半日閑 At Booom

09/09/2019

剛過去的星期日, 我於港台節目【二台院線】同大家介紹嘅係 :

《不作虧心事》Do The Right Things (1989)

《不作虧心事》係Spike Lee 於1989年自篇自導自演嘅作品, 雖然唔係佢首部電影作品, 但憑住呢部戲獲選為第42屆康城影展正式競賽片、提名金棕櫚獎, Spike Lee呢位才華橫溢嘅黑人導演於全世界開始越嚟越多人認識, 其後電影更被美國電影學會評選為百年百大電影之一 、美國國家影片登記表亦將本片列入國家保存名單、美國國會圖書館更將本片列為文化上重要的作品, 可想而知本片絕對係殿堂級數 !

故事背景是在紐約布魯克林的一個黑人社區, 這區以黑人居民為大多數, 但同時亦居住咗少量黃種人及意大利裔嘅白人, 韓國人經營的雜貨店、意大利人Sal則開設一間披薩店, 而Spike Lee主演的Mookie，就係是呢間披薩店的外賣員.

呢個小社區仲有其他標誌性嘅街坊, 例如 : 黑人Radio Raheem去到邊都要抬住部手提Hi-Fi卡式機大聲 『焚機』 , 播放鼓吹黑人反抗白人的Hip Hop、有智力障礙嘅Smiley每日响街上重復向街坊兜售手繪的Malcolm•X和馬丁路德金嘅的圖片、一位自稱為市長嘅黑人老酒鬼及佢非常傾慕、每日都坐响窗邊望街嘅黑人老太太Mother Sister, 與及社區嘅廣播電台DJ -由Samuel L. Jackson飾演嘅Love Daddy.

就向夏天最炎熱的一日, 高溫將長久以來根深蒂固的種族不平等矛盾慢慢燃燒起來, 主角Mookie嘅朋友Buggin' Out幫襯薄餅店時, 見到牆上掛住的都是意裔美國名人嘅相片(例如阿爾帕仙奴、法蘭仙衲杜拉....等), 當中一個黑人代表人物都冇, 於是心生不忿，要求老闆Sal掛上馬丁路德甘嘅照片, 老闆當然彩佢有味, 於是, Buggin' Out就發動區內黑人杯葛Sal嘅披薩店.

然而, 除咗到邊都要抬住部手提Hi-Fi卡式機『焚機』嘅Radio Raheem外, 根本冇人理會Buggin' Out, 因為本身Sal於區內經營披薩店幾廿年, 與區內黑人關係並唔差, 甚至乎, 佢口口聲聲話當佢伙計黑人Mookie係親人看待, 又同自己個仔講區內黑人也食住佢嘅薄餅成長, 著佢哋唔好歧視黑人.

就向呢個高溫嘅晚上, Buggin' Out與Radio Raheem到薄餅店生事，,老闆Sal怒火中燒用棒球棍打爛了Radio Raheem部卡式機，繼而發展成兩幫人互打扭作一團,無幾耐, 警察趕到, 警員當然係一口咬定搞事嘅就係Buggin' Out與Radio Raheem啦, 與此同時, 一個白人警察基於對黑人嘅仇視, 本來出盡力從後用手臂箍實Radio Raheem諗住行私刑, 結果因此錯手把佢勒死.
羣眾因此開始失控並包圍Sal嘅披薩店, 縱使Radio Raheem係比白人警員勒死, 但大眾只覺得唔係Sal同佢發生爭執, 警察就唔會嚟, Radio Raheem就唔會死, 包圍Sal嘅憤怒羣眾越嚟越多, 呢個時候, 主角Mookie心生一計, 就係拾起街上的垃圾桶打爛披薩店嘅廚窗, 於是憤怒嘅羣眾就湧入店內大肆破壞, 自稱為市長嘅黑人老酒鬼一手拉走Sal及其兩名兒子離開現場, 逃過隨時被憤怒羣眾打死嘅一劫.

呢一場戲當年响美國引起激烈討論, 就係Mookie以垃圾桶打爛披薩店嘅廚窗, 引發羣眾湧入Sal嘅店內大肆破壞及縱火, 雖然係成功令羣眾轉移視線而俾Sal一家能夠逃命, 但係咪除此之外就冇其他和理非嘅處理方法呢 ? 係咪一定要以訴諸暴力嘅方法先可以解決 ? 難道咁都算Do The Right Thing ?

當然, 心水清嘅觀眾一早留意到Spike Lee向片中一早已俾咗答案大家, 就係有智力障礙嘅Smiley呢個角色, Smiley每日响街上重復向街坊兜售手繪的Malcolm•X和馬丁路德金嘅的圖片, 當中有一張正是馬丁路德金與Malcolm X充滿笑容嘅合照.

好多對美國黑人民權運動一知半解嘅人, 只會二元咁劃分馬丁路德金係和理非, 而Malcolm X就係鼓吹暴力, 佢哋忽視咗呢兩位60年代美國黑人民權運動領袖點樣係惺惺相惜, 兩位嘅主張係咪其實有合作嘅空間 ?

