20/09/2025
တစ်ခါပွင့်အလွမ်း
—————————————
လွမ်းစရာ့ နွေမှာ
သက်မဲ့သစ်ရွက်တွေက ရှင်လို့
သက်ရှိလူတွေက အသက်မဲ့လို့ ။
ပြဒါးတစ်လမ်း သံတစ်လမ်း
ဖြစ်ခဲ့ပြီးကြတဲ့ ငါတို့ဟာ
နောက်တစ်နွေ
နောက်တစ်ဆောင်း
ဘယ်ရာသီတွေ
ဘယ်လိုပြောင်းပြောင်း
ဆုံဖို့ရာအကြောင်းများလည်း
မရှိတော့ပါဘူး ။
ဘဝမှာ
ကိုယ့်စိတ်နဲ့
ထပ်တူမကျဘူးလို့ ခံစားမိတဲ့အခါ
ဘယ်သူနဲ့မှလည်း
တစ်ကိုင်းထဲ အတူတူမနားချင်တော့ပါ ။
ရှင်လို့ပဲ ကွဲခဲ့ရပါစေ
သေလို့ပဲ ခွဲခဲ့ရပါစေ
နှလုံးသားထဲကဖြစ်တဲ့ မျက်ရည်စစ်စစ်တွေကိုတော့
မကျဖူးတဲ့သူရယ်လို့လည်း
ဒီကမ္ဘာမှာမရှိခဲ့ဘူးပေါ့ ။
တကယ်လို့
နာကျင်စရာကိစ္စရပ်များနဲ့သာ ဝေးခွင့်ရတဲ့အခါ
နှလုံးသားကို
အမေမွေးတုန်းကအတိုင်းပဲ ပြန်ဖြူခဲ့ချင်ရုံပါ ။
တစ်ခါသာပွင့်ခွင့်ရခဲ့ရတဲ့
အလွမ်းဟာ
သံသရာအထိ
ငါနဲ့ထပ်တူပါတော့မယ်လို့
ငါဆိုတဲ့အခါ
သံသယကင်းကင်းနဲ့
မင်းယုံပါလိုက်ပါကွယ် ။
- နွေဦးရောင်
