Akanga Tsara Soratra

09/04/2026

Miarahaba an' ANDRIAMANALINA Ni Avatsa , mankalaza ny tsingerintaona nahaterahany androany.
Ni Avatsa dia anisan'ireo vato fototry ny Akanga Tsara Soratra, niara-namadika bainga ho an'ny haisoratra ary teo foana niara-niombonana tamin'ny ekipa rehetra fa tsy niala na tamin'ny mora na tamin'ny sarotra.

Miavaka tena miavaka ny fomba fanoratany ary tsy takatry ny saina kamo mikaroka, manaporofo ny fahaizany miangaly ny poezia sy ny fahaizany voambolana ny endriky ny sorany. Harena lehibe ho an'ny literatioran'ny vanimpotoana ankehitriny ny talenta n'i Avatsa.

Mirary fahombiazana feno ho azy ary ho ampoky ny tsara anie ny manontolony, ho voky fahasoavana sy ho voky taona ka hiara-hifoka ny rivo-kanton'ny literatiora eto foana.
( . . . )

Taimbalimbaly , Taindronirony
( . . . )Inona ?
Izay manantena hamadika sy tsy hanoa
Modia ankofa ,
Fofosarita tahaka ity sary malahelo ity .
Aza misy fara handimby indry andriamanitra ,
Ankoatra antsika sombiniaiko .
Fa raha mahatana izany kosa ,
Modia famonto ny velirano rehetra vita
Tsofy rano am-bava hifafy
Iantohako ny olona mivady ,
Mila voa tsy ary , zoro fira
Fadin'ala Zanakomana .
Eny e ," fa zovy , fitiavan'iza akia no maty ?
Sa inona no loza hitranga ?"
No tomany taratra ny volana , ny kintana mihabanga ?
Andromanana niarahana nanangana
No indro manindao ,
Fa iza loatra ianao ?
Ny faritra any ahoana ?
Voatondro iray ampamelomantokana
No hany vokatra ,
Haro mihoatra tanana
Ho fara fanenenana . . .
Samy ngaly niara-nandrifotsy ,
Fa fahaenina sisa vao tsy fotsy !
( . . . )

Malahelo aho andriambavy ,
Fa nanjary tanin-dambo ny fanjakanako ato . . .
Koa eto aho , mangataka olona aminao
Ho lanitriombonana sy vakana hiambozonana
( . . . )

" Fa ohatra ny maty , hono , ianao ."

ANDRIAMANALINA
Telo naminanana , Alahasaty

05/04/2026

Ilay lehilahy marina!

Nilaza ny mpanjaka 'zay nanao ny fitsarana
Naneho ankarihary fa tsy afaka hitana
Raha nanadihady sy nanao ny famotorana
"Tsy hitako izay helony fa tokony hovotsorana"!

Nihoraka ny olona nanako hoe (fantsiho)
(Mpampiodina vahoaka sy mpisandoka ilehio
Miseho ho tonga lafatra sy manam-pahendrena
Manakana ny karatra sy fandoavan-ketra)!

Manafangaro jiosy sy ny avy any Samaria
Nanomboka any Silo ka hatrany Galelia!
Milaza koa fa izy dia mpanjaka any ambadika
Ilehio midoka tena fa zanak'Andriamanitra!

Vonoy ho faty mihitsy ...fa io tsivalahara
Raha vao mamela an'io ianao tsy naman'ny Kaisara
Izahay tsy mbola manana mpanjaka olon-kafa
Fa raha tsy ingahy Heroda , dia rafozan'i Kaiafa !

Dia gina i Pilato ka tsy nahateny intsony
Navelany ny olona nanao zay sitrapony
Ka nampaka rano mba hanasan-tanan'izy
Fa tsy tompon'antoka amin'ny ra tsy manan-tsiny.

F'ireo vahoaka kosa nihoraka izaitsizy
Nisesika ny lapa izy ireo nikiribiby
Nivava tamin'ny lanitra niozona tamin'ny tany
"Aoka ho aminay sy ny taranakay ny rany"!

Dia nanodidina azy ny antoko miaramila
Nody niarahaba somary mitanila!
Inona ny marina hoy izy nanontany
Saingy ilay voapanga, nangina tsy namaly!

Ka ompa miharo latsa no nasesiny tsy niato
Mazàna koa nifafy ny vely tora-bato!
Vinaingitra sy afero no natohony am-bavany
Nataony filokana, ny sisasisan-dambany!

Fa ilay reny kosa hontsa sy nangasihasy
Nitazana ity zanaka nasolo Barabasy
Niezaka nanivatsiva ireto miaramila
Nianika fiakarana manao kisilasila!

Nanomboka amin'izay ary ilay ali-nijaliana
'Lay zanak'Andriamanitra nompaina nosangina
Nafatotra miamboho, ny tongotra aman-tanany
' Reo miaramila sasany nanambotra ireo mpianany!

Dia maizina ny lanitra ,nanjombona izaitsizy
Nanomboka tamin'ny enina nifarana amin'ny sivy
Nihiaka ilay voaheloka nanandram-peo nitraka
Nony nitanondrika dia maty ilay voampanga !

Ilay kapiteny sy ny fehiny nanatrika
Niaiky tamin-tahotra, nahita ny ainy tapitra
Tsy meloka hoy izy, ity lehilahy finantsika
Fa Zanak'Andriamanitra sy tena olo-marina!

Ny Ela Nihetezana

03/04/2026

02/04/2026

RAKOTOSON Bertrand Eudesse, fantatry ny maro amin'ny hoe :Ny Ela Nihetezana, filohan'ny Akanga Tsara Soratra sampana Antananarivo izy.