片尾亦引用咗馬丁路德金與Malcolm X分別講過有關其立場嘅一番話, 馬丁路德金話 :『以暴力嚟解決種族紛爭只會陷入仇恨漩渦而冤冤相報不知何時了.』 而Malcolm X則話 :『美國有好人亦有壞人, 壞人好多時就係掌握權力嘅一羣, 佢哋往往混用其權力去剝奪你我所需, 當面對呢D壞人而於必要時候用暴力來作自我防衞, 其實是一種智慧。』

《不作虧心事》Do The Right Things唔單止係一部探討種族主義問題嘅電影, 更啟發大家對羣眾、抗爭者處於和理非與暴力之間要有立體嘅思考, 唔好再停留於二元嘅思維.

呢部係1989年嘅電影, 但對30年後今日嘅香港人, 依然非常貼身 ! (辛比)

04/09/2019

《文化好東西》20190903

主持：司馬丁，辛比

司馬丁讀品推介：People Watching

本周好戲：Exit 極限逃生 / 噬逃險鱷

司馬丁讀品推介：People Watching / 本周好戲：Exit 極限逃生 / 噬逃險鱷 主持：司馬丁，辛比 有意「Booom水助養」嘅善長，現時有兩種方法: 1. 一次過打賞，金額自定 Paypal: http://paypal.me/BooomHK 2. 每月US$4(或更多) Patreon: htt...

03/09/2019

剛過去的星期日, 我於港台節目【二台院線】同大家介紹嘅係 : Perdita Durango《狂野雙辣》

《狂野雙辣》係西班牙導演狄拉傑西亞Alex De La Iglesia於1997年暑假打算進軍荷里活的西班牙英語片，所以除咗用《美麗末日》（Biutiful）嘅西班牙國寶級演員查維爾•巴頓Javier Bardem任男主角外，亦搵嚟美劇《人在江湖》(The Soprano)嘅男主角－實力派奸角詹姆斯•甘多費尼James Gandolfini擔正，上演一幕幕驚心動魄嘅正邪大追捕，更搵咗遊走Cult片及劇場演奏嘅音樂大師Simon Bosswell擔任配樂！

但好可惜，導演冇意識到當時係準備開始邁向响全球化嘅時代，主流文化產業嘅出品係相對地開始逐漸保守及催向政治正確，以往70年代嘅胡天胡帝性開放、80年代嘅放任血腥暴力作品於97年睇起嚟並唔係『Those were the days』，而係有冇搞錯、令人嘩言！

衛道之士把尺甚至俾7-80年代收得更緊，所以，當《狂野雙辣》於97年暑假進軍荷里活時，因為片中嘅不停站暴力血腥色情鏡頭被美國電檢處列為NC-17級別，17歲以下嘅青少年就算有成年人陪伴都唔能夠入場，亦因為咁嘅原因，電影於美國只能於獨立電影院作有限度嘅放映，從而令知名度及票房收入都非常不理想．

電影故事係講述女主角琵蒂塔於家姐一家大細被姐夫槍殺後，失意地响墨西哥浪盪，卻邂逅上既係殺人唔眨眼嘅銀行劫匪兼古惑仔、亦係從事於墳墓偷取屍體去肢解烹煮作為祭典嘅巫師羅密歐．佢哋一個掛住逝世嘅家姐、一個則對家鄉滿懷鄉愁，兩顆寂寞的心一撻即著，於墨西哥嘅荒漠公路上獸性大發，連環翻雲覆雨之時，同時亦綁架咗一對小情侶．

琵蒂塔與羅密歐綁架咗呢對小情侶並非為勒索贖金，而只係求過癮 !　沿路上佢哋不斷對小情侶虐待及性侵犯，任小情侶點樣求饒，琵蒂塔與羅密歐都冇半點憐憫，呢個時候，黑道老大山度士打算僱用羅米歐，希望佢可以將一整個貨櫃嘅人體胚胎及嬰兒屍體過境運送到拉斯維加斯一間地下藥廠，以作製造美容護膚品之用．

由於山度士出價非常吸引，羅密歐於是一口答應呢場生意，而由於要趕去送貨交易，琵蒂塔與羅密歐打算將貪玩而綁架返嚟嘅小情侶監生殺死做祭品當作了決事件．

就响羅密歐舉行邪教儀式準備生祭小情侶之際，昔日於劫案時被羅密歐起尾注嘅劫匪同黨殺到，打算搵羅密歐算帳，於混亂中展開了大廝殺，雖然羅密歐將仇家全部解決，但佢間屋及邪教祭壇於混亂中全被燒毀．

為咗趕上公路接貨，羅密歐、琵蒂塔帶住逃過一劫免成祭品嘅小情侶上路，於漫漫長路上，大家於言談間不經意道出自己過去嘅人生經歷，刀鋒槍口間，不經意地建立咗薄薄而微妙嘅感情．

同一時間，FBI癲狗探員杜安穿州過省終於追查到羅密歐嘅下落，並帶住調查被羅密歐綁架嘅小情侶嘅探員，諗住活捉羅密歐，就佢多年來殺人搶劫販毒等案件歸案．
　
就响羅密歐與琵蒂塔在公路接貨之際，癲狗探員杜安等人殺到，與羅密歐及偷運人體胚胎嘅走私犯發生大槍戰，最終羅密歐等人於槍林彈雨下逃出生天，但由於槍戰時貨櫃車嘅櫃門被打開及後流，導致當中唔少人體胚胎及嬰兒屍體打爛於公路上，就算最終羅密歐將貨櫃車揸離現場，當中亦損失慘重．

