06/05/2026
ඉන්දියන් ඩාල් රයිස් ..
( ඉන්දියන් පරිප්පු බත් )
මේ බත් එක හරිම රසයි .. උණුවෙන් නිකන්ම උනත් කන්න පුළුවන් ..
අවශ්ය ද්රව්ය :-
🔸 කීරි සම්බා හාල් 450 g
🔸 පරිප්පු 100 g
🔸 සිහින්ව ලියා ගත් ලොකු බී ළූණු
ගෙඩියක් .
🔸 සිහින්ව අඹරා ගත් ලොකු සුදු ළූණු බික්
හත අටක්.
🔸 කොටු කපා ගත් රතු පාට ලොකු තක්කාලි
ගෙඩියක් .
🔸 කුඩා වියලි මිරිස් කරල් කිහිපයක්
🔸 බේ ලීව්ස් 2 ( නැත්නම් රම්පෙ කරපිංචා )
🔸 තරමක කුරුඳු පොතු කෑල්ලක්
🔸 අබ තේ හැඳි 1 /2
🔸 කහ කුඩු තේ හැඳි කාලක්
🔸 ගරම් මසාලා පවුඩර් / බිරියානි මසාලා
පවුඩර් හෝ සාම්බාරු පවුඩර් පුරවලා
තේ හැඳි 2
🔸 ගී හෝ බටර් මේස හැඳි 3
🔸 කජු හා ප්ලම්ස් ටිකක් ( අවශ්යම නෑ 😁)
🔸 කපා ගත් කොත්තමල්ලි කොල මිටක්
( තිබේ නම් පමණක් )
🔸 රස අනුව ලුණු
සාදන ක්රමය :-
🔸 හාල් සහ පරිප්පු වෙන වෙනම සෝදා හොඳින් වතුර බේරෙන්න තබන්න .
🔸 බාජනයකට ගී හෝ බටර් දමා අඩු ගින්දරේ රත් කර අබ දමන්න .. අබ පුපුරන විට වියලි මිරිස් කරල්, බේ ලීව්ස් , කරපිංචා , රම්පෙ හා කුරුඳු පොතු දමා හොඳින් තෙම්පරාදු කරන්න .
🔸 දැන් අඹරා ගත් සුදු ළූණු හා සිහින්ව ලියා ගත් බී ළූණු දමා බදින්න . අවසානයට කොටු කපා ගත් තක්කාලි එකතු කර හොඳින් තෙම්පරාදු කරන්න .
🔸 තෙම්පරාදුවෙන් හොඳින් සුවඳ හමන විට දිය බේරා ගත් පරිප්පු හා හාල් එකතු කර හොඳින් උඩ යට පෙරලමින් ටික වෙලාවක් හාල් සහ පරිප්පු බැදෙන්නට හරින්න .දැන් ගරම් මසාලා පවුඩර් , බිරියානි මසාලා පවුඩර් හෝ සාම්බාරු පවුඩර් හා කහ කුඩු එකතු කරන්න . හොඳින් කලවම් කරන්න .
( මම අද දැම්මෙ බිරියානි මසාලා පවුඩර් .. ඔයාලට මේ වර්ග තුනෙන් ඕනම ජාතියක් පාවිච්චි කරන්න පුළුවන් )
🔸 දැන් ප්රමාණවත් ලෙස ලුණු හා බත ඉදෙන්නට තරම් වතුර මෙයට එකතු කර, සාමාන්ය විදියට බත උයා ගන්න .( ගෑස් ලිපක තෙම්පරාදුව හදාගෙන රයිස් කුකර් එකේ උයා ගන්නත් පුළුවන් )
🔸 වෙනත් බාජනයකට ගී හෝ බටර් තේ හැඳි දෙකක් පමණ දමා රත් කර කජු හා ප්ලම්ස් මදක් බැද .. කපා ගත් කොත්තමල්ලි කොල ටිකක් සමඟ ඉදුණු බත් උඩින් ඉස උණුසුම්ව පිළිගන්වන්න . ( කජු ටිකක් වැඩිපුර දාන්න .. රසයි . කොත්තමල්ලි කොලත් තියෙනවා නම් හොඳයි . අද මට ඒ මොනවත්ම නැහැ 😕😕)
වැදගත් කරුණු ..
🔸🔸 කැමති නම් වතුර වෙනුවට මේකට චිකන් ස්ටොක් කෝප්පයක් එකතු කරලා බත උයා ගන්න..මම නම් කිසිම මස් කන්නෙ නැති නිසා පරිප්පු බත් උයද්දි චිකන් ස්ටොක් දාන්නෙ නෑ ..
🔸🔸 මේ බත් එක කන්න හොඳ ග්රේවි ගතියට හදා ගත්තු චිකන් හෝ මාළු කරියක් හොඳටෝම ඇති.. කැමති නම් අල ගම්මිරිස් බැදුමක් , සැලඩ් එකක් උනත් හදා ගන්න පුළුවන් ..
🔸🔸 මේ බත් එක සමහර අය බෙරි වෙන්න හදලත් කනවා..එහෙම කන්න කැමති නම් කැකුළු හාලක් උනත් පාවිච්චි කළාට කමක් නැහැ..මම වගේ බත් බෙරි වෙලා කන්න අකමැති අය ඉන්නවා නම් අනිවාර්යයෙන්ම සම්බා හාලක්ම ගන්න ..
🔸 ඉන්දියන් අය මේ බත් එකට සියඹලත් දානවා.. මම නම් දැම්මෙ නෑ..ඒ ඇඹුල් රසට මම කැමති නැති නිසා.. කැමති නම් ඔයාලා දාන්න ..😉
