Linn Nyo Yape

18/04/2026

ချစ်ဦးညိုနဲ့တော့
လမ်းလျှောက်အတူ
မထွက်ချင်ပါဘူးဗျာ။
လောကဓံဆိုတာကြီးက
သူ့ဘေးမှာ
လက်ချင်းချိတ်လျက်
အမြဲပါနေတာကိုး။
မောင်ခိုင်မာရဲ့
သိင်္ဂါရငှက်တွေလိုပေါ့။

မရှောင်ရင်လွတ်တယ်ဆိုတဲ့
မြိုင်ရာဇာတွတ်ပီရဲ့
သီအိုရီကို ယုံစားမိတာကြောင့်
အလွမ်းမြားတွေ
ရင်နဲ့အပြည့် စူးစိုက်လို့ပေါ့။

ဖူးစာဆိုတာကတော့
နီကိုရဲနဲ့
ဆွေမျိုးတော်တယ်ထင်ပါ့။
ထင်တိုင်းလွဲ
မှန်းတိုင်းလွဲ
ချစ်တိုင်းလွဲ
လွဲချက်ကဖြင့် လွန်ပါရော။

ကံကြမ္မာကို မယုံကြည်ကြသူများရဲ့
ဗေဒင်ဟောစာတမ်းထဲမှာတော့
မေတ္တာရေးမှာ ကံခေပြီး
အသည်းသက်စေ့ ကွဲဦးမှာတဲ့လေ။

တကယ်တော့
အချစ်ဟာ
တာရာမင်းဝေရဲ့
ကဗျာတစ်ပုဒ်လို
တစ်ခုခုခံစားလိုက်ရပေမယ့်
အဓိပ္ပာယ်ပြန်ပြောဖို့တော့
မလွယ်လှပါဘူး။

အချစ်ဆိုတာ ဘာလဲ
သစ္စာတရားဆိုတာ ဘာလဲ
ကျွန်တော်လည်းပဲ
အဲဒါကိုပဲ
သိချင်နေတာပါပဲ ခင်ဗျာ။

#မင်းလူ ( ကာရံမဲ့ စကားပြေ )

15/02/2026

"မျှော်လင့်ခြင်း ထမင်းသိုးများ"
---------------------------

ညနေခင်းတွေဟာ
ကမ္ဘာမြေပေါ်က မြို့ရွာတွေအပေါ်
ဘယ်လိုများ ကျရောက်ခဲ့ပါသလဲ။

ဟောဒီလိုများ
တစ်နေရာရာမှာတော့
ကျရောက်ခဲ့မယ် ထင်တာပဲ။

ငါးရှဥ့်သွေးရောင် ကောင်းကင်လမ်းမှာ
ငန်းမွေးရောင် ဘောင်းဘီ
မြင်းချေးရောင် ဖိနပ်
တိမ်သားရောင်စုံ ရှပ်အင်္ကျီကောင်းဝတ်လို့
ညနေခင်းဟာ
လေညင်းခံ ထွက်နေမယ်။

အဲဒီမှာ
လေညင်းကလည်း
နှင်းဆီခင်းတွေထဲ လူးလှိမ့်လာခဲ့လို့
နှင်းဆီနံ့တွေနဲ့
ကိုယ်လက်နှီးနှောခဲ့လို့မို့
ညနေခင်းဟာ မွှေးပြီးနေပါလိမ့်မယ်။

ဒါမှမဟုတ်ရင်လည်း
ဖန်ကလပ်ထဲမှာ
ဝိုင်ပုလင်းထဲမှာ
ညနေခင်းဟာ တစ်ကိုယ်လုံး ဆင်းစိမ်ပြီး
စည်းစိမ်ယစ်မူး ပျော်ပါးနေတာလည်း
ကမ္ဘာမြေ တစ်နေရာက
မြို့တစ်မြို့မှာ
ရှိဖြစ်တန်ကောင်းလေရဲ့။
ဒီမှာ
ဟောဒီမှာ
ရန်ကုန်အစွန် ငမိုးရိပ်ချောင်းစပ်နားက
ထားပါ
လယ်ကွင်းတွေ ဝိုင်းရံထားလို့မို့
လယ်ကွင်းတွေနဲ့ ရန်ကုန်မှာပေါ့။

