10/07/2022
How Can It be Translation Mizo
Jh Lalrinzuala
Duhsaki featuring El Volente, ‘Halleluiah’ hi a letlingtu hian a letling dik lo tiin an han sel viau nain, kei chuan ‘how can it be’ aiin ‘halleluiah’ hi a rilin a chiang zawk mahin ka hria (Mizopa rilru ațangin).
‘How Can It Be’ hi Lauren Daigle hla niin k*m 2014 khan an record a, a release tak chu April 14, 2015 kha a ni a. Ka sawi duh chu a hla title hi a ni. Sawiseltute sawisel ber a ni bawk a.
Kamlala’n ‘Aw ropui ber Halleluiah’ a tih ang deuhah khan ka ngai hmiah mai. Tlar hmasa lamah ‘Chhandamna ka chang ta (you say that I am free)’ a han ti a, chu chu mak a tiin ropui a ti em em si a, ‘how can it be’ a han ti a. Hla a nihna angin letling dawn ila chuan ‘how can it be’ tih chu a hmaa hla tlar nena inlalawn turin, ‘a va ropui em’ ti emaw, ‘a va mak ngai em’ tih talin kei chuan ka lehlin ka ring a. Mi sual, chhandam a niha, a aia Isua tawrhna a han hriat chuan ropui a ti a, mak a ti em em bawk a, rin harsa pawh a ti hial ang.
Kamlala’n Pathian ropuizia a sawi thiam lo a, ‘halleluiah’ a han ti tawp mai te kha a ril em em a. Chutiang chiah chuan he hla letlingtu pawh hian, ‘chhandamna ka chang ta’ a han tih hian a chhunzawmna tur hian sawi fiah zovin a hre lo a, ‘Halleluiah’ tih hi objective corelative ah a hmang ni maiin a lang a ni.
Halleluiah tih thumal hi ‘Lalpa chu fakin awm rawh se’ tih emaw, ‘ropui rawh se’ tihna tluk ni deuh maiin a lang a. Chuvang chuan, Pathian chhandamna a chan avanga a lawmna sawi thiam lovin Pathian a han fak ta daih hi a themthiamin a ropui ngawtin ka hria. Syllable inang chiah si ‘halleluiah’ ngaihtuah chhuah hi ‘how can it be’ lehlin nan chuan he hlaah kher kher hi chuan a țha tawk hlein ka hre tlat a. Mi mal ngaih dan mai phei chu a ni e.