為此，山度士大怒，江湖上已傳出佢決定指派羅密歐的表弟於拉斯維加斯收櫃時唔單止唔找數俾羅密歐，更要將佢殺死以儆效尤，但重親情的羅密歐不信自己表弟會對自己下毒手，然而為免出亂子，逐留下琵蒂塔及小情侶於汽車公寓，自己與一名昔日拍檔趕赴到拉斯維加斯交收．

小情侶深知可能沒有明天，就盡情地於汽車旅館造愛，但囡囡卻不知自己的父親最終追查到自己的藏身點，但卻於佢地翻雲覆雨之時，就在汽車旅館對面不遠的油站被汽車輾斃．

而琵蒂塔知道羅密歐留下自己全因佢深知今次交易係張單程車票，一去冇回頭，，情急之下，佢決定將小情侶釋放，自己隻身前往拉斯維加斯勇救羅密歐，同一時間，癲狗探員杜安亦引領一眾FBI隊員到達拉斯維加斯嘅地下藥廠貨倉，準備與羅密歐決一死戰，究竟，琵蒂塔與羅密歐呢對狂野雙辣最終的命運會如何呢？　

本片故事其實係改編自Barry Gifford嘅小說《59° and Raining: The Story of Perdita Durango》，而故事中的女主角琵蒂塔Perdita，也曾經出現在大衛連治David Lynch嘅經典電影《野性的心》(Wild At Heart)之中，當然，《野性的心》亦係改編自Barry Gifford嘅同名小說．

Barry Gifford嘅小說向來係彷50年代美國Beat Generation（垮掉的一代）嘅風格，好重公路及爵士樂嘅味道，同50年代Beat Generation時期嘅小說一樣，佢嘅作品係充滿對宗教、靈性嘅探索，道盡人生嘅命運無常，對性、藥物及酒精嘅反應有著非常仔細嘅刻劃．

Barry Gifford寫呢個故事嘅時候，係參考咗一個墨西哥男子與一名德州的女子在兩國的邊境上瘋狂殺人嘅案件作為故事嘅藍本，真實事件嘅主人翁於1989年被拘捕，所以，《狂野雙辣》亦係Barry Gifford嘅小說中算係最血腥同暴力嘅作品．

當導演狄拉傑西亞改篇呢個故事成為電影時，並冇好似大衛連治咁以成人童話及迷離虛幻的手法處理，反而用咗《雌雄大盜》(Bonnie & Clyde)、《天生殺人狂》(Natural Born Killers)嘅直接暴力手法，比起奧利華史東Oliver Stone、甚至暴力美學大師森畢京柏Sam Peckinpah與及殘忍見稱嘅三池崇史嚟得更盡更癲更狂！
　
之但係一幕幕殺戮嘅背後，卻係一條條對觀眾有關生命與人生目的嘅質問，同時，一對狂野雙辣與小情侶亦演活於世事無常下嘅有今天沒有明天嘅末路愛情，其實暴烈得嚟又有幾分浪漫，如果自問唔怕極端暴力鏡頭嘅觀眾，我誠意推介呢部作品！(辛比)

26/08/2019

剛過去的星期日, 我於港台節目【二台院線】同大家介紹嘅係邵氏出品．司徒安編劇＋孫仲執導的作品：《沙膽英》.

70年代, 邵氏除咗出產武打片之外, 艷情片亦相當出名, 除咗古裝宮廷艷情片, 亦有《女集中營》之類嘅軍營性剝削作品, 因為當時意大利拍咗部以二戰集中營性剝削作為題材嘅作品《納粹荒淫史》(Salon Kitty), 响國際市場上大賣, 就連日本都有跟風出咗部女子監獄嘅性剝削片《女囚701》, 貴為東方荷里活嘅龍頭電影公司, 邵氏點可以唔追上潮流 ? 所以, 邵氏亦開始以社會罪案為題材, 然後再大灑鹽花, 成為唔少影迷津津樂道嘅『拳頭枕頭』式類型電影.

《沙膽英》就係『拳頭枕頭』類型嘅其中一種, 佢特別之處係並非以奇案作為題材, 而係直抄日本B及情色片大導演鈴木則文於1973年嘅《女番長》系列, 以當時嘅飛女首領為主角, 籍此大灑女人之間打爛女交Cat Fight、同男人打交時扯爛衫褲等暴力場面加鹽花鏡頭, 更有女同性戀嘅情慾畫面, 與此同時, 因為女主角『沙膽英』係江湖人士, 更索性Crossover埋邵氏經典黑社會電影《成記茶樓》嘅大哥成陳觀泰一同演出, 所以影迷係會睇得非常過癮 !

故事一開始, 講述工廠妹陳芳第一日到黃老闆嘅製衣裝上班, 點知俾女工友拉入女廁欲作性侵, 抱打不平嘅阿英出手打救阿芳, 並將女色狼工友打至落花流水, 阿英亦因此而成為阿芳及工友李細珠嘅偶像.

