10/07/2026
🌳 مشروع "شجرة صدقة على والديك" .. خلّي أثرك في العامرية 🌳
السلام عليكم يا أحرار وحراير العامرية،
اليوم جيت نقترح عليكم مشروع بسيط في فكرته، بصح عظيم في أجره وفائدته لينا ولبلادنا. واش رايكم لو كان نرجعوا شوارعنا، مؤسساتنا، ومدارسنا خضراء تفتح النفس؟
الفكرة هي أننا نغرسوا أشجار زينة تكون صدقة جارية لكل واحد فينا، ينويها على نفسه ولا على والديه (الحيين منهم والميتين ربي يرحمهم).
📌 كيفاش غادي نمشوا هاد المبادرة؟ (ما نسحقوش دراهم نلموهم!)
الشراء مباشرة: ما غادي نلموا دراهم ما والو. حنا غادي نتفاهموا مع مشتلة (Pépinière)، وكل متصدق يروح يخلص الشجرة تاعه تما.
الغرس بيدك: تقدر تجيب الشجرة تاعك وتغرسها بيدك وتفرح بيها، ولا حنا نتكلفوا نجيبوها ونغرسوها في البلاصة المحددة.
الاستمرارية (الصح قاع هنا): بعد الغرس، غادي نديروا برنامج سقي منتظم ومنظم باش الشجر يكبر وما يموتش.
💡 قال رسول الله ﷺ: «مَا مِنْ مُسْلِمٍ يَغْرِسُ غَرْسًا أَوْ يَزْرَعُ زَرْعًا فَيَأْكُلُ مِنْهُ طَيْرٌ أَوْ إِنْسَانٌ أَوْ بَهِيمَةٌ إِلاَّ كَانَ لَهُ بِهِ صَدَقَةٌ».
🤝 كيفاش تقدر تشارك معانا؟
1. بالفعل: تشري شجرة وتشارك معانا في الغرس.
2. بالتنظيم: تدعمنا في برنامج السقي والاعتناء بالشجر.
3. بالكلمة الطيبة: إذا ما قدرتش، دعوة خير تكفينا، ولا عاونا باقتراح إيجابي أو بارطاجي الميساج باش يوصل لڤاع الناس.
أحبكم في الله، ويلا بانت ليكم الفكرة وطقوسها، خلولنا رايكم في التعليقات ونبدوا نتوكلوا على ربي! 🇩�
