Kh.d

20/11/2021

يا شربل اشتقت احكي معك
اسأل وينك،نحنا بحاجة قلك
الكون عم بصارع والضحية شعبو
واللي عم بقاوم مسلّح بإيمانو
قلوب خيفانة،واعمار عم بتروح
عيون شاخصة عليك،مليانة بالدموع
ناطرة منك عجيبة تخلصنا من الوباء
بدنا نغلب اليأس بكترة الدعاء
شربل من فوق عن التلة حلّك تهلّ
وبإيدك المرفوعة ع لبنان دلّ
واثقين انو بلمحة بيختفي الوجع
يللي سبّبو قلنا الطمع والجشع
والعم بصير فينا هو رسالة
نتذكر انو بالحياة في عدالة
بس الانسان تناسى تضحية يسوع
واسترسل بملذاتو لصار مخدوع
بعّد عن الكنيسة وعن القدّاس
صار همو المظاهر ورفعة الكاس
نكر خيّو المن لحمو ودمو
فضّل الغريب ع ابن امّو وبيّو
بطّل مكتفي بالربح القليل
صار يضرب بالعيار التقيل
الشرف عندو للعرض مين بيشتري
حتى ع كرامتو عم يفتري
العيل تفككت وما حدا سئلان
لا الام واعية ولا البيّ فهمان
بيدّعوا الانفتاح وهني بعاد عنو
وانعدام ضميرن خلاهن يجنّوا
ولاد عم تربى من دون حنان
بغياب الاهل مصدر الامان
سيطر القتل والضرب والاذية
كل يوم منوعى ع خبرية
في ناس عم بتنام جوعانة
بالمقابل فئة صارت بطرانة
احساس والشعور غايب عند الكل
عم يتمتعوا بوسائل القهر والذلّ
يا بشر نحنا كلنا اخوة بالمسيح
وع مفهوم ديانتا ما لازم نزيح
يسوع وصانا ع المحبة
ليش تجاهلنا الانجيل وما عم نلبّي
تعو نلملم شو بقي من المسيحية فينا
ونعيش التوبة لترجع تحيينا
العدرا ناطرتنا تحضنّا من جديد
فاتحة ايديها وبتنادينا من بعيد
يا ولادي انتو ع قلبي غاليين
حملو المسبحة وخليكن سهرانين
الشيطان مجرّب يلعب لعبتو
مفكر حالو بينجح بضربتو
غلطان كتير يا ابليس
بمحبسة عنايا عنّا حبيس
وبكلّ شبر من لبنان في قدّيس
Dk

21/09/2019

يا حبّ بشّبهك للبحر لمابينتهي
وللنار المأججة بوقت الدفا
بجّرب اتناسى وجودك من دنييتي
لاّنو قلبي من عذابك تعب واكتفى
من بعد ما ضحّيت بكل ما بقتني
بادلتني بشو ما عندك من جفا
من سنين عاتبتك ، بوقتا لمتني
قنعتني وبقوّة انك اهل للوفا
ولعالمك الخاص بسهولة جبتني
شكلو عقلي باوامرك انّفى
كمّلت جريمتك وقدرت تقتلني
صرت بلا وجود حتى خيالي اختفى

08/09/2019

ها انا من جديد اخطّ بعد غياب
ادركت انّ هجري للكتابة بات عذاب
ورحت اصبّ على ذاتي كومة عتاب
لأني ضللت الطريق واضعت الباب
سرت حائرة ودخت من الذهاب والاياب
افكّر في القشور متناسية طعم اللباب
لازمني الارقُ في تنهداتي وهجرني السبات
اتقلّب في فراشي بجميع الاتجاهات
وفجأة لجأت الى صفحات كتاب
اكتب واكتب وحبر القلم ينساب
ليرسم ما في باطني من وزنات

06/09/2019

بشتاق اكتب لعبّر عن الجوّاتي
بلاقي حبر القلم ضايع بين المشاعر
يا ترى ان السبب بمكنوناتي
بسأل حالي شو صاير
ليش عم تنحجب منشوراتي
وفجأة بهلّ طير من بعيد طاير
يهدّي من روعي ويقلّي حتى انا بذاتي
بحتار كيف إرسي خاصة اذا الغصن مايل
بلملم شو بقي من قدراتي
بحلّق من جديد بقوّة وبقلب ثائر.

