08/02/2024
Velkomen til Skrivargarden i Aurdal i Valdres! Sorenskrivargarden er eigd av kunstnarparet Ragnhild Hemsing og Hallgrim Hansegård. Dei opnar no heimen sin etter mange år med oppussing der dei har henta fram igjen det originale, både i stil og farger. Det siste ferdige rommet er den nyrestaurerte ballsalen i 2.etg.
Garden har røter tilbake til 1600-talet og hovudbygningen vart oppført i 1846. Aurdal var sentrum i Valdresregionen på 1800-talet, og rett nedanfor Sorenskrivargarden var endestasjonen på Valdresbanen. Sorenskrivaren fungerte som dommarfullmektig og skatteoppkrevjar, og huset var elles mykje brukt til fest for borgarskapet. Spelemannane laut lære seg kunstmusikk som franchaise og fandango i tillegg til dei lokale dansane, og slik vart bygningen ein arena for kulturmøte. Knut Hamsun som budde på nabogarden, fekk stipend av sorenskrivarfrua då han skreiv boka Victoria. I Aurdalsbyen er sveitserstilen dominerande og Sorenskrivargarden er det einaste bygget i utprega empirestil her.
No er ballsalen restaurert attende til 1800-talsstil, og ekteparet Hemsing Hansegård gler seg til å opne dørene til ulike kulturarrangement iløpet av året. No fyrst ut er Hemsing Festivalen i februar.
Velkomne til konsertar!
