01/09/2026
ദേഷ്യം പകരുന്നത് തടയുക
മാനേജറുടെ മേശപ്പുറത്ത് എന്നും രാവിലെ ഒരു സുഗന്ധമുള്ള റോസാപ്പൂവ് വയ്ക്കുന്നത് ആ ഓഫീസിലെ പ്യൂണിന്റെ പതിവായിരുന്നു. ആ പൂവിന്റെ ഭംഗിയും സുഗന്ധവും മാനേജർക്ക് ഏറെ സന്തോഷം നൽകിയിരുന്നു. എന്നാൽ ഒരു ദിവസം തിരക്കുകൾക്കിടയിൽ പഴയ പൂവ് മാറ്റാൻ പ്യൂൺ മറന്നുപോയി. രണ്ടു ദിവസങ്ങൾക്കുശേഷം വാടിയ ആ പൂവ് അവിടെത്തന്നെ കിടന്നപ്പോൾ, ഓഫീസിലേക്ക് കയറിവന്ന ഒരു പ്രധാന ക്ലയന്റ് അവിടെ ദുർഗന്ധം വമിക്കുന്നതായി പരാതി പറഞ്ഞു.
ആ പ്രകോപനത്തിൽ മാനേജർ പ്യൂണിനോട് പൊട്ടിത്തെറിച്ചു; "ആരോട് ചോദിച്ചിട്ടാണ് നീ ഇവിടെ പൂവ് വയ്ക്കുന്നത്?" ഇത്രയും നാൾ അഭിനന്ദിച്ച അതേ മാനേജർ ഒരു ചെറിയ വീഴ്ചയുടെ പേരിൽ പ്യൂാണിനെ പരസ്യമായി അപമാനിച്ചു.
അപമാനഭാരവും കടുത്ത ദേഷ്യവുമായി വീട്ടിലെത്തിയ പ്യൂൺ ആ സങ്കടം തീർത്തത് തന്റെ ഭാര്യയോടാണ്. കാര്യമറിയാതെ വഴക്കു കേൾക്കേണ്ടിവന്ന ഭാര്യയുടെ മനസ്സ് അസ്വസ്ഥമായി. അവർ ആ ദേഷ്യം മുഴുവൻ തീർത്തത് തങ്ങളുടെ കുഞ്ഞുങ്ങളോടാണ്. അമ്മയുടെ അടിയും വഴക്കും ഏറ്റ മകൻ സങ്കടവും ദേഷ്യവും കാരണം തന്റെ കയ്യിലുണ്ടായിരുന്ന പന്ത് മുറ്റത്തേക്ക് ഒടുവിലത്തെ ശക്തിയിൽ എറിഞ്ഞു. നിർഭാഗ്യവശാൽ ആ പന്ത് ചെന്നിടിച്ചത് പാവം ഒരു പൂച്ചയുടെ തലയിലായിരുന്നു. തൽക്ഷണം ആ പൂച്ച ചത്തൊടുങ്ങുകയും ചെയ്തു.
ഇവിടെ ആരാണ് യഥാർത്ഥത്തിൽ ആ പൂച്ചയെ കൊന്നത്?
ഉപരിതലത്തിൽ നോക്കിയാൽ പന്തെറിഞ്ഞ മകനാണ് കുറ്റക്കാരൻ. എന്നാൽ ആ ശൃഖല പിന്നിലേക്ക് പരിശോധിച്ചാൽ, മാനേജറുടെയും, ക്ലയന്റേയും അസ്ഥാനത്തുള്ള ദേഷ്യമാണ് ഈ ദുരന്തങ്ങൾക്ക് മുഴുവൻ തുടക്കമിട്ടതെന്ന് കാണാം.
ജീവിതത്തിൽ നാം എപ്പോഴെങ്കിലും മറ്റുള്ളവരോട് അകാരണമായി ദേഷ്യപ്പെട്ടിട്ടുണ്ടോ? നമ്മുടെ ഈഗോയും ദേഷ്യവും പലപ്പോഴും നമ്മളറിയാതെ മറ്റൊരാളുടെമേൽ അടിച്ചേൽപ്പിക്കപ്പെടുന്നത് ഏറ്റവും നിസ്സഹായരായവരായിരിക്കും.
ഈ കഥ നൽകുന്ന പാഠം വളരെ വലുതാണ്. ജോലിസ്ഥലത്തെ സമ്മർദ്ദങ്ങളും ദേഷ്യവും സ്വന്തം കുടുംബത്തിലേക്കോ മറ്റുള്ളവരിലേക്കോ പകർന്നുനൽകാതിരിക്കുക. ഒരു നിമിഷത്തെ സംയമനക്കുറവ് വലിയ പ്രത്യാഘാതങ്ങൾ ഉണ്ടാക്കിയേക്കാം. ദേഷ്യത്തെ നിയന്ത്രിക്കാൻ പഠിക്കുക എന്നതാണ് ഏതൊരു വ്യക്തിയുടെയും വിജയത്തിന്റെയും സമാധാനത്തിന്റെയും അടിസ്ഥാനം.
#ദേഷ്യം