၇ပေ၊ ၁၀ပေ အခန်းတစ်ခုထဲမှာ
ညနေခင်းဟာ ..
ဆာလောင်ခြင်း ဒီရေတက်ပြီး
ညနေခင်းဟာ ..
လူဆန်ချင်နေရှာပါတယ်။

ဒီအခန်းမှာ
ညနေခင်းမှာ
ဝမ်းစာသင်္ဘောဟာလည်း
ဆိုက်ကပ်မလာခဲ့သေးပါဘူး။

ဒီမှာတော့
ညနေခင်းဟာ
အထိအခိုက် အကျအရှုံးများစွာနဲ့
သူဆင်းရဲသား ဖြစ်ခဲ့ရှာရဲ့။

ဒီညနေခင်း
အလင်းဝပ်အား ပိန်ပိန်မှာ
သူ့နို့ပိန်ကလေးကို လီဆယ်ပြီး
နို့တိုက်နေတဲ့ ကလေးအမေ
အသက်ငယ်ငယ် အရွယ်အိုအို
လူသားအရောင်အဝါ မှိန်မှိန်
တစ်လွှာပြီး တစ်လွှာပေါ့
ဒီမိန်းမသားရဲ့ မျက်နှာမှာ
မျှော်လင့်ခြင်း အရေပြားတွေ ကွာကျ။

ဒီလိုမျိုး
မျှော်လင့်ခြင်းကို
ညနေခင်းကို
စောင့်မျှော်ခြင်းကို
ဆာလောင်ခြင်းကို
ဘဝကို
မျိုမျိုချခဲ့ရလွန်းလို့
စောင့်မျှော်ခြင်းနာရီတွေသာ
ခရီးထွက်သွားမယ်ဆိုရင်
ခုလောက်ဆို
နယူးယောက်မြို့ကို ရောက်လောက်ပြီလို့
ဒီလိုမျိုး တွေးမိလေသလား။

သားသည်အမေ အဘွားအိုမလေး
လမ်းမမျှော် သူ့မျက်နှာကို
ခါယမ်းလိုက်ကာ
သူ့ကလေးတွေကို လှမ်းကြည့်မိရဲ့။

အခန်းထောင့် ဖျာကြမ်းစုတ်စုတ်မှာ
ဖျားနာနေတဲ့ ကလေး
စောင်ခြုံလို့
တကယ်တော့
ကလေးရော စောင်ပါ ဖျားနာနေခဲ့ပါပြီ။

ထမင်းဆာလွန်းတဲ့ ကလေး
တအီအီနဲ့
ဒီတက်လို့

ဒီမှာ
သူ့လက်လာတိုးတဲ့ သွေးက
သူ့ကလေးတွေ သူ့ရင်ခွင်မှာ
သူ့မျက်စိအောက်မှာပေမယ့်
သူ့ကလေးတွေနဲ့ သူနဲ့
ကမ်းဝေးနေတာ မြင်ရ
သူ့သက်ပြင်း မီးသင်္ဘောဟာ
မီးခိုးတအူအူနဲ့ ထွက်ခွါသွားတော့ရဲ့။

ဒီမှာ
သူ့အသက်ရှင်ခြင်းအပေါ်
ခပ်ပြင်းပြင်းရိုက်ထားတဲ့
သံကျစ်ဆူးကိုနုတ်ဖို့ လှုပ်လိုက်တော့
အိမ်ကထွက်သွားတဲ့ အိမ်သားဟာ
အသိုက်က ထွက်သွားတဲ့ ငှက်ပေါ့လေ တဲ့
ငှက်ခတ်သမားနဲ့တွေ့လို့များ
အသက် ပါသွားလေသလား
မျက်လုံးတစ်ဖက်တည်းနဲ့ပဲ
အိမ်ပြန်လာလေမလား
လက်ကျိုးပြီး ပြန်လာမလား
ခြေတစ်ဖက်တည်းနဲ့ပဲ အိမ်ပြန်လာမလား
သူ့နှလုံးသားကို
အဲဒီလို
သွားပွတ်သပ်မိရှာတယ်။