由於阿英知道阿芳長年受到後父性侵, 於是勸阿芳搬到自己屋企居住, 細珠亦都跟隨, 3人同居後, 細珠提到自己曾經係飛女並坐過監嘅身世, 佢同阿芳都先後分享自己有段黑暗過去, 但阿英就對自己的過去三緘其口隻字不題, 後來, 細珠提出3人結義金蘭.

3人結義成為姊妹後, 阿英同時亦教阿芳同細珠功夫, 一方面可以鍛鍊身體, 另一方面亦可保護自己, 而因為學識幾吓身手, 阿芳亦因此而將佢咸濕後父擊退.

阿英為人講義氣, 於工廠中幫新婚嘅窮女工籌錢租屋, 亦幫俾有錢仔搞大咗個肚嘅無知女工討回公道, 因而受工友尊重, 甚至開場時欲性侵阿芳嘅女色狼都知錯道歉.

但好景不常, 有日製衣廠突然鬧倒閉, 原因係黃老闆欠下大阿哥天價賭債, 阿英為免女工們失業, 就將事件攬上身, 於是佢嘅神秘過去逐因此公開.

原來, 阿英又名沙膽英, 全身都有紋身(當然畫面又借題發揮, 展露飾演沙膽英嘅女主角陳萍作全裸紋身嘅鏡頭), 本來因為父親爛賭不善照顧, 自幼就送到大阿哥嘅社團訓練成古惑女.
由於阿英眼見中小企老闆去到大阿哥嘅賭檔都因為中咗大阿哥嘅老千局而傾家蕩產, 不忍見其女兒因此流落街頭, 逐出術幫中小企老闆贏返身家, 因而激嬲大阿哥响佢發出追殺令, 阿英因此逃命去到成記茶樓搵大哥成相救.

此時大阿哥嘅找牙已殺到入成記茶樓, 與大哥成人馬大打出手, 當時暗戀阿英
嘅大阿哥手下劉偉苦求大哥成要保護阿英, 因此, 大哥成痛打至大阿哥落慌而途, 並介紹阿英到黃老闆嘅工廠打工, 洗心革面重新做人.

但如今, 阿英將黃老闆中大阿哥老千局一事攬上身, 又再面對無惡不作嘅大阿哥, 同時亦被大阿哥嘅手下送到屯門石礦場準備生葬, 於是好姊妹細珠立即到成記茶樓搵大哥成出手相助, 誓要將大阿哥嘅犯罪組織斬草除根.

就如之前所講, 本片有住極多嘅癢眼情色鏡頭, 例於沙膽英嘅全裸紋身嘅鏡頭、邵音音飾演嘅細珠同D飛仔去郊外遊山玩水時, 唔知點解會無喇喇唔著衫褲踩單車、工廠妹少鳳俾有錢仔趙亨利呃嗰陣點解有床唔瞓而走上個三尖八角嘅玻璃架上面演床上戲等等, 雖然用70年代嘅講法係眼睛吃盡冰淇淋, 但又感到非常騎呢, 因為製作人往往求畫面上要靚但又極唔符合現實邏輯.

片中的音樂係非常西片化, 起初我以為係用罐頭音樂啦, 點知完來係陳永煜負責配樂, 陳永煜即係我哋熟悉嘅陳勳奇 !

司徒安係本片嘅編劇, 佢响抄鈴木則文嘅《女番長》系列時, 諗到可以Crossover自己嘅江湖片《成記茶樓》同《大哥成》, 既有靚女癢眼畫面亦有邵氏式激烈致命嘅武打場面, 完美貫徹所謂『拳頭枕頭』類型片, 確實係鬼材 !

本片的導演孫仲, 當年亦替邵氏拍下唔少代表作, 例如《冷血十三鷹》、《人皮燈籠》與及《香港奇案》系列, 80年代亦於新藝城拍咗部經典嘅驚慄片 - 林青霞及梁家輝主演嘅 : 《奪命佳人》.

孫仲於本片處理結局中於屯門石礦場嘅大混戰係非常精彩, 佢用高低起伏嘅沙丘、木橋、大水氹、高直嘅石山...等做咗個競技刑場, 用盡所有場地特性及道具, 而且仲要係夜戲, 出嚟感覺係非常緊湊, 夠晒暴力好睇 ! (辛比)

19/08/2019

剛過去嘅星期日, 我於港台節目【二台院線】所推介的電影係 : 《暴火街頭》Hobo with a Shotgun (2011)

《暴火街頭》係2011年由加拿大導演Jason Eisener執導的作品, 原片為一部於2007年參加因應電影《喪屍索女機關槍》而舉辦嘅Grindhouse Trailer比賽嘅2分鐘短片, 所謂Grindhouse Trailer係源於60年代尾-80年代末於紐約42街一帶上映嘅B級恐怖、暴力、甚至係色情剝削嘅連環場電影, 點解叫Grindhouse呢?

