ألوان ومشاعر مع هبه

19/07/2026

يلا نرجع لتدريبات الثقة بالنفس 🏃‍♀️🏃‍♀️
🚨التدريب الثاني لبناء الثقة بالنفس 💪
بعد تدريب صندوق الانجازات واللي كان بمشاركة الأم والطفل،
تدريب انهارده هيكون للأمهات القمرات 🧕
"تشجيع كل يوم "
خليكي حريصة أن إبنك او بنتك يسمعوا منك جملة مدح وتشجيع يوميا مع أغلب المواقف اللي بتمر عليكم مهما كانت بسيطة جدااا
مثلا:
🤩شكلك جميل باللبس ده .
🤩التسريحة دي لائقة عليكي قوي .
🤩كل حاجة هتتعلمها بالتدريب.
🤩أنا مؤمنة إنك تقدر.
🤩دايما بحتاج لك تساعدني .
🤩مش عارفة من غيرك كنت هعمل ايه .
✨ مهم جدااا إنك تركزي على محاولته ومجهوده، مش النتيجة بس.
قولولي 🤔 ايه كمان من الجمل الحلوة أو المواقف اللي بتشجع ولادنا وتحسسهم انهم مرغوبين ممكن نقولها لهم أو تكونوا بالفعل بتقولوها لهم 💕

18/07/2026

حياتك هتتغير لما تعمل حاجتين:
١⬅️ لما تبطل تعامل الناس بالمثل، وتعاملهم بالحُسنى.
٢⬅️ لما تعرف تحدد مكان كل شخص في حياتك، وتدي كل واحد حجمه الحقيقي.

17/07/2026

15/07/2026

🚨 أول تدريب 🚨
👇صندوق الإنجازات 🏆
الثقة بالنفس بتتبنى لما يشوف الطفل إنجازاته بنفسه وبنشجعه عليها 💪
✨ اكتبولي " تم" لو ناويين تبدأوا بصندوق الإنجازات 🥰

13/07/2026

" الثقة بالنفس "
الثقة بالنفس مش صفة بيتولد بيها الطفل، لكنها مهارة بتتكون من طريقة كلامنا معاه، وتشجيعنا ليه، وإيماننا بقدراته حتى وهو بيغلط.
طيب نعرف ازاي ..طفلنا واثق في نفسه ولا لا ؟ 🤔
لما نجاوب ع الاسئلة👇
❓️❔هل بيجرب حاجة جديدة من غير خوف مبالغ فيه؟
❓️❔️ هل بيعبر عن رأيه حتى لو مختلف؟
❓️❔ هل بيعرف يقول "لأ" باحترام لما يكون مش مرتاح؟
❓️❔ هل بيفرح بنجاحه من غير ما يقارن نفسه بغيره؟
❓️❔ هل بيطلب المساعدة لما يحتاجها من غير إحراج؟
❓️❔ هل بيؤمن إنه يقدر يتعلم حتى لو الحاجة صعبة؟
❓️❔ هل يرفع إيده في الفصل لما يعرف الإجابة؟
❓️❔ هل يشارك في لعبة جماعية من غير تردد كبير؟
❓️❔ لو خسر في لعبة، هل يقدر يتقبل الخسارة ويكمل؟
❓️❔هل يلبس أو يختار بعض حاجاته بنفسه؟
❓️❔ هل يجرب مرة تانية بعد الفشل؟
❓️❔هل يقدر يقف يدافع عن نفسه بالكلام لو حد ضايقه؟ ❓️❔ هل يفتخر بأي إنجاز يعمله حتى لو بسيط؟
❓️❔هل يقبل المدح ويقول وبيعتز بنفسه بدل ما يقلل منها ؟
❓️❔ هل يثق إنه هيقدر يتعلم مهارة جديدة حتى لو أخذت وقت؟
❓️❔هل شايف مميزاته اكتر ماهو مركز على عيوبه؟
💜 لو كانت معظم إجاباتك "لأ"...
فده مش معناه إن طفلك ضعيف، لكن معناه انه محتاج دعم واهتمام لبناء ثقته بنفسه.
ومن الافكار الخطأ اللي ممكن نحكم بيها على الطفل:
❌ان الطفل الواثق لا يخاف.
❌ الطفل الواثق لا يغلط.
❌ الثقة بالنفس تعني أن الطفل دائمًا شجاع.
لكن الحقيقة أن الطفل الواثق عادي ممكن يخاف من مواقف معينه تستحق الخوف ، وبيغلط عادي ، ... لكن بيقدر يحاول اكتر من مرة .
🥰هنكون مع بعض الرحلة دي في تحدي بناء الثقة بالنفس
وهنعرف حلول وتدريبات تبني الثقة بالنفس خطوة بخطوة
بس ده لما تشاركوني وتجاوبوني؛
❓️هل فعلًا موضوع بناء الثقة بالنفس مهم بالنسبة لكم؟
وهل تحبوا أعمل سلسلة كاملة، يكون فيها في كل بوست تدريب أو نشاط عملي نطبقه مع الأطفال؟
طيب وبعد مانتكلم عن الأطفال نبدأ رحلة تانية عن بناء الثقة بالنفس عند الكبار، لأن كتير من مشاكل الكبار بتبدأ من الطفولة.
🌷 مستنية اجاباتكم

