04/09/2026
ໃນດ້ານກົດໝາຍສາກົນ ແລະ ລະບຽບການຂອງອົງການ UNESCO, ບໍ່ມີປະເທດໃດໃນໂລກ "ໃຫ້ສຳປະທານ" ແກ່ສະຖານທີ່ມໍລະດົກໂລກໃນຮູບແບບຂອງການໃຫ້ສິດທິຂອງເອກະຊົນ ຫຼື ຕ່າງປະເທດໃນການຄອບຄອງ, ກຳໄລ ຫຼື ດຳເນີນກິດຈະກຳທາງການຄ້າ. ນີ້ແມ່ນຍ້ອນວ່າສະຖານທີ່ມໍລະດົກໂລກຖືກຖືວ່າເປັນຊັບສົມບັດທີ່ລ້ຳຄ່າຂອງມະນຸດຊາດ, ແລະ ອະທິປະໄຕເໜືອດິນແດນຍັງຄົງເປັນຂອງລັດຖະບານຂອງປະເທດທີ່ເປັນເຈົ້າຂອງ 100% ສິ້ນສຸດການລົງທຶນຂອງບໍລິສັດເອກະຊົນ, ພາກລັດ ສືບຕໍ່ປົກປັກຮັກສາ ແລະ ພັດທະນາວັດພູຈຳປາສັກນັບຕັ້ງແຕ່ວັນທີ 1 ກັນຍາ 2026 ເປັນຕົ້ນໄປ, ພາກລັດໄດ້ເຂົ້າຄຸ້ມຄອງ ແລະ ປົກປັກຮັກສາແຫຼ່ງທ່ອງທ່ຽວມໍລະດົກໂລກວັດພູຈຳປາສັກຢ່າງເຕັມຮູບແບບ. ທັງນີ້, ກໍຍ້ອນວ່າໂຄງການພັດທະນາແຫຼ່ງທ່ອງທ່ຽວດັ່ງກ່າວ ຂອງກຸ່ມບໍລິສັດ ຍິ່ງໂຊກໄຊ ຈຳກັດຜູ້ດຽວ ຕາມໃບອະນຸຍາດລົງທຶນ ສະບັບເລກທີ 014-11/ຈຂ.ຈສ, ລົງວັນທີ 22 ມິຖຸນາ 2011 ໄດ້ສິ້ນສຸດກຳນົດອະນຸຍາດລົງທຶນແລ້ວ ໃນວັນທີ 22 ມິຖຸນາ 2026 ທີ່ຜ່ານມາ.
ອີງຕາມໜັງສືແຈ້ງການຂອງຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຂວງ ສະບັບເລກທີ 761/ຄລທຂ, ລົງວັນທີ 14 ກໍລະກົດ 2026 ແມ່ນບໍ່ອະນຸຍາດໃຫ້ສືບຕໍ່ການລົງທຶນ. ການຕັດສິນໃຈດັ່ງກ່າວ ເປັນໄປຕາມມາດຕາ 75 (ຂໍ້ 2) ຂອງກົດໝາຍວ່າດ້ວຍມໍລະດົກແຫ່ງຊາດ ສະບັບເລກທີ 11/ສພຊ, ລົງວັນທີ 16 ພະຈິກ 2021 ເຊິ່ງຫ້າມສຳປະທານມໍລະດົກແຫ່ງຊາດທາງດ້ານວັດທະນະທຳ ແລະ ປະຫວັດສາດ ລະດັບຊາດ ໂດຍບໍ່ໄດ້ຮັບອະນຸຍາດຈາກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ; ພ້ອມທັງສອດຄ່ອງຕາມຄວາມເປັນເອກະພາບຂອງຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຂວງ ຄັ້ງທີ 3 ສະບັບວັນທີ 26 ພຶດສະພາ 2026, ມາດຕາ 84 ຂອງກົດໝາຍວ່າດ້ວຍການສົ່ງເສີມການລົງທຶນ ສະບັບເລກທີ 62/ສພຊ ແລະ ມະຕິກອງປະຊຸມຄະນະປະຈຳພັກແຂວງ ສະໄໝສາມັນ ສະບັບເລກທີ 06/ຄຈພຂ.ຈສ.