နောက်ဆုံး
အကောင်းဆုံး
ကလေးအမေ သူဆင်းရဲသားရဲ့မယား
ဒီလို တွေးရှာတယ်
အူဟောင်းလောင်းနဲ့ပေါ့
ဒီထက်ကောင်းတဲ့ ညစာမျိုး
မရှိတော့ပါဘူးတဲ့။

စာ ရေရိက္ခာတွေ
မပါလာရင်လည်း နေပါစေတော့
(မိမွေးတိုင်း ဖမွေးတိုင်း)
ကောင်းမွန်ချောမောစွာ
အိမ်ပြန်လာရင်ပဲ တော်ပါပြီ ..တဲ့
အဲ့ဒီလိုနဲ့
မျှော်လင့်ခြင်းဟာ
ထမင်းအသိုးများသာ ဖြစ်ခဲ့ပါတယ်၊

ဒီထမင်းအသိုးများပဲ
ချဉ်ခြင်းပြင်းစွာ ဖြစ်မိပါသတဲ့
အဆွေခင်ပွန်းကောင်း ညနေရေ။ ။

#မောင်ချောနွယ်
#မျှော်လင့်ခြင်းထမင်းသိုးများ

25/01/2026

“မတ်လ တော်လှန်ရေး”
-----------------------------------

မိုးကုပ်ကုပ်ဝယ်၊ အို ရုတ်တရက်
မျဉ်းဖြူစက်၍၊ ကွဲအက်ကြောင်းရာ
ဟ ဟ လာပြီ၊ မိုးပြာကိုဖြတ်
ပတ္တမြားရည်၊ စီးလည်အဟုန်
နီမြန်းကုန်သည်၊
အရုဏ်ပေါ်စ ဝိုးတဝါး။ ။

မှုန်ဝါးဝါးလျှင်၊ ဝိုးဝါးတိတ်ဆိတ်
ကြယ်ရောင်ရိပ်ဝယ်၊ မြစ်ဆိပ်နှင့်လည်း
မနီးမဝေး၊ ချောင်းရိုးဘေးမှ
ဖြေးဖြေးညင်းညင်း၊ လှေတစင်းထက်
တောတွင်းသားပျို၊ ဖျင်လက်တိုနှင့်
ကိုယ်ကိုဝပ်၍၊ စိုက်စိုက်ရွေ့သည်
ခြောက်သွေ့မျက်ထုံး၊ ကောက်ရိုးဖုံးလျက်
ကွယ်ပုံးဝှက်လာ၊ ယူကာလက်ထောက်
အလျားမှောက်သည်၊
လှေအောက်ဝမ်းမှ စက်သေနတ်။ ။

အမှောင်ရိပ်ဝယ်၊ မှေးမှိတ်ငြိမ်သက်
ချောင်းကွေ့ထက်တွင်၊ အုပ်ယှက်ထွေးရော
သင်ပေါင်းတော၏၊ နောက်ကျောစေးပျစ်
သောင်ရေစစ်မှ၊
ဖက်ဆစ်ကင်းစောင့် စစ်စခန်း။ ။

ချောင်းကိုကွေ့သော်၊
တွေ့လျှင်တွေ့ချင်း၊ မြေငူရင်းသို့၊
ချဉ်းကပ်လှော်ကာ၊ နီး၍လာလျှင်၊
အသာရုတ်ချင်း၊ တိတ်ဆိတ်မင်းကို
ဖြိုခွင်းပြင်းထန်၊ သေနတ်သံသည်
မြစ်ယံပဲ့တင် ထပ်သတည်း။ ။

