علي باب السيما

علي باب السيما أنا حسام حسن .. وده مكان أفكاري المكتوبة أو المصورة تحت عنوان "علي باب السيما"

هتلاقي إن في التسعينات .. أعلي عشرين فيلم حققوا ربح في السنة .. منهم اتنين بس مبنيين على أفكار غير أصلية .. وفي 2008 بقو...
30/08/2024

هتلاقي إن في التسعينات .. أعلي عشرين فيلم حققوا ربح في السنة .. منهم اتنين بس مبنيين على أفكار غير أصلية .. وفي 2008 بقوا عشرة من أصل عشرين ..وبعد تأسيس اوتوستراد 24 بسنة .. وصلوا ل 14 فيلم .. وعشان كل اللي فات ده دانيال قال "الأفلام لم تعد تبدو مثيرة بالنسبة لنا كما كانت عندما بدأنا حياتنا المهنية وكان هذا بمثابة إشارة إلى فرصة".

امبراطورية A24 .. طوق نجاة الإبداع المستقل من بحر التكرار في هوليوود .. قريباً .....

House of the dragon SE2 .. ضحايا نون النسوةوأخيراً خلص الموسم التاني من بيت أو أل التنين - سميه زي ماتحب- وعدي كمان أكتر...
14/08/2024

House of the dragon SE2 .. ضحايا نون النسوة

وأخيراً خلص الموسم التاني من بيت أو أل التنين - سميه زي ماتحب- وعدي كمان أكتر من أسبوع علي نهايته عشان الواحد يتكلم براحته وفي نفس الوقت يكون قادر يجمع أفكار أو صور ورأي واضح .. من غير الحماس المصاحب للمشاهدة أو الغضب .. والشعورين اعتقد لازموني أنا وناس كتير أثناء تجربة الموسم بالكامل

المسلسل ده بايع نفسه كده كده من قبل حتي ما ينتشر منه صورة واحدة لأسباب كلنا عارفينها .. لكن لما نفتكر مع بعض اللي نجحه لما نزل هي الشخصيات .. اللي تحولوا لطرفين نزاع أقوياء في نهاية الموسم الاول بعد موت الشخصية الأفضل وهي الملك فيسيريس ..
مجلس السود وعلي رأسهم رينيرا ودايمون ورينيس وكورليس .. ومجلس الخضر بقيادة اوتوهايتاور وأليسنت وأيموند ولاريس وإلخ .. ومجلس الخضر بالذات كان متنوع اكتر .. لإن فيه متخصص الهمسات وفيه الطامع واللي مش واضح نيته وقائد الحرب والعقل المدبر وهكذا .. لكن مجلس رينيرا بإستثناء اللي ذكرتهم في أربعة أو خمسة أنا معرفش اسمائهم لحد دلوقتي وهنجيلهم تاني ..

وأظن السبب في تراجع الموسم ده اللي واضح ومتفق عليه من الكل .. هي قرارات الكتابة الغلط اللي جات علي لسان وحساب طباع الشخصيات اللي اترسمت .. ومش بس جات مرة واحدة وبعدها خدنا مكافأة أو نسيناها .. ده الموضوع استمر للنهاية ..
أول حلقتين كانوا كويسين جداً .. وكنت شاري أنهم تمهيدات لأحداث كبيرة .. وده علي الرغم من إنهم يتعارضوا مع آخر لقطة لرينيرا في الموسم الأول "التحول لنية الانتقام بلا رجعة" .. وعلي الرغم كمان من حدوثهم في أسبوع بس تقريباً من نهاية أحداث الموسم الأول وده مش وقت كافي لحدوث تغييرات كبيرة .. بس كنت شاري
بس بعدها بدايةً من الاستغناء عن دايمون واوتوهايتاور ورينيس في مركزين الصراع ابتدت المراجيح

دايمون غرق في بحر الهلاوس .. مش بياخد قرار ومش بيقدم حاجة جديدة وموقفه مش مفهوم وحتي تحوله المفاجئ في النهاية هو وسايمون سترونج غير مبرر تماماً .. وإن كانت نوايا سايمون وأليس الخفية لحد اخر لحظة شئ مثير .. بس تنتظر من وراها التواءة اكبر من كده .. لإن المسلسل نفخ قدرهم كتييييير قوي ثم فرقعوا عادي ولا كإن في حاجة دول ناس منتهي الاحترام .. فهل دايمون كان محتاج موسم كامل نعيد فيه اكتشاف نواياه ناحية رينيرا وأحقيتها ؟

رينيرا نفسها .. منتهي الهدوء والصبر والحكمة رغم ضغط كل الظروف والأشخاص .. وخرق لكل عوامل الزمن والمكان .. بتروح أي مكان وبترجع في الزمن اللي السيناريست والمخرج عايزينه .. ممكن تروح كينجز لاندينج من باب المقصورة الرئيسية ومحدش يشتمها حتي في مشهد .. وممكن تختفي حلقة كاملة عشان ترجع ومجلسها كله بيطعن في حكمها وقوتها

