23/08/2026
शंखमुलको होस्टलमा छोराको मृत्युको खबरले विक्षिप्त आमाले पनि ज्यान गुमाइन्, एउटै परिवारमा दोहोरो बज्रपात! काठमाडौंको शंखमुलस्थित भ्याली ब्वाइज होस्टलमा भएको आक्रमणमा २२ वर्षीय वसन्त कालाथोकीको मृत्यु भएको केही समयमै उनको परिवारमा अर्को ठूलो बज्रपात परेको छ। दाङको घोराही उपमहानगरपालिका–१७ घर भएका वसन्तमाथि शुक्रबार बिहान होस्टलमै १८ वर्षीय शेखर यादव, २० वर्षीय प्रमित पटेललगायतको समूहले धारिलो हतियार तथा सरसामान प्रहार गर्दा उनी गम्भीर घाइते भएका थिए। उपचारका लागि मीनभवनस्थित निजामती कर्मचारी (सिभिल) अस्पताल पुर्याइए पनि चिकित्सकले सवा १२ बजेतिर मृत घोषणा गरेका थिए। काठमाडौंमा छोराको जघन्य आक्रमणमा मृत्यु भएको खबर दाङस्थित घरमा पुगेपछि स्तब्ध बनेकी उनकी आमाले पनि आफ्नै ज्यान लिएको बताइएको छ। एउटै घटनाको पीडा सहन नसक्दा परिवारका दुई सदस्यको ज्यान गएपछि घोराही–१७ स्थित गाउँ शोक र स्तब्धतामा डुबेको छ। घटनालगत्तै प्रहरीले होस्टलबाटै शेखर यादवसहित ६ जनालाई नियन्त्रणमा लिएको थियो भने घटनापछि फरार रहेका मुख्य आरोपी प्रमित पटेललाई मकवानपुरको भैंसेबाट पक्राउ गरिएको छ। प्रहरीले मुख्य आरोपीहरूविरुद्ध कर्तव्य ज्यानसम्बन्धी अनुसन्धान अघि बढाएको छ भने आमाको मृत्युको घटनाबारे स्थानीय प्रहरीले थप अनुसन्धान गरिरहेको जनाएको छ।