ငွေလရောင်လျှင်၊ အမှောင်ညရိပ်
သေးသေးစိတ်သား၊ မိုးထိပ်တိမ်သော်
ငြိမ့်ငြိမ့်ပေါ်သည်၊ စန္ဒော်ပြုံးလှည့်
ငုံ့ကာကြည့်ရှင့်၊ ထွန်းသည့်ညဉ့်ခါ
ထိန်ထိန်သာသော်၊ ကျယ်စွာဝန်းလျား
လယ်ကွင်းနားမှ၊ တောဖျားညို့အုပ်
မှိတ်တုတ်တုတ်လျှင်၊ ယိမ်းလှုပ်ပြကာ
မီးအိမ်ဝါနှင့်၊ အာကာပြာမှိုင်း
တွဲလွဲဆိုင်း၍၊ ဖြူဝိုင်းစက်စက်
ဆင်းလာသက်မှ၊ လက်လက်ရောင်ထင်
ကျသွင်သွင်သည်၊
လေယာဉ်ပေါ်မှ စစ်ရိက္ခာ။ ။

ရွာတရွာကား၊ မှိုင်းပြာမဲညို့
မီးရှို့လောင်ကျွမ်း၊ တင်းဝင်ရမ်းကြောင့်
ပရမ်းပတာ၊ ထွက်ပြေးရှာရ
လဟာသွေ့သွေ့၊ ခိုးငွေ့ဝေဝေ
မီးလောင်မြေမှ၊ နွမ်းခွေပျောင်းလဲ့
ညင်းလေဖွဲ့က၊
သဲ့သဲ့ခွေးဟောင် သံတကား။ ။

ခရေပွင့်လျှင်၊ ကြွေရင့်ဝါဝါ
မြေ၌မှာလျှင်၊ ရောကာပေါင်းယှက်
ဟောင်းသစ်ရွက်နှင့်၊ တဝက်မောင်းနီ
ဝေ့လည်လည်ကို၊ လေချီသုတ်ဖြူး
နီဝါကူးသည်၊
နွေဦးပေါက်မို့ ရော်ရွက်ကြွေ။ ။

ရင့်ကြွေညောင်းသည်၊ ရွက်ဟောင်းစွန့်ပြစ်
ဘဝသစ်သို့၊ သနစ်ပြောင်းမည်
ဖူးသစ်မီသည်၊
အနီထဲက ကြယ်ဖြူပွင့်။ ။


#ဒဂုန်တာရာ
#မတ်လတော်လှန်ရေး

20/01/2026

“စက္ကူပန်းများရဲ့တနေ့တာ”
------------------------------------------

ငါတို့က
မီးပဲ ပျက်တာ
သူတို့က
ဘဝတွေပါ ပျက်နေတာ

ငါတို့က
စိတ်ပဲ ပျက်တာ
သူတို့မှာ
လေယာဉ်တွေပါ ပျက်နေတာ

ငါတို့
အနာဂတ်အပျက်လိုမျိုး
သူတို့မှာလည်း
ယန္တရားအပျက်ကြီးနဲ့

ဒါပေမဲ့
ငါတို့ ပန်းတိုင်က မပျက်စီးဘူး
သူတို့ သားသမီးမြေးမြစ်တွေသာ
လူမှုဝန်းကျင်မှာ ကူရာကယ်ရာမဲ့ကြမှာ

အချိန်အခါက စကားပြောပါလိမ့်မယ်
အရှိန်အဝါက ဝါကျဖွဲ့ပါလိမ့်မယ်

အလိမ်အညာဆိုတာ
သမိုင်းမှာ
ဘယ်တုန်းက ဆေးဖက်ဝင်ခဲ့ဖူးလို့လဲ

#ညီမင်းညို
#စက္ကူပန်းများရဲ့တနေ့တာ

16/01/2026

"အလံကို တစ်ဝက်ချထားမယ်"
------------------------------------------------

သက်ပြင်းကိုတစ်ဝက်ချမယ်။
ရေစက်ကိုတစ်ဝက်ချမယ်။
အိပ်မက်ကိုတစ်ဝက်ပဲမက်မယ်။
အလံကိုတစ်ဝက်ချထားမယ်။