其實係來自當年一間同樣叫Grindhouse嘅脫衣舞的戲院, 當脫衣舞嘅市場開始走下坡, 呢類戲院就改為以「入場費平」、專門以「獵奇、暴力、色情、剝削電影作連環場放映」去作招來, 同時更會安排脫衣舞作每場電影與電影之間的間場表演, 當中呢類電影院嘅龍頭隨咗有紐約嘅Grindhouse外,更有加州嘅Dragon Art Theatre.

由於呢類價廉嘅B級片通常都係蚊形製作公司攝製, 所以响菲林嘅儲存方面都不及大型荷里活製作公司咁有完善嘅片庫, 好多時都係將D 菲林Copy直接存放於呢D連環場嘅戲院放映室, 並互相循環運送作院綫放映, 所以呢D Grindhouse Movies有種特色, 就係電影嘅畫面會因受到唔妥善嘅保存而走色、充滿花痕、跳格甚至當中有缺片(Missing Real)嘅情況出現, 然而因為入場平, 而且一張票睇到笑, 所以觀眾都冇乜怨言, 而且仲變為呢類電影嘅情趣.

而《喪屍索女機關槍》正正係以呢類Grindhouse嘅剝削題材及呢種畫面走色、充滿花痕、跳格等嘅所謂特色作為賣點, 而因此愆生嘅Grindhouse Trailer短片比賽亦都係一樣. 而《暴火街頭》當年因為憑住2分鐘嘅充滿玩味視覺風格而獲獎, 繼而獲得大電影公司注資拍長片.

《暴火街頭》嘅故事係講述一名流浪漢搭貨運火車到希望鎮(Hope Town)諗住展開新生活, 點知發現歡迎光臨希望鎮(Hope Town)嘅標誌被改寫成「人渣鎮」（Scum Town）.

而鎮入面正係由黑社會老大Drake同佢個仔Slick以對居民剝削及虐待嘅手法所管治, 呢兩父子完全控制整個政府及執法部門, 响鎮入面為所欲為, 奴役居民作為其搵錢工具及玩具.

流浪漢一落火車就已經見到黑社會老大Drake將自己嘅弟弟Logan以叛徒為由於街上公開斬首處刑 !

流浪漢一心想展開新生活, 唔想多事, 所以對身邊所發生嘅呢D滅絕人性虐殺都扮作視而不見, 只想快快趣趣搵到少少錢去買一架剪草機, 去作為往後嘅為生工具.

但到咗晚上, 流浪漢發現, 原來黑社會老大Drake個仔阿Slick嘅黨羽係會專門捉D街上流浪漢去玩Street Fighter作欺凌, 而當主角流浪漢經過一間夜總會時, 發現阿Slick正欺凌一位叫Otis嘅後生仔, 而當時妓女Abby正苦苦哀求Slick放過Otis.

當然, Slick因為Abby嘅苦苦哀求而更殺氣騰騰, 當Slick正準備一槍殺死Otis時, 流浪漢終於忍唔住出手阻止, 並將Slick打暈送往警署. 但正如之前所講, Drake嘅黑社會集團係完全控制整個政府及執法部門, 警察先將流浪漢打至半死, 並响佢心口刻上『人渣』一字, 然後將佢掉去街頭垃圾站.

呢個時候, 妓女Abby出現, 並帶流浪漢返屋企療傷. 翌日, 流浪漢為咗要買剪草機作謀生工具, 就去咗做剝削片嘅男優, 响鏡頭前俾人言語及肉體羞辱, 甚至要生吞玻璃碎. 做完男優後, 傷痕累累嘅流浪漢就去到當舖諗住買剪草機開始謀生, 點知於當舖入面, 三名劫匪突然闖入並捉住一名太太及佢嘅BB作為人質 !

流浪漢即時拎起貨架上一把散彈槍去將三名劫匪解決, 之後, 佢索性取消買剪草機作謀生工具嘅念頭, 用辛苦搵嚟嘅錢去買呢把散彈槍, 因為佢意識到, 社會係要有正義、良知, 市民先有得安居樂業, 否則, 辛苦搵嚟嘅錢唔係要買驚風散, 都會比惡棍槍走.

流浪漢開始用散彈槍响鎮上替天行道, 殺人唔眨眼嘅劫匪、毒犯、控制妓女嘅皮條客、剝削片製作人、黑警甚至Drake嘅手下都難逃佢槍下.

一夜間, 主角流浪漢成為鎮上嘅正義之神, 電視新聞主播對佢讚揚、學校小朋友及家長都感激佢, 同時因為佢行出咗第一步, 感染社會上的市民勇敢對抗所有不公義, 但黑社會老大嘅父子集團因此而勃然大怒 !

為咗震攝民眾, 喪心病狂嘅父子集團先監生燒死校車上嘅學生, 繼而殺死新聞主播, 然後開始屠殺街上嘅無家可歸者, 同時亦响流氓們懸賞, 要將散彈槍流浪漢活足到父子集團前 !

流浪漢逃命其間重遇Abby, 並發現黑警欲對她施暴, 於是立即出手相求, 同時, 佢哋連結鎮上勇於反抗父子集團嘅市民, 面對群情洶湧, 父子集團逐派出有「瘟疫」（The Plague）之稱嘅鐵甲武裝部隊去殘暴鎮壓市民, 究竟, 「人渣鎮」最後能否光復, 還原返原本嘅「希望鎮」呢 ?