25/12/2017

18/07/2017

بسأل عنك مع كل فجر جديد
كل ما لوّح نور الشمس
بسأل عنك وقت بيوعى العصفور
بزقزق احاديث الصبحيّة
بسأل وقت السما بتزرقّ
بعد ما كان الليل عندا سهران
مع بداية عجقة النهار
بسأل انا عنك
بلمح امّ ناطرة ابنها تيروح عالمدرسة
وبشوف البيّ اللّي انطلق يأمّن اللقمة
بسأل عنك انا
كل مين ماشي عاالطريق
رايح شمال او يمين
بين زحمة السيارات، وضجّة المحلات
بكون بعدني عم بسأل عنك
بسرق زاوية لأسئل حالي
وين ممكن تكون
بتذكّر انك بقلب حالك مش موجود
يعني انت مش ملاقي حالك
ف كيف انا رح لاقيك.

21/04/2017

شو ممكن قلّك بعيدك
وشموعك انطفت بكيّر
بهديك حبّي وصلاتي
ع امل تكون مرتاح كتير
تعبت بحياتك وناضلت
ضعفت بتغيير المصير
ما اقسى لحظة فراقك
لما عمرك طلع قصير

كلّ يوم انت ببالي
مش ناطرة هيدا النهار
لا قادرة ظبّط حياتي
ولا عارفة آخد قرار
كنت العقل المدّبر
ما يكعى عليك ولا جدار
صرت بغيابك عم عاني
ببكي وكتير بنهار

ذكرى ميلادك بعدا مهمة
ورحيلك ما رح يمنعني
راجع مسيرة حياتك
وضلّ افتخر انك خييّ
محبّينك بيسألوا عنك
بيترحموا بس يطّلعوا فييّ
انا رح ضوّيلك شمعة هون
وانت احتفل فوق مع بييّ

كل عيد وانت ملاك يا حبيبي
اشتقتلك كتير كتير🙏❤️😘

14/04/2017

احد القيامة يا نصر المسيحيين
يا احلى علامة ليزيدوا المؤمنين
غلبت الموت وسكّتت المشككين
وكل كلمة قلتا باقية لدهر الداهرين

القبر الخالي من جسدك الطاهر
ونور الكفن وحدو للمكان غامر
دحرجة الحجر صدمت الحارس الساهر
قام الملك من مطرحوا وحوّلوا محجّ لكل زائر

تلاميذك كانوا زعلانين
وبموتك بقيوا مصدومين
فكّروا من معلّمن محرومين
بس رجعتلّن حطيطن ع التبشير مؤتمنين

حدث القيامة اصبح ذكرى مجيدة
وهيّ لالنا فخر بين الشعوب العديدة
بيتجدّد عنّا الايمان وبتترسخ العقيدة
انّو نحنا الشعب المسيحي ديانتنا ميزة فريدة

المسيح قام... حقاً قام
ونحن شهودٌ على ذلك🙏

11/04/2017

شو حلوة الحياة بفصولا الاربعة
بتعبّر عن حالات بالقلب متربّعة
بتتخبّى بطريقة لتبقى ملمّعة
وبزاوية اسما حزن بتكون مجمعة

يا انسان قدرتك شو عظيمة
بتموت، بتنهار وما بترضى بالهزيمة
كبرياءك اذا انخدش بتعتبرو جريمة
بتعدّ خسارتك بتحسبا غنيمة

تلذّذ بالخريف وشاركوا الوانو الخفيفة
تنعّم بالنسيم وبلفحات الهوا العليلة
فضفض عن حالك وقول انّو الدني جميلة
ما تخلّي عبئة الجوّ تكون عن سعادتك بديلة

سقعات الشتي وبردات كوانين
وقعدات العيلة والحطبات الشعلانين
سرد القصص ونحنا نعسانين
تتغلّب ع احلامنا ونروح مرتاحين ونايمين

