06/02/2025
Choyipa chitsata mwini! Tsizinamtole wina m’boma la Mangochi ali muululu pomwe wabayidwa pa mimba ndi wagulu lake lomwe pomwe amafuna kubaya munthu wina yemwe amafuna kumuchita chiwembu.
Patsiku latsokali, Victor Chisuse wa zaka 20 adatengana ndi wa manja lende nzake, ulendo okabilibinya anthu m'misewu. Atangoti gululu ndi James Nansenyaname yemwe amayendera zake, mbavazi zidangoti laponda lamphawi, kuyiwara kuti kandiyelekere adagwera m'mpheto mwapongozi.
Adakadziwa adakaphika therere; Awiriwa adamulanda foni Nansenyaname kuyiwala kuti mamuna nzako mpachulu. Kafa nikhaleyu adayamba kusintha zibonyongo ndi awiriwa. Atazindikira kuti ashosha mavu nkhomola, m’modzi mwa akathyaliwa adakuwa, “tangomubaya basi.”
Imodzi mwa mbavazi yomwe pano siikudziwika komwe ili, idasolora lupanga. Koma poti tsiku la tsoka amakuluma ndi wako yemwe, m’malo mobaya Nansenyaname, kapsalayu adaphonya ndikubaya nzake, Chisuse pamimba. Atazindikira, adaliyatsa la mtondo wadooka kumusiya Chisuse akunong'oneza bondo kwinaku akusamba mwazi.
Nsamaliya wina wa chifundo adatengera mbavayi pamodzi ndi Nansenyaname ku chipatala komwe wachiwembuyu wagonekedwa pomwe Nansenyaname adatulutsidwa nthawi yomweyo
Dinani apa kuti zambiri zisakuphonyeni