Ho antsika te hifandray na hiara-hiasa na te hiara-hanandratra ny haisoratra any Antananarivo, aza misalasala mifampiresaka aminy.

Hahavadika bainga maro eo amin'ny literatiora anie izy sy ny ekipa rehetra any ary mirary fahombiazana feno ho an'ny Akanga Tsara Soratra sampana Antananarivo.

02/04/2026

Izy no RAFANOMEZANTSOA jean Pierre Roland na i ANTSO. Mitantana ny AKANGA TSARA SORATRA any Faratsiho izy, afaka mifandray aminy isika te hiara-hiasa na hanatevina ny ekipan'ny soratra any Faratsiho any.

Mirary azy hahavita be amin'ny adidy izay nankinina taminy.

31/03/2026

Miarahaba an'i Tsiaro Fanaperana, mankalaza ny tsingerintaona nahaterahany androany.

Mirary azy ho ampoky ny soa sy ho lava velona hatrany.

30/03/2026

Efa-taona niombonana...
Manerana ny vazantany... Manerana ny vanimpotoana...

23/03/2026

AKANGA TSARA SORATRA :
SAMPANA ROA NO NIARA-NIJORO

Nitsangana omaly 22 Martsa 2026 ny Akanga Tsara Soratra sampana Faratsiho sy sampana Antananarivo.

- Faratsiho : Tonga tany an-toerana ny filoha nasionalin'ny Akanga Tsara Soratra, Faniry Ezeckiel, niaraka tamin'ny mpanolotsaina: Aloka Miserana. Ankoatra ireo ekipan'ny soratra any an-toerana dia nisy mpianatra vitsivitsy nanatrika ny fotoana, nizarana sombim-pahalalana. Efa ekipa tao amin'ny Faribolana Sandratra Faratsiho taloha ny ankabeazan'izy ireo ary efa manana ampinga enti-manodina ny literatiora. Filoha Mpitarika ny sampana Faratsiho moa i Antso, miaraka amin'ireo birao vitsivitsy manampy azy.

-Antananarivo : Toerana maro olona, renivohitra, iroboroboan'ny literatiora fatratra ankehitriny no itsimohan'ny fikambanana Akanga Tsara Soratra ihany koa. Efa vonona ireo mpanoratra any an-toerana hihetsika sy hanome aina ny zava-kanto any Iarivo. Nambara ofisialy fa mijoro izy ireo ary i Ela Nihetezana no mpintantana izany. Nisolo tena ny birao nasionaly nanangana ny sampana i Avo Elabakaka, tompon'andraikitry ny serasera nasionaly sady mpiara-manodina ny ao Antananarivo ihany koa. Mpiara-miasa akaiky aminy ao i Haintso Mivetsokalo sy i Bazoly.

Araka izany, misandrahaka amina sampana efatra hatreto ny Akanga Tsara Soratra tao anatin'izay Efa-bolana nijoroana izay: Antsirabe, Ambatolampy, Faratsiho, Antananarivo.

Mirary ny soa sy fisandratana ambony ho azy ireo.

"Tsy ny teny manandra-tena fa ny tena manandra-teny"

Sary 1- 2-3- 4:sampana Faratsiho

Sary: 5-6 :Sampana Antananarivo

21/03/2026

Akanga Tsara Soratra sampana Ambatolampy, nanome aina ny fankalazana ny taom-baovao malagasy, tamin'ny alalan'ny fiantsana tononkalo tany Ambatolampy.

21/03/2026

Andro iraisam-pirenena ho an'ny poezia, velakevitra telo sosona niarahana tamin'i Faniry Ezeckiel, Andriamanalina Ni Avatsa, Saina Mahatsangy tao amin'ny Tranoben'ny Serasera sy ny Kolontsaina Akon'Ankaratra androany. Nandravaka ny hetsika ny antsa tononkalo, Slam, dihy avy amin'ny mpianatry ny LARA. Nanaitra ny fahatongavan'i Jeannot RATSIMBAZAFY, mpanao gazety szdy mpanoratra nanome voninahitra sy hasina ny fotoana.

Ankasitrahana isika rehetra tonga nanotrona.

Isaorana ireo rehetra niara-nisalahy nahamasaka iny fotoana nahafinaritra iny.

Indro àry, sary vitsivitsy nanamarika izany :

Indro

20/03/2026

Hanahoana ny hoavin'ny haisoratra malagasy manoloana ny fanatontoloana sy ny fivoarana ankehitriny ? Mirongatra ireo mpanoratra solofo sy dimbin'ny ala, ahoana ny fomba hisedrany ny dingana sy ny sakana rehetra hahatratrarany ny tanjony ? Aiza avy ny lalana mankany amin'ny soratra lovain-jafy tsy ho rendriky ny tafiotran'ny vanimpotoana ankehitriny ?

Santionan'ireo fanontaniana hovahavahaina sy hosavasavaina rahampitso ireo ary hisitrahantsika valiny azo tanterahina sy vatsy hoenti-mody.

Tongava aby ilehiretsy e !

18/03/2026

Miarahaba an'i B'y Hakaÿ izay mankalaza tsingerin-taona nahaterahany androany.

Ho ampoky ny hasina sy ho heniky ny soa anie izy.

B'y Hakaÿ moa dia Akanga Tsara Soratra eto Antsirabe. Mpanoratra, poeta, miavaka izy amin'ny fiangaliana ny antsa sy fomba fanoratra.