29/10/2021
Woyyashee!!
Kan nama ajaa'ibuu Kan abbaaf haadhashee
Akkami beekanii gaafa dhalootashee
Haalaan hubatanii keessoo namummaashee
Sirri xiinxalanii moggaasa maqaashee
Maatii hunda keessaa jedhaniin woyyashee!
Beekeera worrishee sirriidha woyyashee!
Hayyuudha worrishee dhugaadha woyyashee!!
Halaalaa ilaaleen hawwe bareedashee
Garuu maalan godhaa ijoollummaa ishee
Akka mucaa dhabaa yoo boonsan worrishee
Garaan na bulluqaa yoo jedhan woyyashee
Beekeera worrishee dhugaadha woyyashee!!
Waan bareedinashee Kam himee Kam dhiisaa
Hundi uumamnishee nama gammachiisaa
Hundumarraa caalaa dheerini rifeensaa
Maramee gad-jigee duubeesheera ciisaa
Mi'aan sagaleeshee yoo ba'u ishee keessaa
Gurra nama tolaa onnee gammachiisaa
Gorora akka dammaa afaan ishee keessaa
Takkum xuuxatanii duunaan maal abbaasaa
Beekeera worrishee sirriidha woyyashee!!
Gaaf bareedina hiruu rabbiin siif dabarsee
Irra kee bareechee keessaa Kee faayessee
Haala Amala keetiin hunda si caalchisee
Sararee sararee bocee Wal qixxeessee
Lalistuu abaaboo birraa si fakkeessee Jaalalaan si guutee si uume midhaagsee
Hortee lafahaa guuttu haatummaan si deessee
Beekeera worrishee sirriidha woyyashee!!
Burqituu jaalalaa fakkeenya dubaraa
Tolchee uume rabbiin waa hin hambifne irraa
Jaalalatu maddaa hunda dhagna isheerraa
Kuullee ija kuulaa tan mudhii migiraa
Eerga gaaf si argee qalbiin Koo si birraa
Fala naaf ta'i mee siin booji'ameeraa
Beekeera worrishee sirriidha woyyashee!!
Ija jaalalaatiin lash gootee na laaltee
Xiyya jaalalashee narraa dhangalaaftee
Harka Koo na hiitee miila Koo sakaaltee
Eboo jaalalaatiin onnee Koo woraantee
Bareedduun wollaggaa Jaalalaan na mootee
Ijji Koo haa jaamtuu tan gaafas si laaltee
Beekeera worrishee sirriidha woyyashee!!
Bareeda wollaggaa shaggee dambi doolloo
Tan daangaa suudaanii yaantala amfilloo
Osuma si yaaduu bar hir'adhe kiiloo
An har'as si jaallaa badii kootu maaloo
Beekeera worrishee sirriidha woyyashee!
Hayyuudha worrishee dhugaadha woyyashee!!
Osuman milkaa'ee wollagga soddoomee
Jaalala woyyashee osuu badhaafamee
Gaara abbaa seenaa irraan qaxxaamuree
Naqamteefii gimbii laaleen keessaa taree
Mukkeen bosonashee Sana keessaa jooree
Ukkamsaaf hancootee takka osu dhandhamee
Hawwiin Koo naaf guutee an gaafa sooromee
Beekeera worrishee sirriidha woyyashee!
Hayyuudha worrishee dhugaadha woyyashee!!
Jiraadheetiin argee jaaladhe biyyashee
Laallamee hin quufamuu mukkeen bosonashe
woraabbamee hin dhumu worqeefii bunnishee
Hayyuu hedduu qabdii abshaala namnishee
Bareennis hedduudhaa tan akka woyyashee
Dhugaadha woyyashee sirriidha woyyashee
Beekeera worrishee dhugaadha woyyashee!!
Like, share, fii comentii keessaaniif guddaa galatoomaa.