မတီးဖြစ်တဲ့ဂစ်တာကို
တစ်ဝက်ပဲကြိုးညှိမယ်။
ငါ့သောက်ရေအိုးထဲက
အိုအေစစ်လေးတောင်မှ
တစ်ဝက်ပဲအေးနိုင်တယ်။

သေမထူး
နေမထူး
ဖနောင့်ကိုသံစူးထားသလို
အနမ်းကို တစ်ဝက်ပဲထုံကူးခဲ့ရတယ်။

နှလုံးသားတစ်ခြမ်းဖဲ့ပေးရတာတောင်
ဝမ်းနည်းရကောင်းမှန်းမသိသေးတဲ့ရှုမျှော်ခင်းတစ်ခုပါ။
လွမ်းလို့တည်ထားတဲ့စေတီလေးမှာ
ထုံးသင်္ဃန်းကို တစ်ဝက်ပဲကပ်နိုင်ခဲ့တယ်။

အသက်ကတော့
တစ်ဝက်တပျက်ဆက်ရှင်နေရဦးမယ်။
မသေမရှင်လို့ ပြောကြတာပဲ။
တစ်သက်မှာ
လူဟာ
သူ့နိုင်ငံတော်ကို တစ်ဝက်မျှပဲချစ်ခွင့်ရတဲ့အခါ။

#နိုင်မွန်အောင်သွင်
#အလံကိုတစ်ဝက်ချထားမယ်

12/01/2026

"နိုဝင်ဘာ"
------------------

ငါ့ရဲ့ ရွှေအိပ်မက်ကို
ခြေကျင်းတွေလို ခွဲစိပ်ဝတ်ဆင်ထားတဲ့မိန်းမ
မြူခိုးနီညိုတွေကြားမှာ
စပယ်ကပိုကရိုနဲ့ ... လှလို့။

ငါ .. တစ်ပွင့်ပြီးတစ်ပွင့်ပြိုလဲ
နှင်း အဆက်ဆက်တိုင်အောင် ကြေကွဲခဲ့ရပေါ့ ။ ။

#တာရာမင်းဝေ
#နိုဝင်ဘာ

08/01/2026

"ရပ်မနိုင်ရွာမနိုင်"
--------------------------------

" စိန်ပန်းနီနီ နဲ့
အိမ်လွမ်းပြီ သူငယ်ချင်း ရဲ့
သတင်းတွေ စောင့် " ။

တစ်နေဝင် တစ်မိုးချုပ်ပေမယ့်
ဖိုးတုတ်တို့ ဓါးတစ်လက်နဲ့
အရက်တွေ ကျိုက်
ကြက်တွေ ပိုက်ချိန်မို့
လ မိုက်ည မှောင် စမ်းစမ်း
လမ်းက မဖြောင့် ။

ရွာမိ ရွာဖတွေက
ဆုံးမလည်း မနာခံ
နှုတ်လှန်လို့ ထိုး
ရွာမနိုင် ငါကိုင်တုတ်နေကျ
ယုတ်တဲ့ အမျိုး ။

ဖွတ်တွေ မိကျောင်းဖြစ်တော့
မြစ်မှာလည်း မချမ်းသာ
ရွာနာရှာ ပေါ့

ရွာအဝင် တမာပင်ကလေးကို
လွမ်းသော်လည်း
တစ်လှမ်းစာ တစ်ရွာတစ်ကျေး
ဝေးက တမော့
ပြေးရ အသော့ ။ ။

#တင်မိုး
#ရပ်မနိုင်ရွာမနိုင်



Phoe K(22:12:2020)

06/01/2026

"ရွာပျက်ကြီး"🥺

‘ရွာပျက်ကြီး’

