtudlo ako kaninyo sa atubangan sa katawhan ug diha sa inyong mga puloy-anan. Gi-awhag ko ang mga Judio ug ang dili mga Judio sa paghinulsol ug sa pagbalik ngadto sa Dios ug sa pagtuo sa atong Ginoong Jesus. Ug karon, minando-an sa Espiritu Santo, mo-adto ako sa Jerusalem ug wala ako masayod kun unsay mahitabo kanako didto.
Ang nahibalo-an ko lamang mao nga ako gipasidan-an sa Espiritu Santo nga sa matag siyudad naghulat kanako ang prisohan ug ang mga kasamok. Apan giisip ko ang akong kinabuhi nga walay bili basta lamang matapos ko ang buluhaton nga gihatag sa Ginoong Jesus kanako nga mao ang pagsangyaw sa Maayong Balita sa grasya sa Dios.
“Naduaw ko kamong tanan ug nawalihan mahitungod sa Gingharian sa Dios. Ug karon nasayod ako nga dili na kita magkakita pag-usab. Busa niining adlawa sultihan ko kamo sa walay lipod-lipod nga kon aduna man kaninyo’y dili maluwas, ayaw ako ninyo’g basola. Kay wala ako magpanuko sa pagpadayag kaninyo sa bug-os nga tuyo sa Dios.
SALMO RESPONSORYO Ps. 68: 10-11, 20-21
T. Awiti ang Dios, O mga gingharian sa yuta.
Daghang ulan imong gibubo, O Dios, sa Imong kabilin; Imong gi-ulian ang yuta sa iyang katambok. Ang panon sa Imong mga karnero Imong gipapuyo didto; sa Imong kaayo, O Dios, Imong gi-andam kini alang sa mga hangol.
T. Awiti ang Dios…
Dalaygon sa tanang adlaw ang Ginoo, nga nagpas-an sa atong karga; ang Dios nga atong kaluwasan. Ang Dios maoy Dios nga manluluwas kanato; Ang Ginoo, akong Ginoo, maoy magbuot sa kamatayon.
T. Awiti ang Dios…
+KINUTLO GIKAN SA BALAANG EBANGHELYO SUMALA NI SAN JUAN (Jn. 17: 1-11)
Human makasulti si Jesus niini, miyahat siya sa langit ug miingon, “Amahan, miabot na ang takna! Pasidunggi ang imong Anak aron ang Anak magpasidungog kanimo, kay gihatagan mo siya’g gahum pagmando sa tanang tawo aron hatagan niya’g kinabuhing dayon ang tanan nga imong gitugyan kaniya. Ug kini mao ang kinabuhing dayon: nga ang mga tawo mo-ila kanimo, ang bugtong matuod nga Dios ug kang JesuCristo nga imong gipadala. Gipasidunggan ko ikaw dinhi sa kalibutan ug gituman ko ang imong gipabuhat kanako. Karon, Amahan, pasidunggi ako diha sa imong pagpakig uban kanako, sa dungog nga akong gihuptan uban kanimo sa wala pa buhata ang kalibutan.”
“Gipadala ko ikaw sa mga tawo nga imong gikuha gikan sa kalibutan ug gihatag mo kanako. Imo sila ug gitugyan mo sila kanako. Gituman nila ang gisulti mo kanila, ug karon nahibalo sila nga ang tanan nga gihatag mo kanako naggikan kanimo. Gihatag ko kanila ang mensahe nga imong gitugyan kanako ug kini gidawat nila; nasayod sila nga tinuod nga ako gikan kanimo, ug nagtoo sila nga ikaw ang nagpadala kanako.”
“Nag-ampo ako alang kanila; wala ako mag-ampo alang sa kalibutan kondili alang sa mga tawo nga imong gitugyan kanako, kay imo man sila. Ang tanan nga ako-a, imo; ug ang tanan nga imo, ako-a; ug diha kanila gipasidunggan ako. Ug karon mo-anha ako kanimo; dili na ako magdugay dinhi sa kalibutan, apan magpabilin sila dinhi. Balaang Amahan, bantayi sila diha sa gahum sa imong ngalan - ang ngalan nga imong gihatag kanako, aron sila ma-usa ingon nga ikaw ug ako usa lamang!”
----------
----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠
