RVA

26/11/2024

nagtukel a dara
nagbalay iti murdong
ti tammudok

idi intudok ti langit
iti labes ti agdadagsen
nga ulep

diak makita uray
tangadek ti asul
la koma ket

tudo ketdi ti naitudok-
tudok iti rupak
nadadagsen a disso

ti ubo ti nabtak a dugol
ket idi inapirasko
ti rupak, nalabaga

ti narikna ti dakulapko
dara, dara ti asul
a langit iti likud

ti puraw ken nangisit
a pissuol, dara ti naibagsol
iti daga, iti daga

nga agnanayonto
a pakaitugkelak
agnanayon a pakabukelak

a mangitudtudok
iti tammudok
iti buttabuttaw a langit

210611262024

27/10/2024

ti laeng maaramidak
itan ket agbati
ken maikuleng

awanen dagidi a mayeng-
meng ti di nagnaknakem
a panawen ti ruk-at

pimmanawen
amin a timbeng, amin
a simbeng

din agpaltuad
pay ti lubong
iti bukod

a lubong, aramidek
la itan ti ibati
a buddak: isem

nga ipigadmonto
iti tanem



https://x.com/royvadilaragon/status/1845455722160717956

27/10/2024

panawen
a maimaymayeng
dimtengka manen
limtuad a rettab
ti naarbisan a lenned

kunam no
pimmanawen
ti sidduker
a din maikuleng
iti lagip ti anglem
nagawan a nakem

dimo kadi la
ngaminen yaleng-aleng
maminggakan
nga agmuttaleng

malemen
dimon yuray
ti masipngetan
manen



https://x.com/royvadilaragon/status/1843446239083577563

26/10/2024

agsubliak kadi
ngarud manen iti ikut
ti dapo

iti kadkad ti darang
a nangikari iti segged
ti di pay naadaw a beggang

saan kunak diak
pay nasarakan ti dapanko
nga immunan

kamakamek kunak
ngem nagdardaras
metten a bimmallasiw

idinto nga agtatapaw
ti pagnana ket
di nakaaddang

makasubliak kadi
ket diak met nagbati
ta koma mulmolak

lattan ti rumrumsiken
a beggang
ket ikukotko ti mauram

agingga a lamutennak
ti pasugnod ti apuy
ket agsubliak a kas dapo

sippawemto
dagiti alipaga
ken dalipato

idissoda kenka
ti sungbat
a marunot iti dakulapmo

054610272024

The Clientele · The Lake House (Original Motion Picture Soundtrack) · Song · 2006

25/10/2024

(sound track for the evening)

because
you made the night
love what was long ago
appeared
in a dream
where i took a knife
and stenciled on my skin
the fire in your eyes
and the ember
that was your tongue
before your face fades away

where i awoke
and find you licking
blood from my painless
wound

sweating with salt
and in agony of seeing
you with eyes
and tongue
but faceless as it were.

222910252024

X's - Ci******es After S*xhttps://cigsaftersex.lnk.to/_xsX's - 0:00 - 3:03Tejano Blue - 3:03 - 6:58Silver Sable - 6:58 - 10:50Hideaway - 10:50 - 15:26Holding...

25/10/2024

Ania koma pay ti reklamok
no iti diak pannakaturog
ket makariingak a rupam
ti kapunganko imbes a rupak

Diak ammo no agsapan
wenno malemen wenno rabii pay laeng
mapuotak laengen a sika gayam
ti ul-ulsak ngem sisiak iti papag

Rummuarak man ta innak ketdi agsibug
kadagiti mulak a paria iti paso
dinanondakon dagiti lanutda
ket kumalkalatkatdan ditoy kuarto

Ipalagip ti mabaybay-an a bulong
ken uggot ti napait a kinapudno
idi a malaylay dagiti rabii
idi a magango dagiti aldaw

Agsakdoak idi ngamin iti bito
a no tan-awak awan rupak iti danum
iti lansad no di la rupam
a nakakidem ti makitak

Awan sabong dagiti pariak
ngem nagbungada latta ket naragsakak
met la a nagpurpuros iti intuntunok
nga inka inim-imas uray dimo sinsinda

Awan reklamok uray riingennak
a kanayon no daytay makaturogak koman
alaem lattan amin a pungan ken ules
ngem kadi ibatinak latta iti papag

25/10/2024

ibabawik kadi ti nagtaengen a buribor ket keltayek ti gasat ti maisiglot a kararua

sakbay

a makibur ti lubong
a riniribuk
ti nagbukar
a tagainep?

sakbay
a madadael ti atap
ket agballigi ti inap
ti ulep

a nangilinged
iti sellag
idinto

a kannag

sakbay

nga agbabawi ti lawag
a tagilinged dagiti nasipngetan iti dalan ket nagkarkarawada iti ruting sanga bulbulong bato bingkol kadagiti desdes a pakaitibkolan ken pakaiderraasan ken pakapukawan

sakbay

ti amin

diak ibabawi ti petpet
ti kimpetak a sipnget

ditoy, adda silaw
ditoy, adda talinaay
iti laksid ti natagari a suli
iti laksid ti lubong ti kissiim ken sidong ti siim

ditoy, diak makabaddek iti riduma
ditoy, adu a siit ngem awan suatek

a puris

saan nga agbabawi ti nalpasen a di maibabawi nga isem a katukad ti amin a pannakaakas ti dalemdem ken pannakaakkal iti saem

saanyo
a kabukbukodan ti patienyo a nalinteg a kamang

ditoy, agkakamang amin a tiri
agsisilpo amin a birri
agsasabet amin a bingngi

diyo masapulan ditoy ti kari

ta saanak nga agbabawi
a naikari.

085410252024

--------
Image:
Paul Klee (1879-1940)
The full moon

07/10/2024

(To the branches)
I don't want any shadows. My rays
must enter into every part
and in the dark tree trunks
a rumour of splendours
so that to-night I may have
sweet blood on my cheeks
--Federico Garcia Lorca, "Monologue of the Moon" (Bodas de Sangre, Act III)

idi a rabii, kinidemam
ti di idi kidem a bulan
idi nga intinnagna ti buneng

a dawdawatem
iti no manon
a kasiglotan a rabii

dimo pinati
ti tadem a nailagid
iti pulsom

a di nagdara
kunam saan a daytoy
ti tarumamis

ti kabus nga inarapaapko
a sudak iti nagnanaedak
a kannag

kinidemak
ti di makideman
a saem ti ipas

ti gedged
ti pasugnodmo
iti patiem a paidam

a bulan
tinarigagayak
a siak ti tinnaganna

a siak ti ibinglayanna
a siak ti pasukibanna iti igam
tapno matangadkonto

metten ti rupak
iti agdardara
a bulan

iti rabii
nga agkidem
ti rabii

192010072024