27/05/2026
Aloky ny fahabangana partie 3
Vao maraina dia nandeha teny amin’ilay gara taloha aho satria tsy nanome ora voafaritra ilay hafatra. Toerana mangina no nandray ahy rehefa tonga teny. Tsy dia misy mpandalo firy satria toerana efa nilaozan’ny olona. Feon-drano mikoriana sy ny rivotra mitsoka no hany ren’ny sofina. Tamin’izay vao tokony ho tamin’ny 6 ora maraina.
Ora maro no niandrasako teo nefa tsy nisy tonga. Efa ho tamin’ny 1 ora atoandro vao nahita fiara avy lavitra nanatona aho. Fiara efa hitako taloha… saingy mbola tsy azoko tsara hoe an’iza.
Rehefa nanakaiky ilay izy dia tsy diso ny saiko…
Fiaran’i Dada.
Izy sy Mino mpamily no tao anatiny.
Nidina moramora i Dada. Hita teny amin’ny tavany ny havizanana sy ny alahelo lalina efa niainany taona maro.
Nanatona ahy izy ary niteny tamin’ny feo nangovitra:
“Zanako… tonga ny fotoana hahafantaranao ny marina…eto am-piandohana dia mamela ahy ianao tamin'ny zavatra rehetra vitako,mifona aho satria tsy mba namita ny andraikitro amin'ny maha Ray ahy mihintsy,jambany rendrarendra loatra ity Rainao ka tsy mahalala hoe Misy ny tody,tsarovy ihany koa nefa fa tsisy Ray aman-dReny tsy tia ny zanany izany fa matoa izy nanary ny zanany dia nisy antony tao,tsy ho tsapanao mihintsy ny fahagejana nahazo ity Rainao,feno aloka manaloka ahy amin'ny toerana rehetra izay lalovako,tamin'ny ireny andro ireny dia misy aloky ny fahabangana foana manaloka ahy,mahatsiaro banga be ny fiainako rehefa tsisy anareo mianaka saingy izao vao tena fantatro ny marina rehetra,mpamosavy....Mpamosavy Kay ilay vadikely noheveriko fa tena lafatra izay natakaloko ny fianakaviko ary nanariko anao zanako mihintsy,azon'ody kay ity Rainao tamin'ireny hany ka izay rehetra nolazainy dia nekeko daoly na zavatra tsy nety aza...Mifona aminao izaho zanako fa tsy afaka niaro anao sy ny Reninao akoriny....Maty ny Reninao noho izy,tsy aretina velively nahafaty an-dReninao fa nopozininy.Novonony mba nahafahany namita ny teti-dratsiny,ka avy eo nalainy tamin'ny ody izaho refa lasa ny Reninao.Tsy ditra velively ireny nataoko ireny fa noho ny ody daholo,mamela anahy ianao.Ka amin'izao fotoana izao Nefa efa maty ihany koa izy satria nataon'ny olona fitsaram-bahoaka rehefa tratra nivoaka alina,ka Teo no nolazainy ny marina rehetra tamin'ny iny fotoana nandefasako hafatra anao omaly iny...Ka izay hanaka ny marina rehetra anjaranao sisa no mandinika ary mamantatra ny ho tohiny,tsy hanome tsiny anao Nefa ahy amin'izay fanapahankevitra rehetra ho raisinao.Tsarovy hoe tiko ianao ry zanako....."
Nangina vetivety aho. Tsy nisy teny nivoaka. Nifangaro tao anatiko ny hatezerana, ny alahelo, ny fahabangana… ary ilay fitiavan-janaka mbola tsy maty.
Tao anatin’izay taona maro izay dia nihevitra aho fa Ray nandao ny zanany i Dada.
Kanjo… izy koa dia olona very tao anaty haizina.
Nijery azy aho. Lehilahy reraka, potiky ny nenina ary very ny zava-drehetra.
Dia teo aho no nahatsapa fa: indraindray ny olona tsy ratsy… fa diso lalana fotsiny.
Naka aina lalina aho ary niteny taminy tamin’ny feo malefaka:
“Mamela anao aho Dada…”
Tsy nahatana ny ranomasony izy tamin’izay.
Hatramin’io andro io dia niezaka nanarina ny fiainanay izahay mianaka. Tsy ho tafaverina intsony i Neny, ary tsy ho voafafa ny ratra rehetra… saingy nianatra niaina niaraka tamin’izany izahay.
Ary izaho? Mbola manohy miady ho an’ny nofiko.
Satria na mafy toy inona aza ny sedra… tsy tokony hanaiky ho resin’ny fiainana mihitsy ny olona iray.
Indraindray, ny aloky ny fahabangana no mampianatra antsika hahita ny tena lanjan’ny fitiavana, ny finoana… ary ny fianakaviana.
Tapitra....
Inona no hafatra sy hanatra voarainao nandritra ny fizarana faha telo sady farany?🥰✍️ Raha nahafinaritra anao ilay tantara dia aza adino ny mizara na mipartage❤️❤️ ary araho hatrany ny page fa mbola misy tantara anankiray solony ao😊😊