《暴火街頭》的視覺效果非常強烈, 亦都超級暴力, 將70年代Grindhouse類型片嘅血腥剝削內容都無極限放大, 不過導演話片中嘅唔少嘅暴力畫面處理其實係受到1991年嘅港產片《力王》嘅影響, 然而, 片中嘅暴力血腥同佢故事中嘅中心思想係有住超大嘅反差, 瘋狂荒謬嘅血腥殺戮背後, 正正係非常嚴肅咁質問觀眾 :『當法律抵觸我哋嘅道德及正義時, 我哋願意勇於犧牲自己去捍衛正確嘅社會價值及守護下一代嗎 ? 抑或係選擇不聞不問, 苟且偷生就算呢 ?』

於片中飾演流浪漢的係傳奇演員Rutger Hauer, 本為荷蘭演員嘅佢, 於1973年憑當年仍在荷蘭玩味地遊走於主流與Art Films之間嘅導演Paul Verhoeven(《鐵甲威龍》、《本能》)的情慾喜劇《Turkish Delights》出道, 迅速走紅並到荷里活發展, 代表作非常之多, 有《Blade Runner》(2020)、《Ladyhawke》(鷹狼傳奇)、《The Hitcher》(魔鬼司令)....等等, 更於Cyberpunk電玩遊戲《Observer》任遊戲主角, Rutger Hauer以75歲之齡於7月時在家鄉荷蘭離世. (辛比)

13/08/2019

《光榮》(Glory) (1989)

剛過去嘅周日, 我於港台節目【二台院線】同大家推介嘅電影係 :
《光榮》(Glory) (1989).

《最後武士》、《血鑽》導演愛德華史域Edward Zwick於1989年執導嘅作品, 由當時荷里活紅極一時的Baby Face小生馬修波特力Matthew Broderick、演技派的摩根費曼Morgan Freeman擔正演出, 同時, 丹素華盛頓亦憑本片獲得最奧斯卡最佳男配角殊榮, 電影面世至今已經30年, 唔少影評人甚至稱本片為影史上最佳嘅南北戰爭電影 !

故事背景係1861年4月～1865年4月之間的美國內戰, 於北方領導戰爭的是資産階級, 而於南方領導戰事的, 則是農莊嘅奴隸主. 南方人一心要將奴隸制度擴大到全國, 而北方的資産階級則志在要打敗南方，以便恢複全國的統一.

當時, 初出茅廬的北方上尉羅拔•蕭於一場戰役中受傷, 被由摩根費曼飾演的掘墓人約翰•羅林斯送入戰地醫院.

當羅拔回到波士頓後, 林肯總統剛簽署了解放黑人奴隸的宣言, 同時準備籌組第一個由非裔美國人所組成的軍團, 並請求羅拔成為這個新兵團的指揮官, 羅拔對此欣然接受.

羅拔招募了700多名來自低下層嘅黑人, 組成麻省第54兵團, 但當時外界都認為54並團只係聯邦政府做的所謂黑白共融嘅門面功夫, 係象徵意義遠大於實則意義, 因為, 聯邦政府根本沒有打算真係要用呢班黑人嚟打仗, 响嗰個時期, 黑人從來都只係做搬運類嘅粗重工作, 上前綫作戰呢種涉及國家榮耀的任務根本冇可能交俾黑人去擔任.

當然, 羅拔上尉及一班黑人並唔係咁諗, 佢哋個個都期待為聯邦政府出一分力, 羅拔讓黑人士兵都全按傳統正規軍的嚴格要求去刻苦訓練, 同時, 每位黑人士兵都希望通過自己的於戰場上為國效命從而拾回佢哋天生被剝奪嘅應有自由和尊嚴, 大家嘅目標都放在戰場的最前綫上面.

縱使林肯簽署了解放黑人奴隸宣言, 然而, 事實就係當時的政府內部、整個聯邦軍系統與及社會一樣對黑人充斥著歧視, 對於54兵團的軍用品配給要求, 例如槍械、以及最基本的軍服和軍鞋, 軍方系統都冇認真處理, 唔少黑人士兵於每日刻苦操練時, 由於冇合適嘅軍鞋去保護雙腳, 導致腳部嚴重受傷及受細菌感染而發炎.
更甚的係, 由於54兵團係黑人軍團, 聯邦軍對佢哋『恰得就恰』, 於支薪日突然只發出七成的薪水, 而白人的羅拔上尉就可領100%全薪, 刻意向黑人面前做成 :『你係黑人, 我哋白人就要食硬你 !』的剝削.

為此, 羅拔決定與旗下白人將士及黑人士兵都一齊拒領聯邦軍的薪水, 誓要聯邦軍對黑白種族都一視同仁為止, 而且更率領一眾士兵去軍需處，以全54兵團總動員的力量向軍需官施壓, 著令應該要依申請的指示將軍服、軍鞋及武器等正常配給到軍營.

