https://www.facebook.com/993650000505646/

Ang Mga Akda Ni Ligaya

Home
Philippines
Mangatarem
Ang Mga Akda Ni Ligaya

Wagas na damdaming isinusulat mula sa puso—repleksyon ng kaluluwa at karanasan.

29/05/2026

— 𝐀𝐤𝐚𝐥𝐚 𝐤𝐨 𝐛𝐚 𝐢𝐛𝐚 𝐤𝐚 𝐬𝐚𝐤𝐚𝐧𝐢𝐥𝐚? —
‎
‎Sinambit mo ang mga salitang minsan kong pinanghawakan noong mga gabing wasak na wasak ang aking pag-iisip. Akala ko, sa bawat katagang namumutawi sa iyong labi ay may katumbas na katotohanan. Ngunit bakit habang tumatagal, unti-unti mong kinakain ‎ang mga sarili mong sinambit?
‎
‎Hindi ko mawari kung bakit kailangan mo pang sambitin ang mga bagay na hindi mo naman kayang panindigan. Ginawa mo rin ang mga bagay na minsan mong ipinangakong iiwasan. Wala ka pa lang pinagkaiba sa mga taong pilit mong inilalayo sa akin.
‎
‎Akala ko’y ginagawa mo lamang iyon upang hindi tayo tuluyang masanay sa presensya ng isa’t isa. Akala ko’y pansamantala lamang ang iyong paglayo, upang pagtuunan natin ang mga bagay na mas mahalaga. Ngunit ngayo’y malinaw na sa akin— marahil hanggang simula lamang naging totoo ang lahat.

‎Nakita mismo ng aking mga mata
‎kung paano mo dahan-dahang nilamon ang bawat salitang minsang nagpagaan sa aking kalooban. At sa bawat pagbalewala mo sa mga pangakong ikaw rin ang bumuo, unti-unti ring namatay
‎ang paniniwalang iningatan ko para sa’yo.
‎
‎Napakadaya mo kung iisipin.
‎Sapagkat hindi mo lamang sinaktan ang puso kong naniwala—ginawa mong kasinungalingan ang mga salitang minsa’y naging tahanan ko.

‎052326
‎- 𝔁𝓸𝔁𝓸𝓵𝓮𝓲 -

22/05/2026

‎— 𝙆𝙪𝙣𝙜 𝙨𝙞𝙣𝙞𝙢𝙪𝙡𝙖𝙣 𝙙𝙖𝙥𝙖𝙩 𝙢𝙖𝙮 𝙥𝙖𝙣𝙞𝙣𝙞𝙣𝙙𝙞𝙜𝙖𝙣 —

May mga taong dumarating sa buhay natin na kayang punuin ng saya ang mga araw na dati’y tahimik lamang. Marunong silang magbigay ng lambing, pag-aalala, at mga‎ salitang kayang magpagaan ng mabibigat na damdamin. Sa kanilang presensya, unti-unti tayong nasasanay na may isang taong handang manatili sa tabi natin. Ngunit hindi lahat ng marunong magparamdam ay marunong ding manindigan sa huli.
‎
‎May ilan na magaling lamang sa simula—sa pagbibigay ng pag-asa, sa pagpapakilig, at sa pagbuo ng mga pangakong hindi naman kayang tuparin. Sila iyong marunong magpasaya, ngunit hindi handang akuin ang responsibilidad ng damdaming kanilang ginising. At habang tumatagal, maiiwan na lamang ang isang pusong litong-lito kung alin ba ang totoo sa mga salitang minsang pinaniwalaan.
‎
‎Kaya kung may hihilingin man ako, sana’y layuan ako ng mga taong hindi kayang panindigan ang mga damdaming sila mismo ang nagsimulang magparamdam. Sapagkat hindi biro ang magtiwala sa isang taong akala mo’y sigurado, ngunit sa huli’y iiwan ka lamang na puno ng pagdududa sa sarili. Mahirap buuin muli ang pusong nasanay magmahal nang totoo ngunit pinaglaruan lamang ng panandaliang intensyon.
‎
‎Mas nanaisin ko na lamang ang katahimikan kaysa sa pagmamahal na saglit lamang umiiral. Dahil ang tunay na damdamin ay hindi nasusukat sa matatamis na salita o panandaliang pag-aalaga. Ang tunay na pagmamahal ay nakikita sa kakayahang manatili, umunawa, at panindigan ang lahat ng ipinadama—mula sa simula hanggang sa wakas.
‎
‎052225
‎- 𝔁𝓸𝔁𝓸𝓵𝓮𝓲 -

