02/09/2026
【懷念】劉兆銘辭世，願安息！
劉兆銘離世
享年94歲
晚年受7種病痛纏身 深居簡出
曾受喪妻之痛
無心工作
“唔知佢而家喺天上東邊定西邊
最驚上到去，搵唔到佢”
去年公開露面
與黃秋生、黃子華、吳鎮宇、張達明「世紀飯聚」
資深演員，人稱Ming Sir的 #劉兆銘 今日離世，享年94歲。其好友丁羽證實死訊：「今晚6時離世。」
【怕與妻天堂各散東西】
晚年的Ming Sir經歷喪妻之痛，因此無心工作，更不時被發現獨坐公園仰望天空，思念愛妻。八年前，記者在舊公司年代訪問過Ming Sir，題為「與孤獨共舞」，訪問中他透露失去伴侶，始覺自己如此情深，更擔怕他日到天堂找不到對方，各散東西。「唔知佢而家喺天上東邊定西邊，最驚上到去，搵唔到佢。」願今天與愛妻天上重逢。
他心情沉鬱，加上受七種病痛困擾，近年深居簡出，需輪椅代步。前年生日亦在醫院度過。他最後一次公開露面，是去年與一眾後輩黃秋生、黃子華、吳鎮宇及張達明「世紀飯聚」。
【幽默看待衰殘】
3年前，《娛壹》跟他電話訪問，對於病情，他只謂︰「我做過手術，講唔晒咁多個病，亦唔想講有咩病，都係周身病痛咁啦。醫生要我執番好個身體，所以而家係休養生息時候。我以前係一位老頑童，但而家就係殘，唔夠能量做我想做嘅嘢，我就快92歲喇！」
身體衰殘，但當時Ming Sir腦筋依然靈活，還以幽默看待健康問題︰「我之前喺醫院住咗好耐，唔講得嘢又唔落得床，好多問題，醫院話︰『你唔可以再活動，你過晒籠(操勞)，一定要停頓下！』停乜嘢，就係手停口停囉，我哋做戲靠把口，即係口停；我跳舞，就係手停，所以口停手停，哈哈！ 」做過多次手術，卻無礙他的轉數。
【個腦仲好鍚我】
他感謝上天，周身病痛中，惟獨個腦沒生病，讓他繼續享受思考，與朋友交流。「唯一個腦未病，個腦仲好鍚我，唔似其他地方有病痛。因為其他地方用唔到，所以焗住我用腦多咗，而家啲能量就集中晒喺我個腦，我研究緊關唔關事，哈哈！」
【91歲仍想復出 挑戰難度將角色深化】
2017年他出山拍《賭城群英會》，跳至2020年客串ViuTV劇《歎息橋》及網劇《蝕日風暴》後，好戲的Ming Sir再無演出。而3年前的電話傾談，他坦言仍大戲癮。
「如果佢哋搵我拍戲，應該知道從來搵我都係一啲難度高，或吃力嘅角色。因為我會將好淺嘅嘢扭轉，或將之深化層次，呢個係我嘅興趣，所以搵我合作嘅人，可以係非常驚喜，又可以非常驚險，哈哈！」確實，要打動這位演藝瑰寶出鏡，必需讓他感到是一場高手過招，不論是導演抑或是角色對手
「搵得我，一定係好熟悉我呢個人。無論我而家係咪跛都會用我，角色不受行動影響。例如搵我演舞蹈家，我可以做舞蹈家嘅編導。正如唔係打餐包先叫大俠，風雲色變仍不動亦係大俠，所以除非導演係高手，懂得拍出深化嘅嘢，我先考慮。」
【首位為法國舞蹈家編舞的華人】
年輕時的劉兆銘為追夢，不惜隻身漂洋過海，於郵輪當倉底工人，也要到法國苦練舞蹈。嘗盡艱苦辛酸，終成大器，成為首位為法國舞蹈家編舞的華人，又曾於比利時國家芭蕾舞團中擔任舞者及編導，之後回港開設舞蹈學校培養年青舞蹈員。
【徐克賞識 拍首齣電影《蝶變》】
1979年，他獲得徐克導演的賞識，邀請參演首齣電影《蝶變》，正式踏進演藝圈，全情投入演員生涯。他演出劇集包括《千王群英會》的仇大千、《射鵰英雄傳》的南帝段智興、《新紮師兄》的算死草父親、《今生無悔》、《原振俠》、《法內情》等。他與徐克再合作的《倩女幽魂》，飾演的「千年樹姥」，更成為經典，無人超越。
【演藝玫寶 TVB後期被當草看待 憤而離巢】
可惜這位老戲骨，在TVB後期得不到尊重，他曾在訪問大呻被新一代幕後呼喝，將電視台的寶，當成草看待，「有啲後生導演話︰『叫你做咩就做咩！』鬧我唔夠專業，令我好失落。」越拍越無癮下，2011年完成《團圓》後憤而離巢。但這一次離場，反令他有機會接觸其他製作團隊，重尋拍攝樂趣，「佢哋畀到我一個啟動，我俾番佢一啲啟示，可以產生深化作用。」
【獲頒成就獎 表揚貢獻】
深愛藝術表演，在任何範圍Ming Sir都獲得肯定的成就。01年，他接受邀請，分別演出香港芭蕾舞團的《白蛇》及香港舞蹈團的《梁祝》，憑多年經驗他為兩齣舞台劇壓陣演出，好評如潮，並獲頒2002年香港舞蹈年獎。
2010年，他與鍾景輝、盧瑋鑾（小思）榮獲「香港藝術發展獎」的「傑出藝術貢獻獎，之後在TVB《萬千星輝頒獎典禮2013》亦獲頒「萬千光輝演藝人大獎」。2013年，他獲港府頒發「榮譽勳章」，以表揚他對演藝文化界的貢獻。
#劉兆銘逝世 #娛壹
