Konsertfelagið

09/02/2026

VIVALDI OG TÆR FÝRA ÁRSTÍÐIRNAR
"Eitt av kendastu tónleikaverkunum í heiminum nakrantíð
Tær fýra árstíðirnar eftir Antonio Vivaldi er eitt tað mest ikoniska verkið í tónleikasøguni – og av góðum orsøkum. Í fýra lívligum violinkonsertum endurgevur Vivaldi fuglasong, ódnarveður, summarhita og vetrarkulda so livandi, at tónleikurin framvegis kennist frískligur, fysiskur og nærverandi 300 ár seinni. Hetta kvøldið fært tú høvið at hoyra ein kamarbólk við føroyskum og útlendskum tónleikarum framføra alt verkið. Á odda stendur altjóða viðurkendi violinisturin Alissa Margulis, sum verður bæði solistur og fer at leiða ljómliðið.
Konsertin fer eisini at bjóða upp á Souvenir de Florence eftir Tjajkovski – eitt fjálgt, lagvakurt og ríkt kamarverk, sum tónaskaldið skrivaði eftir at hava vitjað Italia. Hetta eina kvøldið hittast Vivaldi og Tjajkovski, har norðurlendskir tónleikarar blása lív í tvær av størstu ferðafrásøgnunum í tónleikasøguni."

Eitt av kendastu tónleikaverkunum í heiminum nakrantíð

19/11/2025

MONIKA OG ÓLAVUR Í LEIRVÍK🤩
- sunnudagin 23 nov. kl 16:00

Monika Stauss Joensen, violin og Ólavur Jakobsen, gittar, fara at spæla konsert. Monika hevur spælt til og skipað fyri mongum tiltøkum og konsertum í Leirvík, har hon er búsitandi. Saman við Ólavi hevur hon spælt konsertir í Sveis, Týskalandi og verið á sera væleydnaðum konsertferðum í USA.

Tónleikurin á skrá hesaferð í Leirvík, er í stóran mun eftir tónaskaldið Niccolò Paganini. Paganini var ein framúr violinleikari, men hann var líka so einastandandi sum gittaristur. Hetta er lættur og virtuosur tónleikur úr einum tíðarskeiði í tónleikasøguni, har violinin og gittarin vóru høgt í metum. Tónleikurin er eyðkendur sum vælljómandi og í tí kenda bel canto forminum.
Annar tónleikur er eftir norska Ole Bull, sigoynaratónar eftir Vittorio Monti, fólksligur tónleikur úr Sveis, úr Føroyum, og sololag fyri gittara eftir kubanska tónaskaldið Leo Brouwer.

Eitt sindur annarleiðis enn vanligt, og tað er eisini eitt mál við konsertini. Bæði tónleikaliga, og vónandi er tað eisini meiri forvitnisligt hjá lurtarunum. Greitt verður frá um tónleikin, so upplivingin gerst betri og lættari.

Atgongumerki á kr. 100,- fáast til keyps við dyrnar. Konsertin er uttan steðg og eftir konsertina eru øll vælkomin til ein kaffimunn.

Konsertfelagið stuðlar konsertini.

Monika Stauss Joensen, violin, er úr Sveis. Giftist føroyskum manni og búsettist í Leirvík. Hon lók útbúgving á konservatorium í Winterthur, og hevur verið fastur fúsur í Føroya Symfoniorkestri øll árini. Hevur spælt ørgrynnu av konsertum víða um og hevur eisini virkað sum rithøvundi. Í hesum døgum kemur barnabók út hjá henni og Kristrfríð Tyril við heitinum “Bartal og Bjarni og vinir teirra”

Ólavur Jakobsen, gittar, er ættaður úr Havn, av tí kendu tónleika- og listafólkaættini av Kamarinum. Sum ungur tók hann útbúgving á konservatorium í Keypmannahavn og í París. Hann hevur verið víða um sum solistur og tónleikari, og er javnan á konserferð uttanlands. Hann var ein av stigtakarunum til útbúgvingina Musikkmiðnám, ið hann eisini skipaði í langt áramál. Hann er fastur limur í bólkinum Aldubáruni, ið hann sum ungur var við til at stovna.

Mynd: Kristfríð Tyril / momo

11/11/2025

KONSERT VIÐ MONIKU OG ÓLAVI 🎵
Konsert í Gallerínum á Stongunum sunnudagin 16. november kl. 16.00

Monika Stauss Joensen, violin og Ólavur Jakobsen, gittar, fara at spæla forvitnisliga konsert
Tónleikurin á skrá er í stóran mun eftir tónaskaldið Niccolò Paganini. Paganini var ein framúr violinleikari, men hann var líka so einastandandi sum gittaristur. Hetta er lættur og virtuosur tónleikur úr einum tíðarskeiði í tónleikasøguni, har violinin og gittarin vóru høgt í metum.
Annar tónleikur er eftir norska Ole Bull, sigoynaratónar eftir Vittorio Monti, fólksligur tónleikur úr Sveis, úr Føroyum, og sololag fyri gittara eftir kubanska tónaskaldið Leo Brouwer.

