mga tula sa tissue ng 7eleven na walang upuan

mga tula sa tissue ng 7eleven na walang upuan mga salitang hindi masambit na sa papel nailalahad

sa simula ng taon,tuloy ang daloy ng buhay;gigising at babangon,maiinitan ang balat konghikahos sa paghihintay.sa simula...
06/01/2026

sa simula ng taon,
tuloy ang daloy ng buhay;
gigising at babangon,
maiinitan ang balat kong
hikahos sa paghihintay.

sa simula ng taon,
unti-unting luminaw ang direksyon;
aabante't susulong,
sa patutunguhan nang
paa kong ngalay ngunit
hindi namamanhid.

sa simula ng taon,
malalampasan ang unos;
aagapay at yayakap,
sa mga bisig na
hindi mawawala't
panatag.

sa simula ng taon,
lilingunin ko pa rin ang nagdaan;
magninilay akong gising,
kasabay ng paglunok sa mga
aral na iniwan.

sa simula ng taon,
wala akong katapusan;
lakas at diwa ang
sandatang iaalay.

Kay tagal nanalangin na makahakbang palayo,ngunit ang pag-unlad ay tila mailap na anino. Hanggang sa kusa itong sumibol—...
31/12/2025

Kay tagal nanalangin
na makahakbang palayo,
ngunit ang pag-unlad
ay tila mailap na anino.

Hanggang sa kusa itong sumibol—
isang mapusok na alab,
bumulusok na tila bulkang
matagal nang nag-aabang.

Hindi ko namalayang
sa bawat saglit na nagdaan,
unti-unting nilililok
ang bago kong katauhan.

Ang dati’y malabong wangis
at gapos na pananaw,
ngayo’y may bagong anyo,
sa liwanag ay sumasayaw.

Ganito pala ang pumiglas,
ang maghubad ng balat,
mula sa katawang
sa pagkukunwari ay sapat.

Ilang taong ibinilanggo
ng dikta at sistema,
ngayo'y tila ibon
na lumaya sa kanyang hawla.

Sa harap ng salamin,
wala nang banyagang mukha,
ang tinititigan ko’y ako—
totoo at dakila.

Sa wakas, ang pintig
na aking nararamdaman,
ay ang tunay kong sarili,
sa wakas, ito'y natagpuan na.

- rublev

mararamdaman mo lang ang pagka-gutom, kapag naranasan mo na ang kabusugan. ganito pala ang magutom.hindi ko alam kung...
28/10/2025

mararamdaman mo lang ang pagka-gutom,
kapag naranasan mo na ang kabusugan.

ganito pala ang magutom.

hindi ko alam
kung dapat ba na magpasalamat ako
na nakatikim ako ng kabusugan—
o mainis,
dahil ngayon ay
hinahanap-hanap ko na
ang pakiramdam na ito
sa aking kagutuman.

ang sakit—
ang pait—
ngunit ito ang patunay
na natikman ko ang sarap.

ganito pala ang magutom
kapag alam mo na
kung gaano kasarap
ang mabusog.

~yuridika

bagay, buhaynatural na siguro saking mawalan ng gamit—wallet, pera, libro, panyo atbp., minsan sobrang halaga nito sa ak...
28/10/2025

bagay, buhay

natural na siguro saking mawalan ng gamit—wallet, pera, libro, panyo atbp., minsan sobrang halaga nito sa akin na hindi ko dapat maiwala. sinasabi sa'kin ng magulang ko, pabaya ako sa gamit. o di kaya'y hindi ko raw pinahahalagahan ang mayroon ako. simula't sapul gano'n na nagiging kalagayan ko. kahit na sa isip-isip ko lahat mahalaga sa'kin. lahat may saysay—na tila may buhay para sa akin ang mga ito.

sa bawa't gamit na nawawala dinadamdam 'ko; iniisip ko rin gabi-gabi hanggang sa makalimutan ko na. ngunit pagkalipas ng ilang mga araw bumabalik din. kaunting memorya ko lang ng nawala, bumabalik lahat ng sakit na naramdaman ko at panghihinayang sa mga nawala ko. walang mintis na sumasagi sa isip ko yung mga bagay na yun. gaano man kaliit o kalaki, may bitaw bawa't isa sa'kin. kahit papaano kasi may pinagsamahan din kami nun. gaano man kabilis o katagal. napapa-isip na lang ako kung maibabalik ko pa ba yun? kung nasa mabuting kalagayan kaya ito? kung nakapulot man nito'y napakinabangan kahit papano ung gamit na nawala ko. palaisipan lahat ng iyon palagi kapag nawawalan ako. hindi ako sumusukong panghawakan na balang araw maibabalik ko ito ulit. hindi man kita sa mukha ko ang pag-aalala. minsan parang tingin nila wala akong pagpapahalaga sa mga naiwawala ko. pero kung tutuusin iniiyakan ko pa nga yan. walang bagay na nawala sa piling ko na binalewala ko. lahat may bitbit na ala-ala't sakit; lahat sa akin may memoryang sinapit.

'gaya ng sabi nila na kapag nawala mo ang isang bagay, saka mo lang makikita at mararamdaman ang halaga nito. napa-isip tuloy ako kung saka ko lang ba talaga napagtatanto ang halaga ng nawala katapos nitong maglaho sa aking mga mata o ganito talaga ang palagi kong kinahihinatnan at palagi may mawawala sa akin gaano ko man ito pahalagahan?

- rublev

Address

Yearning Station
Apalit
2016

Website

Alerts

Be the first to know and let us send you an email when mga tula sa tissue ng 7eleven na walang upuan posts news and promotions. Your email address will not be used for any other purpose, and you can unsubscribe at any time.

Shortcuts

Share

Category