03/01/2025
السلام عليكم ليكيب
نبداو مسار الصفحة بالحديث عن أهم الأحداث لي صرات في عام 2024 في ساحة الراب و نديرو recap خفيف و كي يكون موضوع يستاهل حديث أكثر نديرولو منشور مخصص ليه.
نبداو بأكبر حدث هاذ العام لي كانت عندو أهمية كبيرة ليس بالنسبة للراب فقط بل الهيب هوب ككل.
بعد البيف لي كان بين كندريك لامار ودرايك، كنديرك لامار دار كونسار في لوس انجلس كاليفورنيا تحت اسم The Pop Out، الكونسار هذا دار حس كبير خاصة لأنو البيف كان مزال سخون شوية.
هاذ الكونسار كان LEGENDARY بمعنى الكلمة، وراح يبقى فالتاريخ لعدة أسباب، العرض كان أكثر أهمية حتى من عرض السوبر بول تاع 2022 لي كان فيه كل من:
Dr Dre, Snoop Dog, Eminem, 50 Cent, Kendrick Lamar, Mary J.
الشيئ لي خلاه أسطوري هو وش صرا في آخر العرض وراح نهدرو عليه مبعد شوية.
لامار لي كان ب spirit تاع توباك وحتى انو إيميتاه فاللبسة تاعو، قدم للجمهور Premium Pack تاع الطراكات الكلاسيكية لي عندو، مام ما تكونش من مستمعيه راح تتعرف على 3 طراكات على الأقل وتقريبا كل الطراكات لي كانو فيتورينغ جاب لارتيست يقدم معاه، مجموع الطراكات لي قدمها هو 18 طراك أهمها كانت: euphoria لي دخل بيها وعطات للجمهور جرعة حماسية من البداية, وأدى جميع الطراكات لي كانو فالبيف تاعو مع درايك ما عدا meet the grahams.
وقدم أيضا كلاسيكيات مثل
Money trees, Alright, m.A.A.d city, DNA, HUMBLE...
والعديد منها المهم كامل وش قدم كانو calssics من الكاطالوڨ تاعو و جاب معاه سكول بوي كيو لي قدم معاه Collard Greens وبعض الطراكات لخرى.
أهم فيتورينغ جابو معاه في رأيي هو DR.DRE لي قدمو كيف كيف طراك Still DRE و دراي قدم أيضا الكوبلي تاعو في California love، دراي يرابي فيها وانا نستنى غير كندريك يدخل فالكوبلي تاع توباك لكن للأسف ما دخلش وفي رأيي كان ذلك إحتراما له.
مبعد في آخر العرض دكتور دراي حكم المايك ويخدع الجمهور بوحدة تاع "Psst, i see dead people" ويبدا البيت تاع mustard هنا الجمهور زاد شعل مع Not like us لي عاودها كندريك خمس مرات ورا بعض وفي كل مرة تزيد تشعل لاسان، هاذ اللقطة ماشي غير mocking لدرايك لكن عندها بعد آخر وهو الرد على إستهزاء درايك بالواست كوست فالبيف و استهزئ حتى بتوباك.
شفتو كامل واش صرا؟حتى الآن ماشي هذا هو الأهم في هاذ العرض،
الأهم كان فالمرة الرابعة لي قدم كندريك not like us طلع معاه فلاسان غاشي كبير منهم لي معروفين كيما البيتمايكر Mustard و Jay rock، School boy q والعديد...
الأشخاص لي جابهم كندريك فلاسان ماشي أي أشخاص وإنما أفراد عصابات في الساحل الغربي وممثليها، هاذ العصابات كانو في حروب لعقود قبل حتى البيف تاع بيغي و توباك، من أشهرها عصابة الكريبس Crips لي داخلين فيها بزاف رابرز مشهورين مثل سنوب دوغ وأيس كيوب، وثاني عصابة هي عصابة Bloods العدو اللدود تاع الCrips،
كندريك بكل بساطة جمعهم في سان وحدة قع يشطحو على أنغام Not like us، كامل تحت شعار واحد وهو One West.
كندريك وحدو قدر يجمع قع العصابات (sections) تاع الواست كوست مع بعض و بدون عداوة في سان وحدة، هاذ الشي لي زاد فالقيمة تاع كندريك عند جميع محبي الراب والهيبهوب.
فالطراك المشهور تاع كندريك maad city دخل بهاذ السطر:
"If Pirus and Crips all got along
They'd probably gun me down by the end of this song
Seem like the whole city go against me"
المعنى العام تاعها يقصد انو كون يتحدو الكريبس و البلودز(pirus) راح يكملوني مع نهاية هاذ الغنية لأنو كندريك معروف دايمن يسلط الضوء على حياة هاذ العصابات ويتكلم على افعالهم في غناه.
بعد أكثر من 10 سنين كندريك قدر يدير وش قال فهاذ السطر لكن بطريقة إيجابية، جمع البلودز والكريبس تحت راية وحدة وفي سان وحدة.
If this ain't the purpose of hiphop in the first place, i don't know what is.
فالأخير لكونسار تاع The pop out لعب دور كبير في فوز كندريك بعرض السوبر بول 2025 على حساب ليل واين لي كان ضامن أنو صاي راهو ليه، وصرات فيها دراما بيناتهم و كنديرك هدر عليها فل الألبوم الأخير تاعو GNX، كندريك لي كان حاضر فالنسخة تاع 2022 وفي وقت قصير دار أفضل Passage فالعرض(ننصحكم تروحو تشوفوه)، راني نستنى بفارغ الصبر وش راح يقدم في عرض كامل ليه وحدو.
كاين وحدة اللقطة كوميدية صرات فالعرض وكل ما نتفكرها نضحك من قلبي، فالديسطراك تاع درايك Family Matters قال وحد السطر:
"You know who really bang the set?, my ni**as YG"
يقصد بيها علابالك شكون لي صح Gangsta؟ هو YG لي هو صاحبو زعما وسمى تاني صحابو وحدوخرين.
ايا فالعرض تاع كندريك جماعة تشوف في YG شخصيا يدير فC-Walk على أنغام Not like us ضارب درايك بحطبة للوجه ديراكت 😂😂.
نخليلكم رابط يوتيوب تاع الكونسار فالتعليقات لي حب يتفرجو فيه ساعة و نص.
