27/03/2026
നാടകകൃത്തിന്റെ എഴുത്ത്..
എം. ഷാജി എഴുതുന്നു..
പി.എം. ആന്റണി, പി.ജെ. ആന്റണി എന്നീ രണ്ട് നാടക പ്രതിഭകളുടെ പേരിലുള്ള സംസ്ഥാന, ദേശീയ പുരസ്കാരങ്ങൾ നേടിയ നാടകരചനയാണ് ഭൗമസിദ്ധാന്തം. സിനിമയാക്കാമെന്നു പറഞ്ഞ് ചിലർ വന്നു. അരങ്ങിൽ കരുത്തുള്ളൊരു നാടകമായി അവതരിപ്പിക്കാമെന്നു പറഞ്ഞ് ചിലരെത്തി. സാങ്കേതിക പ്രശ്നങ്ങളിൽക്കുരുങ്ങി സിനിമ വൈകി. അവതരണത്തിലുണ്ടായേക്കാവുന്ന ചില വെല്ലുവിളികൾ കാരണം അരങ്ങിലെത്താനും വൈകി.
ഒടുവിൽ പ്രിയസഖാവ് സ്വപ്നേഷ് ബാബു നാടകം സംവിധാനം ചെയ്യാൻ തയ്യാറെടുത്ത് മുന്നോട്ടുവന്നു. എങ്ങനെയാവും സ്വപ്നേഷ് ഈ നാടകത്തെ അരങ്ങിലെത്തിക്കുക എന്ന ആകാംഷയോടെ കാത്തിരിപ്പാണ് ഞാൻ. കാരണം ഈ നാടകം മുന്നോട്ടുവെക്കുന്ന ' രാഷ്ട്രീയം ' അത്രയേറെ വലുതാണെന്ന് ഞാൻ വിശ്വസിക്കുന്നു. എന്റെ മാത്രം വിശ്വാസമല്ലത്. നാടകം വായിച്ചവർ, പുരസ്കാരം നൽകിയ വിധികർത്താക്കൾ ഒക്കെ പറഞ്ഞ കാര്യമാണ്. ഈ നാടകം എഴുതാൻ കഴിഞ്ഞതിൽ എനിക്ക് സന്തോഷമുണ്ട്. അഭിമാനമുണ്ട്. ഈ ലോകനാടകദിനത്തിൽ അകലെ സ്വപ്നേഷിന്റെ നാടകശാലയിൽ എന്റെ കഥാപാത്രങ്ങൾ വിളഞ്ഞ് തെളിഞ്ഞ് വരുന്നതും കാത്ത് ഞാനിരിക്കുന്നു.
