24/04/2026
بەیاننامەی هاوبەشی دەستەی هاندەرانی یانەی نەورۆز و ئۆڵتراسی یانەی نەورۆز و
ئۆڵتراسی یانەی هەولێر
بۆ ڕای گشتی و فیدراسیۆنی تۆپی پێی عێراق
وەک هەمووان دەزانن، تۆپی پێ کایەیەکە بۆ چێژوەرگرتن و چەسپاندنی دادی وەرزشی، بەڵام ئەوەی لەم وەرزەی خولی ئەستێرەکانی عێراقدا بەرامبەر بە هەردوو یانەی (نەورۆز و هەولێر) دەکرێت، لە چوارچێوەی هەڵەی یاسایی دەرچووە و بووەتە ستەمێکی ڕێکخراو.
ئێمە وەک هاندەرانی هەردوو یانە، بە توندی ناڕەزایەتی خۆمان بەرامبەر بەو ئاستە لاوازەی داوەران و بڕیارە نادادپەروەرانەکانی ژووری ڤار (VAR) ڕادەگەیەنین، کە بووەتە هۆی بەهەدەردانی ماندووبوونی یاریزانان و ڕاهێنەران و تێکدانی دەروونی هاندەرانمان.
خاڵە سەرەکییەکانی ناڕەزایەتیمان:
ستەمی بەردەوام: لە زۆربەی یارییەکاندا، بڕیاری یەکلاکەرەوە (وەک لێدانی سزا و کارتی سوور) بەبێ گەڕانەوەی ورد بۆ ڤار یان بە لێکدانەوەی هەڵە لە دژی یانەکانمان دەدرێت.
بێدەنگی بەرامبەر سکاڵاکان: سەرەڕای ناڕەزایەتی فەرمی یانەکانمان، تا ئێستا هیچ هەنگاوێکی کردەیی بۆ سزادانی ئەو داوەرانە نەنراوە کە ئەنجامی یارییەکانیان گۆڕیوە.
پێوەرە دوو فاقییەکان: مامەڵەی داوەران و ژووری ڤار لەگەڵ یانەکانی تر جیاوازە، و وەک ئەوەی بڕیارەکان پێشوەختە دژی یانەکانی کوردستان ئاڕاستە کرابن.
داواکارییەکانمان:
داوا لە یەکێتی تۆپی پێی عێراق دەکەین پێداچوونەوەی جدی بەو یارییانەدا بکات کە یانەکانمان تێیدا غەدر لێکراون.
پێویستە داوەرە نێودەوڵەتییەکان و کەسانی خاوەن ئەزموون بۆ یارییە هەستیارەکان دابنرێن، نەک ئەو داوەرانەی کە ئاستیان لە ئاستی خولەکەدا نییە.
ئێمە وەک هاندەران چیتر بێدەنگ نابین لە ئاست ئەم غەدرە و هەموو ڕێگەیەکی یاسایی و مەدەنی دەگرینە بەر بۆ پاراستنی مافی یانەکانمان.
تۆپی پێی عێراق گەشە ناکات ئەگەر داوەر و ڤار ببنە لایەنگر و بکوژی دادپەروەری.
دەستەی هاندەرانی یانەی وەرزشی نەورۆز
و ئۆڵتراسی یانەی نەورۆز و ئۆڵتراسی یانەی وەرزشی هەولیر
٢٠٢٦/٤/٢٤