بطلّ الربيع باحلى حلّة وبالالوان
بتشرق الشمس وبتحاوطنا من كل مكان
زقزقة عصافير بتسمّعنا اجمل الالحان
وتنقّل الفراشات المزخرفة تحسسنا بالامان

شوب الصيف وكترة نشاطاتو
بدنا نستفيد ونعبيلوا اوقاتو
مشاويرو وسفراتو وما تنسى سهراتو
بتنزاد عنّا الاصحاب من كترة ضهراتو

في احلى من هالمراحل لتتغيّر النفسيّة
نستغلّ هالميزّات يللّي عنا ياها هدية
ترتاح كلّ الاعصاب وتضلاّ قوّية
خلّينا نفكّر بهالاسلوب وناخد الامور بجدّية
بركي بخفّ عنّا الجنون والعصبيّة

10/04/2017

صرلي زمان بفتّش ع حالي
ببرم لاقدر حدّد يللي ببالي
بس القدر غدار ما بيعرف عدالة
بلاقي البواب مسكّرة قبالي

بحاول غضّ النظر عن الاوضاع
وانسى العمر المرق واللي ضاع
سامح الشخص الحبّي قلو باع
اتمسك بامل جديد ضوى ولاح

تربيت عالاحترام والتقدير
ما فرّق بين الغني والفقير
ما اتنازل عن قيم مهما يصير
ولا اقبل رشاوي لغيّر مصير

ما قدرت ميّز بين الصدق والمحتلة
تحملت كتير اهانات وبهدلة
طلع دوري بالمسرحية كتير مهزلة
كرمال داوي جروحي قضيّتا لملمة

شو صعبة انك تربى بهالطريقة
وتكون عكس البنات الجريئة
مش تواضع مني انّي انا البريئة
لان حياتي بتفاصيلا كانت دقيقة

10/04/2017

يا يسوع قدّيش انا بحبك
وع بالي امشي ع دربك
خدني وخلّيني جنبك
زدني ايمان وقوّة منك

تعذبت كتير كرمالي
وحملت الخطيّة بدالي
مشيت الجلجلة وجسمك الدامي
وع الصليب انصلبت يا غالي

شو سرّ هالجمعة العظيمة
الناس كلا حتى الطبيعة حزينة
سمرّوك ع خشبة بطريقة متينة
ومريم من تحتك تندب المسكينة

انشقّت السما والدني صارت سودا
برق يلمع والهوا مع الرعد يتحدّى
مؤمنين طالبين منك للموت تتصدّى
وانت رافض ع المكتوب تتعدّى

فجأة تبدلت نظرات عيونك
تعلن الساعة وتسلّم روحك
صرخت ايلّيا واسدلت جفونك
تارك شعبك يمشوا دروبك

نزلّوك عن الصليب برواق وسكون
صارت امك تضمك وتغمرك بجنون
تحاول تحاكيك بقلبا الحنون
والشتي نازل وانمزج بدمع العيون

طلّ السبت حامل معو كلّ النور
وقت الصبايا راحت القبر تزور
آخدين المسك والعنبر والبخور
وتفاجأوا بصوت من بين القبور

عرفوا انو هيدا المخلّص كان
تذكروّا شو قلّن بوقتا من كلام
انّوا القيامة بعد ٣ تيام
وع قلوب تلاميذو رح ينردّ الامان

05/04/2017

يا زغار يا حلوين
قرّب عيد الشعنينة
بعرف كلكن ناطرين
لتياب والشمعة والزينة

بدكن ترتفعوا علاكتاف
وشموعكن تتضوّى
بكلّ المطارح وبلالاف
واهالي تصلّي وتتمنى

رح بتكونوا كتار كتير
وحول الكنيسة رح تمشوا
تتكبروا بعد بكّير
ومعنى العيد تفهموا

رايحين تتلاقوا بيسوع
ناطر كل واحد فيكن
يتأملكن بخشوع
وبركة منو يهديكن

انبسطوا كتير بهيدا اليوم
وخلّلوا ذكرى ببالكن
زينوا اللحظة بميّة لون
تصير احلى حكاية لولادكن