22/11/2025
Bado kong de kolor na sinoble mo sako kan nakaaging bulan. Nakatipig sa aparador na kaheras ka dati. Parong-parong kong maray so paborito mong fabcon. Makusog an sipa sa dungo alagad mahamot. Garu yaon ka lang digdi sa kwarto, nakahigda, nagdadalan nin paborito mong series.
Toninong. Toninong na ngunian. May dakulang ispasyo sa katre na garu bagang nagaalok higdaan nin saro pang katawo. Ngunian na banggi, ako na lang an maokupar sa ispasyong dati ika an nakapano. Ngunian na banggi, kataid ko an bado kong de kolor na orog katraydor an parong na minasagil-ot sa dungo kong hinahanap an parong mo.