同時, 由於對黑人歧視深種嘅聯邦軍從來只認為黑人士兵只配做粗重體力工作, 讓黑人上前綫為國效力根本係天方夜談, 所以於其他連隊中, 出現了聯邦軍指令要黑人士兵向南方平民作出搶劫, 同時更下令54兵團的黑人要對南方平民作出燒村等破壞民居財產及生命行為, 做成黑人士兵等於強盜和人渣的事實, 54兵團因此而士氣大受打擊 !

為咗撥亂反正, 羅拔以自己係波士頓名門望族的身分, 要脅放任黑人搶劫的聯邦軍指揮官要停止一切反人性行為, 否則會直接向林肯總統告他的御狀 !

經過種種難關, 54兵團終於可以走上前綫, 於南卡羅來納州的占士島登陸作戰中,取得第一次的勝利. 其後經過兩日兩夜不眠不休, 到達華格納堡, 與佐治•克羅克•準將會合, 進行第二次華格納堡攻防戰.

佢哋大家都知, 呢場戰役, 佢哋作為先鋒部隊將會死傷慘重, 但羅拔及整個54兵團都士氣激昂、願意接受呢個任務。

羅拔與士兵們一起衝鋒, 並攻到華格納堡牆下, 但就响羅拔攻上城牆一刻, 卻於三發子彈嘅致命攻擊下命喪於華格納堡城, 黑人士兵們見羅拔於槍林彈雨中倒下, 不但沒有畏死, 反而群起衝鋒, 拼死攻入呢個由1000名南軍作嚴密防守的華格納堡城牆.

最後, 54兵團死傷慘重, 半數以上軍人都為國捐軀, 自此, 美國人稱呼呢場戰役為光榮戰役. 原因係羅拔率領的54兵團讓當時被社會排擠、邊緣化的黑人重拾尊嚴與信念, 呢D都係當時社會認為黑人只係處於口腔期, 一切只顧利益之外的其他精神上的追求.

面對嚴重種族歧視、所有白人對佢哋嘅冷嘲熱諷，以及黑人本身對54兵團的存在意義及黑人於社會地位根本係冇可能作出任何革命性改變的種種質疑, 羅拔都一一將其克服及將固有白人價值觀嘗試扭轉.
响佢領導嘅54兵團入面, 羅拔處事公平公正、唯材是用、償罰分明、令黑人士兵感受到生存的尊嚴、有向上的職位階梯從而令黑人首次有向上爬的上進心, 令佢哋有活著的生活希望, 令一羣烏合之眾最終成為一支紀律嚴明、鬥志激昂的精銳部隊, 甚至更鞏固美國人的民族精神, 呢場光榮戰役的事跡, 同時亦係我哋香港社會於主權移交後呢20年來從來唔願意去學習嘅一課管治哲學.

12/08/2019

抗爭者面對暴力政權而作出更進取甚至極進取嘅升級，是大偉大戰巨人歌利亞，係大眾應該明白及尊敬嘅可歌可泣行為，至於黑警扮抗爭者挑起事端作嫁禍及企圖一網打盡，則乃人神共憤嘅鼠輩行為，大家不應否定抗爭者之前的進取行動，同時繼續核爆都不割蓆！（辛比）

07/08/2019

《Gap Gap Channel》20190807

今集主題 : 少理維穩老人 繼續時代革命

主持：辛比，京一，Ginny

《Gap Gap Channel》20190807 EP84 主持：辛比，京一，Ginny ================= 有意「Booom水助養」嘅善長，現時有兩種方法: 1. 一次過打賞，金額自定 Paypal: http://paypal.me/BooomHK 2. 每月US$4(或更多) Patreo...

30/07/2019

早幾日二刷《Once Upon A Time In Hollywood》先醒起Playboy Mansion係於1971年先賣俾Hugh Hefner, 所以1969年應該冇可能有All Star Party嘅出現，當然，片中安排Sharon Tate同Mama Cass一齊跳舞係睇到好High嘅！

另外，講到片中用咗好多歌去交代時代背景，其中我响節目都有提，當中一幕就係用咗一首The Circle Game去交代當時反越戰的學運思潮背景，首歌係出自有關『草莓宣言』嘅左膠學運電影《烈火暴潮》（The Strawberry Statement》，而用上Simon & Garfunkel的Mrs Robinson亦是因為電影《畢業生》的『少女唔鋤愛阿婆』嗰段女友老母性誘惑，從而交代當時的性開放兼享樂主義氣氛。

其實可以仲有大把嘢講，所以點解我話呢部戲睇100次都唔夠喉，兼且係QT執導以來最勁之作！

27/07/2019

今日於港台節目【二台院線】入面, 我向大家推介的電影係 : 《盧旺達酒店》( Hotel Rwanda )

本片是由《因父之名》編劇Terry George於2004年執導嘅作品，以盧旺達胡圖族飯店經理保羅於1994年盧旺達大屠殺中，如何挽救1268位圖西族和胡圖族難民嘅真實事件作為藍本嘅作品．

德國和比利時都先後殖民過盧旺達，當地有兩個主要民族：佔85%人口的「胡圖」族，和少數的「圖西」族，「胡圖」族主務農，族人普遍皮膚較黑，輪廓較扁平；後者畜牧，皮膚較白，輪廓亦較明顯。

