26/02/2026
Boas xentiña...
¡¡Comunicado oficial!!!
Despois de 20 anos facendo soar a música tradicional polos torreiros,
polas festas e polos corazóns de milleiros de persoas, chega o
momento de facer unha pausa. A Requinta da Laxeira baixará dos
escenarios durante un tempo para traballar de portas cara a dentro.
Facemos un pequeno alto no camiño para coller forzas, reorganizarnos
e preparar o noso regreso con calma. Foron dúas décadas cheas de
encontros, risas, quilómetros, emocións e momentos inesquecibles, e
queremos asegurarnos de que a nosa volta estea á altura de todo o
que levamos vivido.
Queremos agradecer de corazón a todas as persoas que nos
acompañastes neste camiño: ex-integrantes, comisións de festas,
asociacións, concellos, compañeiros e compañeiras da música,
amizades, familias e, sobre todo, ao público, que sempre nos recibiu
cos brazos abertos e co sorriso posto. A música tradicional segue viva
en Sarandón, na Asociación Cultural San Campio, onde continuaremos
traballando para manter e transmitir a nosa tradición, con ilusión
renovada e as mesmas ganas de sempre.
Grazas por cada aplauso, cada baile e cada momento compartido. Isto
non é un adeus, senón un ata logo.
Ata a próxima foliada,
A Requinta da Laxeira ❤