07/07/2026

ما تبخلش بالكلمة الحلوة على اللي حواليك. ❤️
ما تبخلش بكلمة: "سلامتك"... "ربنا يقويك"... "أنا جنبك".
"معلش" اللي كانت مش بتعجبنا ساعات.
لما تلاقي حد متغير أو متضايق، اسأله قبل ما تلومه. ممكن يكون تعبان، مرهق، أو شايل هموم أنت ما تعرفهاش.
ماتستكترش عليه تعبه ،ماتعليش عليه أنك تعبان ومضغوط اكتر منه💔
إحنا بقينا عايشين في وقت الضغوط فيه بقت جزء من حياتنا... الكبار والمراهقين، وحتى الأطفال بقى عندهم ضغوط .
🤎الكلمة الطيبة ما بتكلفش حاجة، لكن ممكن تكون سبب في جبر خاطر ، تخفيف وجع، أو إنها ترجع الأمل لقلب حد.
جربت دايما يبقى كلامك فيه أمل فيه تشجيع فيه مدح
ماتستكترش تقول لحد شكلك حلو انهاردة ، اتصرفت صح في الموقف ده ، كان عندك حق في رأيك ، انا عملت بنصيحتك 🤍🩷
للأسف، بقينا في زمن الحنية والاهتمام والكلمة الحلوة بقوا نادرين شويه عند بعض الناس .. فخلّي كلامك الطيب صدقة، ويمكن كلمة منك تغيّر حياة ونفسية بني آدم 🌷
﴿وَقُولُوا لِلنَّاسِ حُسْنًا﴾.
💖◀️ياترى إيه أجمل كلمة سمعتها في وقت صعب ولسه فاكر أثرها لحد النهارده؟
أو◀️ حتى كلمة ماسمعتهاش وكنت محتاجها في يوم من الأيام؟
أو◀️ ممكن تعمل منشن لحد قالك كلمة حلوة تجبر خاطرك أو تشجعك في يوم من الأيام أو وجوده فارق في حياتك عموما ؟🥰

06/07/2026

آخر سؤال هنجاوب عليه في رحلتنا دي 🥰
إزاي أتعامل مع طفل ADHD في الحياة اليومية؟
💜 لو بيتحرك كتير ما تطلبش منه يفضل قاعد وقت طويل. اديله فرصة يتحرك كل شوية بطريقة مناسبة.
اعمل توظيف لحركته في مهمه مفيدة .
💜 لو مندفع ساعده على الهدوء. فكّره إنه ياخد نفس لما يتعصب ، ويستنى ثواني قبل ما يتكلم أو يتصرف.
💜 لو تركيزه ضعيف اتأكد إنه منتبه ليك الأول، وبعدها قوله تعليمات بسيطة، خطوة خطوة، واشتغل تدريبات على التركيز والانتباه.
💜 امدح أي تصرف كويس حتى لو بسيط ، يعني لو قدرتي يسيطر على تصرفاتهوفي موقف معين ، أو ركز خمس دقايق، شجعه. التشجيع والتعزيز بيجيب نتيجة أحسن من النقد المستمر.
💜 قلل المشتتات لما تكلمه أو تطلب منه حاجة، حاول يكون المكان هادي قدر الإمكان.
🚨⬅️ اصبر وكرر طفل الـ ADHD محتاج تذكير أكتر من غيره، وده مش لأنه بيكسل، لكن لأن مخه بيشتغل بطريقة مختلفة ،مع التكرار والتدريب والتدريج هيكون فيه نتيجة بإذن الله .
وبكده نكون وصلنا لنهاية رحلتنا مع ADHD... لكن الحقيقة، رحلة فهم الـ ADHD عمرها ما بتنتهي. 💐
◀️إحنا غطينا بعض الأساسيات، لكن لسه فيه تفاصيل كتير .
وفي نهايه رحلتنا مع ال ADHDعشان تستفيدوا بشكل عملي لكل الأمهات جهزت لكم ملف مجاني فيه معلومات وأفكار وتدريبات عملية.
سيبوا تعليق بكلمة "ملف"، وأنا هبعتُه لكم بكل حب. 🌷