28/07/2026
جلد النمر او لسان الافعى
sansevieria trifasciata
من النباتات اللى ممكن تستخدمها و انت مبتدأ في مجال النباتات لانها لا بتحتاج ضوء كتير ولا ماية بشكل مستمر يعني الري بيكون خلال اسبوعين في الصيف و في الشتا خلال تلات او اربع اسابيع و من اكبر مميزاته انه بيفرز الاكسجين خلال الليل على عكس اغلب النباتات اللى بتفرزه في النهار بس يعني مصدر صحي للتنفس في البيت .
اما الضوء ف هو بيحتاج ضوء متوسط او مغربل يعني مش شرط توفرله مكان واصله الشمس مباشرة في البيت .
طيب ممكن نستفاد منه ازاي كمهندسين landscape؟
لو هيتحط في الحدائق او في مكان مفتوح
افضل حاجة انه يتزرع في اماكن مضلله او مغربله او بيوصلها ضوء خفيف.
لازم ك مهندس تتاكد انه التربه في الحديقة بتصرف المايه كويس .
جلد النمر عامة مبيحتاجش صيانة اوي يعني ممكن نكتفي بس بازاله الورق التالف .
طيب بالنسبة لجزء ال design في ال landscape ؟
ممكن يتحط على جوانب الممرات او عند المداخل .
جلد النمر مناسب جدا للتصميمات ال modern في المباني الزجاجية او الخرسانية الحديثة .
مناسب للتصميم الصخري لان شكله بيتماشى مع الصخور الملونة و الرمال .
ممكن كمان يستخدم في تنسيق الاحواض الخارجية عند بوابات المباني او المكاتب و يمكن تنسيقه مع نباتات مداده او زاحفه .
