25/06/2026
Na sa tamang ayos ang pluma
Kuwaderno man ay di magawang ibuklat at lapatan
ng mga tintang hindi sigurado kung sa kanyang paglapat
mapupunit ba sa sakit ang bawat piraso at pahina
o maihahayag ba dito ang bawat kataga
Na syang patunay kung gaano ka talas
Ang palisok na tumama sa'yo
Habang nilalakbay mo ang tanawin ng inyong kahapon
Hindi ko iiwanan ng kahit na anong bantas ang piyesang ito
Sapagkat hindi ko alam kung kailan ako hihinto
Dapat pa bang magpahinga
Mabigla at matuwa
o magpapatuloy na lamang
Sa paghakbang hindi upang makalimot ng bigla
Kung hindi para makaramdam ng payapa
At mabigyan ng pag-asa ang puso
na makalimot
Sa kahapon ng mga tanawing minsan mong naging tahanan
At handog sa'yo ng sansinukuban
—Bb.Saydang
