30/10/2025
ადამიანის ცხოვრება ჭადრაკს ჰგავს:
1. უნდა გაიაზრო, რა მიზნები გაქვს - მათ გარეშე საჭადრაკო პარტიაც და კაცის ცხოვრებაც უაზრო ხეტიალია;
2. მიზნის მისაღწევად უნდა გათვალო ალგორითმი - გადასადგმელ ნაბიჯთა თანმიმდევრობა;
3. უნდა ისწავლო რაციონალური აზროვნება - ემოციათა აყოლა დამარცხების ტოლფასია;
4. უნდა მიხვდე, რომ თითოეულ სვლას ანუ გადაწყვეტილებას განსაკუთრებული მნიშვნელობა აქვს - ერთმა არამართებულმა ნაბიჯმა შეიძლება ყველაფერი წაახდინოს;
5. უნდა ეძებო ჰარმონია და ბალანსი - თუ ვერ იპოვე, შექმნა. ზომიერებასა და წონასწორობას ალტერნატივა არ აქვს;
6. უნდა ეძებო, დაინახო და მიზნის მისაღწევად გამოიყენო ფიგურათა (ცხოვრებაში შენ გვერდით მყოფ ადამიანთა) გამაერთიანებელი ენერგია - კოირდინირებული მოქმედება გამარჯვების მნიშვნელოვანი საწინდარია;
7. უნდა ეცადო, ყოველ პოზიციაში (ცხოვრებისეულ სიტუაციასა თუ მომენტში) საუკეთესო სვლა მოძებნო (ან - ის მაინც, რომელიც ალგორითმის შესატყვისია);
8. უნდა გქონდეს მოქმედების მკაფიო გეგმა, რომლის გარეშე პრაქტიკულად შეუძლებელია წარმატების მიღწევა პარტიასა თუ ცხოვრებაში;
9. ახლის შექმნისას უნდა ითვალისწინებდე წარსულის გამოცდილებას - ცოდნა ძალაა;
10. უნდა იცოდე, რომ საჭადრაკო პარტიასა თუ ცხოვრებაში არსებობს გარდასახვის (პაიკის გაყვანის ანუ სტატუსის შეცვლის) შესაძლებლობაც და ხელოვნებაც -ის, რაც პოტენციურად შეიძლება მოხდეს, შესაძლოა არ განხორციელდეს, მაგრამ ფიქრის, გეგმისა და მოქმედების ნაწილია;
11. უნდა გესმოდეს და ითვალისწინებდე, რომ წარმატებული შეტევა კარგ დაცვას ეფუძნება - დაუფიქრებელი და უკანმოუხედავი მოქმედება დასჯადია;
12. უნდა იცოდე, რომ დროს კონტროლი სჭირდება, თორემ მოგებულ პოზიციაში (პრაქტიკულად გარდაუვალი გამარჯვებისას) წააგებ;
13. უნდა იცოდე, რომ თუ მოწინააღმდეგეს პატივს არ მიაგებ, დამარცხდები, რადგან ნებისმიერ ვითარებაში უყურადღებობა და ცხოვრების პარტნიორის აბუჩად აგდება დამღუპველია;
14. უნდა გახსოვდეს, რომ საწყისი იერარქია ცვალებადია და ბევრი ფიგურა ხანდახან ერთთან აგებს;
15. უნდა ითვალისწინებდე, რომ პოზიცია ყოველი სვლის შემდეგ არსებითად იცვლება და მის დინამიკურ შეფასებას გადამწყვეტი მნიშვნელობა აქვს;
16. უნდა შეგეძლოს დაინახო, რომ მუქარა ზოგჯერ აღემატება მის აღსრულებას;
17. უნდა აცნობიერებდე, რომ ყურადღების კონცენტრაცია განსაკუთრებულად მნიშვნელოვანია - მოწინააღმდეგის დაშამათებამდე ერთი სვლით ადრეც შეიძლება წააგო;
18. უნდა იცოდე, რომ მოგებული პოზიციის მოგებასაც ხელოვნება და პასუხისმგებლობა სჭირდება;
19. უნდა გახსოვდეს, რომ მნიშვნელოვანია ის, რაც მთელ დაფაზე ხდება და არა მხოლოდ მის ერთ მონაკვეთზე - ასევე შენი ცხოვრების ერთი შეხედვით უმნიშვნელო ეპიზოდმა შეიძლება დიდი გავლენა მოახდინოს გადამწყვეტ მომენტზე;
20. უნდა გაითვალისწინო, რომ რაც გინდა სრული უპირატესობა გქონდეს, პატი ყაიმია - არ გაანიავო შენი ყველა წინა მიღწევა დაუფიქრებელი ნაბიჯით.
21. უნდა გესმოდეს, რომ განვითარება და ინიციატივა წარმატების ნახევარია;
22. დაიმახსოვრე - ზოგჯერ რაღაც უნდა შესწირო, რომ უფრო მეტი და ღირებული მოიპოვო.
და ბოლოს:
მეფე (ანუ ფასეულობები, რომლებიც გვაცოცხლებენ) მთავარია.