Eitt sindur annarleiðis enn vanligt, og tað er eisini eitt mál við konsertini. Bæði tónleikaliga, og vónandi er tað eisini meiri forvitnisligt hjá lurtarunum. Greitt verður frá um tónleikin, so upplivingin gerst betri og lættari.

Konsertin varir slakan tíma - uttan steðg. Høvið býðst at skoða framsýningina við málningum hjá Regin Jørgensen eftir konsertina.
Konsertin er ókeypis. Øll eru hjartaliga vælkomin.

03/10/2025

EYSTUROYAR STRÙKITRIO Á SELATRAÐ 🤩🎻
Komandi sunnudag 5 oktober kl 15 verður konsert við Eysturoyar strúkitrio í Selatraðar kirkju.
Á skránni er m.a. yndislig strúkitrio eftir tónaskaldinum Sergei Taneyev, ið m.a. var næmingur hjá navnframa Piotr Tchaikovski.
Tónleikarir í Eysturoyar strúkitrio eru: Monika Stauss Joensen - violin, Tóri R. Jacobsen - cello og Jona Højgaard - bratsj.
Konsertin er ókeypis

19/09/2025

STRADIVARIUS Í LØKSHØLL OG HÁTÙN 🎻🎵🎹
Vit gleða okkum til at hoyra teir einastandandi tónleikarar, violinleikarin Antal Zalai og klaverleikarin Adam Heron, í Hátún og í Løkshøll hetta vikuskiftið.

Hesir tónleikarir eru virtuosar í orðsins sanna týdningi, og saman fara teir at framføra eina spennandi skrá, ið spennir sera víða - frá yndisligum klassiskum verkum til villan sigoynaratónleik.

Leygardagin 20 sept. kl 15 í Hátún, Tórshavnar Musikkskúli - atgongumerki á 100 kr fáast við dyrnar.

Sunnudagin 21 sept. kl 15 í Løkshøll - atgongumerki á 100 kr kunnu keypast á loksholl.fo og atgongumerki.fo

Næmingar fáa avsláttur.

Um tónleikararnar:
Antal Zalai er føddur í Budapest í eini romafamilju av tónleikarum. Antal starvast dagliga sum violinprofessari á konservatoriunum í Brússel og spælir á eina Stradivarius violin frá 1733.
Afturat konsertvirkseminum hevur Zalai fingið ein stóran altjóða fjepparaskara á YouTube, har framførslur hansara av m.a. øllum 24 caprisunum hjá Paganini – eru sæddar fleiri milliónir ferðir.

Adam Heron er av nigerianskum-filippinskum uppruna og búsitandi í Onglandi. Hann gjørdist kendur sum finalistur í BBC Young Musician kappingini í 2018 og vann í 2020 Harriet Cohen Bach Prize.
Umframt at spæla klaver er Adam eisini tónaskald og dirigentur. Hann hevur spælt við orkestrum sum Chineke! Orchestra og við tónleikarum sum Chi-chi Nwanoku CBE og Amy Dickson. Hann hevur framført á mongum stórum pallum, frá Wigmore Hall í London til National Centre for the Performing Arts í Mumbai.

03/05/2025

Aðalfundur verður 6/5 kl 1830 á musikkskúlanum. Skrá smb viðtøkum.

Send a message to learn more

06/11/2024

MÓTSETNINGARNIR CESAR FRANCK OG FRANCIS POULENC
Cesar Franck skrivaði sína violinsonatu í 1886 sum brúdleypsgávu til violinúrmælingin Eugene Ysaye

Sama morgun sum brúdleypið skuldi standa, fær Ysaye hesa sjáldsomu gávu. Eftir eina skjóta venjing bleiv sonatan framførd fyri brúdleypsgestunum. Hetta má sigast at vera eitt bragd, tí hóast sonatan er avbera vøkur og innilig, er hon eisini tiltikin torfør at spæla.

Hendan kensluborna sonata varð væl mótikin av brúdleypsgestunum og av eftirtíðini, tí í dag telist hon millum kendastu mest framførdu verkunum innan klassiskan kamartónleik yvirhøvur.

Heilt øðrvísi er upprunin til sonatuna eftir landsmanni Cesar Francks, Francis Poulenc. Poulenc helt yvirhøvur lítið um strúkaraljóðføri og serliga einsamalla violinin fall í ringa jørð hjá tónaskaldinum. Tað var eftir áhaldandi áheitanir frá violinleikarum Ginette Neveu at takka, at sonatan bleiv skrivað. Endaliga verkið var í minsta lagi fjórða royndin hjá Poulenc at skriva eina violinsonatu.