لاريس .. اللي قضي علي هارينهول .. وعيلته .. وشبكة ميساريا .. وعارف كل اللي بيحصل في كل مكان .. هو هو لاريس اللي أول ما إيموند هوشه في المجلس خاف وقرر يروح يرعي الغنم في آخر الدنيا عشان مش "ضامن" و "مش عارف" إيموند والحرب ممكن يعملوا فيه ايه !!!! وهنخسره تقريباً في اللي جاي

ميساريا نفسها .. منفية ومنسية ومدمرة وملهاش حد .. ولكن برضو تقدر تكون دراع رينيرا في الريد كيب .. وتقدر تدخلها وتخرجها .. وتقدر تنشر أخبار وتحرك الناس

والمجلس بتاع رينييرا عبارة عن كام واحد كل ماهي تكح يقولوا لها إنتي واحدة ست متفهميش في القيادة والسيف والحرب .. طب حد هيعمل حاجة ؟ .. هننقلب ؟ .. هنفكر من وراها عشان المصلحة ؟ .. هنتبعها ونسكت ؟ .. هنختبرها ؟ .. مفيش .. واحد بس واجهها وخد بالقلم سكت ورجع قعد مكانه .. حرفياً مش افيه .. وبتمثيل سئ وحضورهم ضعيف جداً والحوار نفسه كان مكرر ومش ملفت .. ده غير الراجل اللي راح لدايمون وقاله خد شارة الكابتن وهات الجول وكلنا وراك .. وأول ما شاف رينيرا جاية رجع يدافع عادي .. وبرضو معرفش إسمه

أليسنت .. اكتر شخصية رمادية من الموسم الأول .. كانت شخصية معقدة وصعب تحدد موقفك منها .. فجأة تتحول لشيطان ضعيف تخلت عن قناعاتها ورداء الشرف ..ولما تمت ازاحتها من المجلس قررت تبحث عن الخلاص والحرية والتكفير عن الذنب وكمان حقيقة أحقية ابنها !!! .. وبالتالي أي شكوك ناحية أحقية الخضر زالت وأصبح السود هما جانب الحق .. رغم أني شايف كده .. ونفسي في ده يحصل .. ولكن سيبني أنا أكتشف مين الأحق زي ماكننا متفقين .. متفرضش عليا طرف علي حساب طرف

بروز الستات في كل حاجة وفي كل مكان علي حساب الرجال .. لازم واحدة ست هي اللي تضحي .. واحدة ست اللي بتشوف الحكمة .. واحدة ست بتخطط .. واحدة ست بتقود أسطول .. واحدة ست بتوجه اهم الرجالة وبتوعيه .. وأظن محدش هيعترض لو ده حصل بشوية منطق وتفكير .. ولكنه حصل وأدي لكل ما سبق !!

ورغم كده في ايجابيات زي تطور شخصية ايجون ورحلته اللي مليانة تغيرات منطقية .. رقصة التنانين .. خط كريستون كول وأخو أليسنت كشفلنا شخصية كريستون كول واحدة واحدة وقد ايه هو نادم ومحب ومجرد فارس قوي ومبيتمتعش بأي دهاء بعيد عن مساحة المعارك .. عودة دايمون واوتو للملعب في الموسم التالت .. توضيح بعض النقط في شخصية هيلينا عن قدراتها في التنبؤ وحقيقة شخصيتها .. تحرك كل الاطراف نحو الحرب بلا رجعة .. وجود لاعبين جدد في مجلس رينيرا زي هيو وأولف وآدم .. مع احتمالية انقلاب داخلي (أنا اتمناه) .. سير تايلاند لانيستر وعودته وإمكانية تحوله هو كمان لإنه دلوقتي يملك القوة والسيطرة علي أشياء أكبر .. وأخيراً رينيرا تقلع عباءة سيف زاهر وتتحرك بنية الحرب والانتصار

الموسم التاني حلو لو كانت أحداثه في أربع حلقات بس .. وكان برضو هيبقي افضل لو كننا ملينا الأربع حلقات التانيين بإننا شوفنا حاجات كتير بدل ما تتحكي علي لسان الأبطال .. وأدينا هننتظر تاني سنتين تقريباً عشان نشوف الوعود الملحمية هتتحقق ولا لا وأثر الإنقسامات والقرارات الجديدة علي الكل .. ونتمني الموسم التالت يتحرر من قيود وأفكار خدت من رصيد المسلسل كتير .. ونتعشم خير في ذكائهم

Address

Alexandria

Website

Alerts

Be the first to know and let us send you an email when علي باب السيما posts news and promotions. Your email address will not be used for any other purpose, and you can unsubscribe at any time.

Shortcuts

Share

Category