◼️လင်းညိုရိပ်

စွန့်ခွာခဲ့ရတာက ဒီမြေကို
မချစ်လို့မှမဟုတ်ပဲ
မဖြစ်လို့သာ စွန့်ခဲ့ရတာ။

တိုးတိုးတိတ်တိတ် ထွက်ပြေးလာရစဥ်
လမ်းသာရာကိုလည်း မရွေးနိုင်ခဲ့
အချိန်အခါကိုလည်း မစောင့်နိုင်ခဲ့
ပြေးနိုင်မှဘဲလွတ်မယ်။

ကျည်ဆံတွေကို မရှောင်ရှားနိုင်တော့
ဆီ၊ဆန်တွေလှောင်ထားတာလဲ မသယ်နိုင်ခဲ့ဘူး
ပဲ၊နှမ်း၊ပြောင်းတွေကိုလည်း
ခွဲခြမ်းပြီးမရောင်းနိုင်ခဲ့ဘူး
ငရုတ်၊ဖရုံ၊ခဝဲတွေကိုလည်း
အထုပ်စုံံထဲကို ထည့်ပြီးမယူသွားနိုင်ဘူး။

ညကြီးအချိန်မတော် တောထဲတောင်ထဲ
လက်နှိတ်ဓာတ်မီးမပါဘဲ ဖြတ်ခဲ့ရတယ်
ဘယ်မြွေမှလည်း မကြောက်နိုင်ခဲ့
ဘယ်တစ္ဆေမှလည်း မကြောက်နိုင်ခဲ့။

လှည်း၊နွားကိုယ်စီနဲ့ ပွဲများလိုစည်နေတဲ့
တောလမ်းကလေး...
မမောတမ်းပြေးခဲ့ရသူတွေမှာတော့
ဝမ်းနည်းပက်လက်။

ရွာကိုအဝေးကနေငေးရင်း သက်ပြင်းတွေချ
လှည်းပေါ်ကလူတွေ တွေးကြတယ်
"လူတွေသာမရှိတော့ရင် ရွာကပျက်တော့မှာ"။

သံယောဇဥ်တွေ တသီတတန်းနဲ့
ရွာကိုလွမ်းကြတဲ့လူတွေ
ဘယ်လမ်းကိုများ ဆက်ကြရမှာ..
ဘယ်ကမ်းကိုများ ကပ်ကြရမှာ..။

လောလောဆယ်တော့
စိတ်ချရတဲ့နေရာကိုရောက်ဖို့
ရေပြင်ကိုဖြတ်ကျော်ကြရဦးမယ်
လှေကိုလှော်ကြပါစို့။ ။
#လင်းညိုရိပ်

#ခေါ်သံ

05/01/2026

“ဖောက်ပြန်ရေးသမား”
------------------------------------

ထလော့ကြွလော့
နေကြလော့ ဟု ၊
ပြောတော့ ဆိုတော့ အဟုတ်ပေါ့ ၊
လုပ်တော့ ကိုင်တော့ ခပ်ပေါ့ပေါ့ ၊
ပြီးတော့ ... ခပ်လျော့လျော့ ။

တိုက်လော့ ခိုက်လော့
တော်လှန်တော့ ဟု .. ၊
ပြောတော့ ဆိုတော့ အဟုတ်ပေါ့ ၊
တိုက်တော့ ခိုက်တော့ ခပ်လျော့လျော့ ၊
ပြီးတော့ ခပ် ပေါ့ ပေါ့ ။

ပြုလော့ ပြင်လော့
စွမ်းဆောင်လော့ဟု ၊
ပြောတော့ ဆိုတော့ အဟုတ်ပေါ့
ပြုတော့ ပြင်တော့ ခပ်ပေါ့ပေါ့ ၊
ပြီးတော့ ခပ်လျော့လျော့ ။

တည်လော့ ဆောက်လော့
ဖန်တီးလော့ဟု ‌
ပြောတော့ ဆိုတော့ အဟုတ်ပေါ့ ၊
တည်တော့ ဆောက်တော့ ခပ်လျော့လျော့ ၊
ပြီးတော့ ခပ်ပေါ့ပေါ့ ။ ။

#မောင်ချောနွယ်
#ဖောက်ပြန်ရေးသမား