Tá kladdan til sonatuna var liðug, skrivaði Poulenc soleiðis um verkið: ”Monstrið er liðugt. Eg fari at reinskrivað. Eg haldi, at verkið ikki er vánaligt, og í øllum førum verður tað heilt øðrvísi enn evindaligu ”violin-melodi-linjurnar” í fronskum sonatum frá 19 øld….violinin sum primadonna yvir klaver trýklangum fær meg at klíggja.

Tað er ikki óhugsandi, at Poulenc her hevur millum annað havt sonatuna hjá Cesar Franck í huga.

HÓSKVØLD 7 NOV, KL 20 í Mentanarhúsinum í Fuglafirði
LEYGARDAG 9 NOV, KL 15 í Aulini í Finsen

06/11/2024

NORSKA SONATAN HJÀ EDVARD GRIEG
Edvard Grieg skrivaði tríggjar violinsonatur í árunum 1865-1887. Hesi verk eru skrivaði í einum tjóðskaparligum tónamáli við íblástri úr norskum fólkasangi. Hendan seinna sonata varð skrivað í 1867 og ognað norska violinistinum Johan Svendsen.

Tónaskaldið Gerhard Schjelderup, ið var samtíðarmaður Griegs lýsti hesa sonatu sum ”eina gávu til heimin frá einum manni, ið kennir til kuldaskjálvta í køldum náttarmjørka”. Schjelderup helt eisni at tragiska huglagið í verkinum gjørdi hesa sonatu enn meira norska enn tann fyrsta violinsonatan. Hann tók til, at ”eitt Noreg uttan tragediu er ikki eitt fullfíggjað Noreg”.

Tað man hava verið nakað um hesa lýsing, tí tá Grieg vísti lærara sínum, dananum Niels Gade, hesa sonatu, vóru skoðsmálini, at sonatan var alt ov ”norsk”. Gade helt, at næsta sonatan átti at verið minni norsk, men hesum var tjóðskaparmaðurin Grieg als ikki samdur í og helt fyri, at hann fór at skriva eina uppaftur meira norska sonatu eina aðru ferð.

HÓSKVØLD 7 NOV, KL 20 í Mentanarhúsinum í Fuglafirði
https://www.atgongumerki.fo/2770618/farbeduo-v-samali-petersen-violin-og-og-axel-freier-klaver-ur-belgia

LEYGARDAG 9 NOV, KL 15 í Aulini í Finsen
https://www.atgongumerki.fo/2768380/konsert-vid-farbeduo-v-samali-petersen-og-axel-freier

05/11/2024

KONSERTIR VIÐ FarBeDuo
Hóskvøldið 7 nov og leygardagin 9 nov trínur FarBeDuo á pall við einari veldugari skrá av sonatum fyri klaver og violin.

Duoin er mannað av klaverleikaranum Alex Freier úr Belgia og okkara egna violinleikara Sámali Petersen, ið vit eisini kenna úr Aldubáruni og sum konsertmeistara í Føroya Symfoniorkestri.

Saman fara teir at framføra tríggjar sonatur: Sonatu nr 2 eftir Edvard Grieg (1867), sonatuna eftir Cesar Franck (1886) og sonatuna eftir Francis Poulenc (1943). Tvær tær fyrstu eru skrivaðar í háromantiska tíðarskeiðnum og síðsta er skrivað og framførd í París undir seinna veraldarbardaga.

Verið vælkomin á konsert við nøkrum av stórverkunum innan klassiskan kamartónleik!

HÓSKVØLD 7 NOV, KL 20 í Mentanarhúsinum í Fuglafirði (https://fb.me/e/7oW8udYWx)

LEYGARDAG 9 NOV, KL 15 í Aulini í Finsen (konsert við FarBeDuo v/ Sámali Petersen og Axel Freier)

27/07/2024

DOMINO Í HAVNAR KIRKJU
Eftir at hava spælt konsertir í samband við Summartónar festivalin, spældi Domino Ensemblið seinnu og síðstu konsert á Føroyaferð teirra.
Konsertin varð hildin í Havnar kirkju við somu skrá sum í Fuglafjarða kirkju dagin fyri. Aftur hesaferð spældi bólkurin sannførandi og vøkrum klangi. Tá konsertin var komin at enda og eftir nógvum lógvabresti spældi bólkurin tvey eykanummur. Fyrra var ein vøkur útseting av sanginum “Jarðareygað” eftir Kára Bæk, ið eisini hevði gjørt nýggju útsetingina. Seinna eykalagið var ein livlig og væl svingandi útseting av fólkalagnum “Hønsefødder og gulerødder”.

Konsertfelagið takkar Domino Ensemble hjartaliga fyri góðu konsertupplivingarnar á hesum sinni.