ເພື່ອຈັດຕັ້ງປະຕິບັດຕາມແຈ້ງການດັ່ງກ່າວ, ຄະນະກຳມະການປົກຄອງແຂວງຈຳປາສັກ ໄດ້ອອກຂໍ້ຕົກລົງ ສະບັບເລກທີ 805/ຄປຂ, ລົງວັນທີ 20 ສິງຫາ 2026 ອະນຸມັດໃຫ້ພະແນກວັດທະນະທຳ ແລະ ທ່ອງທ່ຽວ (ຖວທ) ແຂວງ ເຂົ້າປົກປັກຮັກສາ ແລະ ຄຸ້ມຄອງແຫຼ່ງທ່ອງທ່ຽວມໍລະດົກໂລກວັດພູຈຳປາສັກ. ພ້ອມດຽວກັນນັ້ນ, ໄດ້ອອກຂໍ້ຕົກລົງ ສະບັບເລກທີ 806/ຄປຂ ແຕ່ງຕັ້ງຄະນະຮັບຜິດຊອບຄຸ້ມຄອງໂດຍເກັບຮັກສາພື້ນທີ່ ແລະ ແຈ້ງການ ສະບັບເລກທີ 25/ຄປຂ, ລົງວັນທີ 31 ສິງຫາ 2026 ເພື່ອໃຫ້ພະແນກ ວທ ແຂວງ ຈຳປາສັກ ປະສານສົມທົບກັບພະແນກການທີ່ກ່ຽວຂ້ອງຂອງແຂວງ ແລະ ເມືອງຈຳປາສັກ ເຂົ້າຄຸ້ມຄອງຕາມສິດ ແລະ ພາລະບົດບາດ.
ເລີ່ມຕັ້ງແຕ່ວັນທີ 1 ກັນຍາ 2026 ເປັນຕົ້ນມາ, ຄະນະກຳມະການຮັບຜິດຊອບໄດ້ເຂົ້າປະຕິບັດໜ້າທີ່ຕົວຈິງ. ຜ່ານການຈັດຕັ້ງປະຕິບັດ ເຫັນວ່າໄດ້ຮັບການຮ່ວມມືເປັນຢ່າງດີຈາກທຸກພາກສ່ວນ ໂດຍສະເພາະການບໍລິຫານຈັດການຂາຍປີ້ເຂົ້າຊົມ, ປີ້ລົດກ໊ອບ ແລະ ການຈັດສັນສະຖານທີ່ຝາກລົດຜ່ານປະຕູກາງ ເພື່ອຄວາມເປັນລະບຽບຮຽບຮ້ອຍ. ປັດຈຸບັນ, ແຫຼ່ງທ່ອງທ່ຽວຍັງເປີດບໍລິການໃຫ້ນັກທ່ອງທ່ຽວເຂົ້າຊົມຕາມປົກກະຕິ ເຊັ່ນ: ໂຮງນາງສີດາ ແລະ ຈຸດສຳຄັນຕ່າງໆ. ນອກຈາກນີ້, ພາກລັດຍັງໄດ້ວາງແຜນຄຸ້ມຄອງ ແລະ ພັດທະນາພື້ນທີ່ທັງໄລຍະສັ້ນ ແລະ ໄລຍະຍາວ ເປັນຕົ້ນແມ່ນການຮັກສາຄວາມສະອາດ, ການປັບປຸງສິ່ງແວດລ້ອມ, ຈຸດນັ່ງພັກເຊົາ ແລະ ສູນບໍລິການນັກທ່ອງທ່ຽວ.
ໃນໂອກາດນີ້, ຂໍເຊີນຊວນບັນດາທ່ານແຂກ, ນັກທ່ອງທ່ຽວພາຍໃນ, ຕ່າງປະເທດ ແລະ ພໍ່ແມ່ປະຊາຊົນ ເຂົ້າມາທ່ຽວຊົມ, ສະແຫວງບຸນ ແລະ ກາບໄຫວ້ສັກກາລະບູຊາສິ່ງສັກສິດ ຢູ່ສະຖານທີ່ທ່ອງທ່ຽວມໍລະດົກໂລກ ວັດພູຈຳປາສັກ ແຫ່ງນີ້. #ວັດພູຈຳປາສັກ
#ມໍລະດົກໂລກ #ຂ່າວສົດ
