21/08/2026
GSYPD Ta Ƙaddamar da Tallafin Gidan Sauro ga Marayu da ’Yan Gudun Hijira a Girabshi
GIRABSHI, SOKOTO — Ƙungiyar Girabshi Saman Dutsi Youth for Peace Development (GSYPD) ta ƙaddamar da wani shiri na bayar da tallafin gidajen sauro ga marayu, ’yan gudun hijira da kuma wasu daga cikin al’ummar da ke da buƙata ta musamman a yankin Girabshi da Saman Dutsi.
Shirin, wanda aka gudanar a matsayin wani ɓangare na ayyukan jin ƙai da tallafawa al’umma da ƙungiyar ke gudanarwa, ya zo ne a daidai lokacin damina, lokacin da yawaitar sauro ke ƙara jefa al’umma cikin haɗarin kamuwa da cututtukan da sauro ke yaɗawa.
A cikin jawabin maraba, Shugaban GSYPD, Alhaji Salihu Mai Icce, ya bayyana cewa manufar wannan tallafi ita ce taimaka wa marayu, ’yan gudun hijira da sauran masu buƙata wajen kare kansu daga cizon sauro, musamman a wannan lokaci na damina.
Alhaji Salihu ya ce ƙungiyar ta ɗauki wannan mataki ne bisa la’akari da muhimmancin lafiya da jin daɗin al’umma, yana mai cewa tallafin gidan sauro zai taimaka wajen rage haɗarin kamuwa da cututtukan da sauro ke haifarwa.
Ya kuma jaddada cewa ayyukan GSYPD ba su tsaya kan raba gidajen sauro kaɗai ba, domin ƙungiyar na gudanar da wasu shirye-shiryen tallafawa al’umma da s**a haɗa da ba da tallafi ga matasa, tallafawa zawarawa, aikin gayya da sauran ayyukan ci gaban al’umma.
Shugaban ƙungiyar ya yi amfani da wannan dama wajen gode wa al’ummar Girabshi da Saman Dutsi bisa goyon baya, haɗin kai da ƙarfafa gwiwar da suke bai wa ƙungiyar wajen gudanar da ayyukanta na zaman lafiya da ci gaban al’umma.
A nasa jawabin, Hakimin Girabshi, Malam Ummaru Tukur, ya bayyana jin daɗinsa da wannan sabon shiri na GSYPD, yana mai cewa irin waɗannan ayyuka na da matuƙar muhimmanci wajen tallafawa masu ƙaramin ƙarfi da kuma inganta jin daɗin al’umma.
Hakimin ya yaba wa ƙungiyar bisa ƙoƙarin da take yi wajen kawo ayyukan jin ƙai da ci gaba a yankin, tare da yin kira ga sauran al’umma da ƙungiyoyi da su yi koyi da irin wannan kyakkyawan aiki domin taimakawa waɗanda ke buƙatar tallafi.
A cewar masu shirya shirin, mutane 200 daga cikin marayu da ’yan gudun hijira ne s**a amfana da tallafin gidan sauro a wannan zagaye.
Taron ƙaddamar da tallafin ya samu halartar manyan baki da dama, ciki har da ɗan takarar Majalisar Dokokin Jihar Sokoto, Hon. Mubarak Hassan Kalambaina, da kuma Shugaban Jam’iyyar ADC na Kalambaina Girabshi Ward, Hon. Bello Abdullahi.
Shirin ya ƙara jaddada muhimmancin rawar da ƙungiyoyin matasa za su iya takawa wajen tallafawa al’umma, musamman a fannonin lafiya, zaman lafiya, jin ƙai da ci gaban al’umma.
GSYPD ta bayyana kudirinta na ci gaba da gudanar da irin waɗannan shirye-shirye domin rage wahalhalun da masu ƙaramin ƙarfi ke fuskanta tare da ƙarfafa haɗin kan al’umma a Girabshi da Saman Dutsi.
Salihu Mukhtar SME Foundation Aliyu Magatakarda Wamakko Sokoto Online