比利時殖民政府於當時實行身份區隔政策，以皮膚較白的圖西族作為統治階級，在社會上鼓吹「圖西」族較優越的理論。同時造就成「圖西」人比較富裕，並响佢哋發出身份證明，並成為世襲的相對高階層族群，至於貧窮的「胡圖」族人，於身份區隔政策下，生活變得貧者越貧，根本一世都冇出路．

50年代開始，歐洲殖民勢力日漸式微，於是比利時在盧旺達舉行大選，胡圖族贏得九成議席而掌握政權，同時於1962年 7月1日宣布獨立。

「胡圖」族掌握政權後，佢哋並沒有反思自己多年來長期受壓迫，全因當年殖民政府嘅身份區隔政策所致，反而於掌握政權後，延襲身份區隔政策，反客為主將當年嘅「圖西」族人迫害．

二十五萬嘅圖西族人因此逃亡到鄰國，其後組成游擊隊，專門於午夜時分在盧安達邊境發動突擊政府軍的行動，於是被胡圖人稱為「蟑螂」．

直到1990年，「圖西」族人攻入盧旺達境內，當時執政的總統 (Juvénal Habyarimana)礙於形勢而與叛軍和談，但同時政府的不同派系開始林立，造成總統權力失衡，而於1994年4月，當盧旺達總統於搭飛機時被圖西游擊隊嘅砲彈擊中身亡，總統衛隊就立刻展開對「圖西蟑螂」的血腥報復。　

電影中嘅主角胡圖族飯店經理保羅眼見佢身邊嘅朋友個個穿起軍服，拿著軍方發的開山刀，闖入圖西族人嘅屋企殺人不眨眼，而廣播電台同時鼓動人民在社區消滅圖西人、再加上因為殖民地時嘅身份區隔政策所做成的胡圖族自身優越感，盧旺達一夜間變成圖西族人嘅血腥地獄．

由於保羅的太太正係圖西族人，正每分每秒都面對生命威脅，而酒店外嘅殘暴屠殺亦時刻連綿不絕，同時孤兒院亦送了一群圖西孤兒前來飯店，而其他圖西難民也紛紛借機擠進酒店，保羅逐打算等待著聯合國維和部隊前來了解情況並藉此同大家離開盧旺達。
當聯合國維和部隊抵達酒店時，先通知保羅，部隊原來只係嚟救走酒店內的非盧旺達人，同時亦將會減少當地嘅聯合國駐軍，面對聯合國嘅軟弱無能與及國際社會嘅袖手旁觀，保羅唯有自求多福，但呆坐於酒店內，太太及其他圖西難民遲早會被凶殘屠殺．

特別係保羅於外出補給食物和物資時，見到酒店外屍橫遍野、沿途一片血肉糢糊，同時透過物資交收時，先知原來國內已有一半圖西族人口已被屠殺，於是，保羅一方面要於有限時間將國內種族屠殺的血腥真相輸出國際社會尋求援助，另一方面又要用盡酒店機構內的任何僅有資源去巴結盧旺達的陸軍上將，希望盡量Buy Time拖延，即到外國政府介入．　

最終，保羅運用佢嘅急材、外交手腕等，最終保護了1268名圖西和胡圖族難民，而呢部《盧旺達酒店》可以講係非洲版的《舒特拉的名單》，故事主人翁保羅只係一個一心打好份工、不理政治嘅小市民，可惜最後係你唔搞政治，但政治搞你！

大屠殺嘅恐怖氛圍下，保羅經歷一次又一次嘅恐懼、絕望、無力及死亡邊緣，但就堅持撐起自己，於煉獄中展然人性光輝，為難民燃點希望之火，令人感動．

另外，片中對族群之間嘅對立如何演變成不可挽回的悲劇、西方文明社會間於所謂捍衛人道主義時表現嘅偽善、與及當中提到用作屠殺圖西族人嘅開山刀全部係中國製造，從而指出中國對於是次種族屠殺係應該要負上道德責任等等嘅情節，都非常令人深思！

睇見上星期元朗嘅白衫黑社會對普通市民嘅恐怖襲擊、甚至較早前沙田嘅大型商場可以中門大開俾速龍入去私人地方無差別追打市民，再回想起片中「圖西」族與「胡圖」族嘅對立，與及保羅運用酒店將難民救得一個得一個，嗰份重視任何一個生命嘅高尚情操，頓時鼻酸． (辛比)

26/07/2019

走入QT創作源頭的165分鐘，感受佢孕育9部作品的子宮入面如何温暖、濕潤而且充滿愛！（特別係結局嗰20分鐘！）

超級非常賞心悦目！

24/07/2019

成日講乜L嘢中計、中圈套，需知有啲Trap係根本要你硬食，問題係你有冇足夠準備當中咗後要以最快時間拆解啫！

又係時候Loop返2016年震撼英美但香港冇人理嘅BBC記錄片《Hypernormalisation》去警醒吓自己！（辛比）

HyperNormalisation is a 2016 BBC documentary by British filmmaker Adam Curtis. The film was released on 16 October 2016 The Power of Nightmares https://archi...