21/05/2026

— 𝙋𝙖𝙜𝙠𝙞𝙡𝙖𝙡𝙖 𝙨𝙖 𝙨𝙖𝙧𝙞𝙡𝙞𝙣𝙜 𝙝𝙖𝙡𝙖𝙜𝙖 —

Nangingibabaw ang bawat salitang namumutawi sa iyong labi.
Dapat ba akong mamangha?
‎Ngunit higit na namamayani ang paggalang na muli kong inangkin—ngayon, para sa aking sarili. Nalalaman mo ba? Marahil ikaw ang naging dahilan kung bakit muli itong nabuo. Ang paggalang sa sarili na minsang nawaglit sa akin sa paglipas ng mga taon—isang pagkawala na hanggang ngayo’y hindi ko pa rin lubos maunawaan kung paano nangyari.
‎
‎Ang tanging natitiyak ko, minahal ko noon ang isang taong nabigong masilayan ang tunay kong halaga. Isang pag-ibig na unti-unting kumitil sa pagtingin ko sa aking sarili, hanggang sa ako’y masanay na lamang sa sakit at pananahimik. Ngunit ngayo’y natutunan ko nang bantayan ang aking sariling damdamin—ang pusong minsang naging payaso sa entablado ng pag-ibig, laging nagpapatawa habang lihim na nasasaktan.
‎
‎At sa iyong presensya, ako’y hindi na muling naliligaw. Sa halip, mas lalo kong nakikilala ang sarili kong matagal kong ipinagkait na pakinggan. Unti-unti kong natutunan na hindi pala kailangang magsumamo upang mahalin nang tama. At sa wakas, ang bawat salitang nangingibabaw sa aking puso ay hindi na binabalot ng pangamba, kundi ng pag-ibig na malaya, payapa, at hindi na kailanman ipagkakait sa akin.
‎
‎031126
‎- 𝔁𝓸𝔁𝓸𝓵𝓮𝓲 -

21/05/2026

— 𝘔𝘨𝘢 𝘛𝘢𝘯𝘰𝘯𝘨 𝘯𝘢 𝘞𝘢𝘭𝘢𝘯𝘨 𝘒𝘢𝘴𝘢𝘨𝘶𝘵𝘢𝘯 —

“Kaya pa ba?”
“Kakayanin ko pa ba?”
“Susuko na ba ako?”

Mga katagang paulit-ulit kong itinatanong sa sarili, ngunit hanggang ngayon ay wala pa rin akong maibigay na tiyak na kasagutan. Napapagod na akong unawain ang sarili kong isip at damdamin. May mga gabing mas pinipili ko na lamang manatiling gising, sapagkat higit na maingay ang mga bulong ng aking isipan kaysa sa katahimikan ng gabi.

Madalas kong isisi sa sarili ang lahat ng taong naapektuhan ng aking ugali, dahilan upang maisip kong marahil ay napapagod na rin silang unawain ako. Kung may magtanong man sa akin ng, “Kumusta ka?” marahil ay sasagot lamang ako ng, “Ayos lang” sapagkat ano nga ba ang magagawa nila kung sabihin kong hindi na talaga ako maayos? Sino ba ang mananatili, kapag ako nama’y unti-unti nang nilulunod ng sariling kalungkutan?

Siguro sila ay narindi na sa aking bawat pagdaing. At marahil, ang tangi ko na lamang masasabi ay pasensya na kung naging mabigat akong dalhin—isang taong puno ng mga daing at hinagpis na matagal nang ikinukubli sa katahimikan.

051726
-𝔁𝓸𝔁𝓸𝓵𝓮𝓲-

21/05/2026

— 𝐒𝐚𝐧𝐚 𝐡𝐢𝐧𝐝𝐢 𝐤𝐚 𝐦𝐚𝐠𝐛𝐚𝐠𝐨 —

Isang payak na pakiusap na nagmumula sa pusong natatakot mawalan ng taong minsang naging tahanan ng katahimikan at pagmamahal. Ngunit habang lumilipas ang panahon, unti-unti ring napapatunayan na ang tao ay hindi nananatili sa iisang bersyon ng kaniyang sarili. Ang dating lambing ay maaaring mapalitan ng pananahimik, at ang dating init ng presensya ay maaari ring malamigan ng distansya at pagbabago.

Hindi naman kasalanan ng isang tao ang magbago. Lahat tayo ay hinuhubog ng panahon, karanasan, at mga sugat na tayo lamang ang nakaaalam. May mga pagbabagong kinakailangan upang tayo’y lumago, matuto, at mabuhay. Ngunit sa kabila ng pag-unawang iyon, may bahagi pa rin ng puso na tahimik na nangungulila. Sapagkat minsan, hindi lang naman sa tao tayo nananabik—kundi ang paraan kung paano nila tayo pinaramdam na mahalaga tayo noong sila’y hindi pa nagbabago.

Nananabik ako sa dating ikaw—ang ikaw na marunong magbigay ng oras kahit walang dahilan, ang ikaw na kayang patahanin ang magulong isip ko sa simpleng presensya lamang. Ang dating ikaw na naging dahilan kung bakit naniwala akong may mga taong kayang manatili. Ngunit ngayon, tila isa na lamang alaala ang bersyon mong minsang minahal ko nang buong-buo.

Masakit pa lang tanggapin na may mga taong hindi naman tuluyang nawawala, ngunit unti-unti nang nagiging estranghero sa paningin ng ating puso. At sa bawat gabing bumabalik ang alaala ng dating ikaw, wala akong ibang magawa kundi ang tahimik na sambitin ang mga salitang minsang puno ng pag-asang “Sana hindi ka magbago.”

052126
-𝔁𝓸𝔁𝓸𝓵𝓮𝓲-

Address

Mangatarem

Website

facebook.com

Alerts

Be the first to know and let us send you an email when Ang Mga Akda Ni Ligaya posts news and promotions. Your email address will not be used for any other purpose, and you can unsubscribe at any time.

Shortcuts

Want your establishment to be the top-listed Arts & Entertainment in Mangatarem?

Ang Mga Akda Ni Ligaya

29/05/2026

22/05/2026

21/05/2026

21/05/2026

21/05/2026

Address

Website

Alerts

Shortcuts

Share

Category