Ali Ján Dád

Ali Ján Dád من زندگیءِ مردماں

کُلوهگشنت تئی شهر وشبوانی شهر اِنتزبادجانءَ بگش اردیں کسے کیت چه وشیں موسماں بویے رواں دئےادا مئے نازبو دیر اِنت زیان اَ...
08/10/2026

کُلوه

گشنت تئی شهر وشبوانی شهر اِنت
زبادجانءَ بگش اردیں کسے کیت
چه وشیں موسماں بویے رواں دئے
ادا مئے نازبو دیر اِنت زیان اَنت
پُراں پیوستگیں ما گوں دلانی
نه سهڑنت واب گوں ما جنگلانی
زباد جانءَ بگش نوں بُلبلانی
تبءُ مئیلے گوں پُلاں پَش نکپته
گروکاں آسشان اِنت آزمانءَ
زمینءَ ایوکءَ گوکُرت رُسته
ادا نیم سُتکگیں لاشانی بوءَ
کپوتاں زهیر اوں نیارنت کُدوهءَ
نپّس ڈکّیت همک دیمءَ درائے
سمینءَ یاسمینءِ باس گون نیست
نه سرگواتے زرینیت آسمیاں
بهارءَ مُشک هر رو چونڈگءَ اَنت
مگسک گرند اِنت گُلستانءِ جنازه
زبادجانءَ بگش اردیں کسے کیت
چه وشیں موسماں بویے رواں دئے
کسانیں موکلے کشّاں چه جنگءَ
تشے تیگءَ مُشاپاں گوں تُپنگءَ
تشے پُلاں کتارءِ بستگیناں
اے چار راه‏ءِ سرا کئے زانت باریں
اے لاشاں چنچو دیر اِنت کپتگیناں
در اتکه سینگءَ چه دل کسےءِ
جگر سے جاگه، سر سے ٹُکّرءَ اِنت
هسابءُ داد هرّو کئے بداریت
ادا کئے زانت چنچو جون کپته
اے گپءَ کئے بجیڑیت کئے بماریت
کُجام ڈولءَ کئی ارواه در اَتکه
دُرهیں دیوال هوناں میچلین اَنت
کسےءِ لنکُکے بَڈّءَ اِنت موراں
کسےءِ دیدگے گِرّ اِنت سُلوراں
اگاں کبراں کلمپوگ مان بوتیں
ما کبرستان بُن دات گوں بُخوراں
ادا نیم سُتکگیں لاشانی بوءَ
دُرهیں بازار انچو آڈهور اِنت
سباهاں روچ سردردءِ وڈا اِنت
ءُ روزردءَ گشے چو زردُوئیءَ
زبادجانءَ بگش سرپد نئے تو
ادا بیگانگیءِ وئیل کپته
کسے چه آشناهاں پشت نکپته
کئےءَ شوهازیت مردم کئے سر اتکه
میاری اوں نئے وهدے مزان ئے
کُجام مهشر سرءَ مئیگءَ نیتکه
ترا دیر اِنت چِداں درکپتگ ئے تو
نزان ئے تو که جاورهال چون اَنت
زباد جانءَ بگش بےوانکیءَ نوں
وتءَ مٹّاته گوں سکراتءِ شورءَ
نه نوشیت ایمنی بنگاں بُلورءَ
آ اسپیتیں کپودر دُور گار اِنت
پدا واتر نیتکگ اے دیارءَ
ادا گوں ستکگیں لوگانی دُوتّاں
مُلوری جمبرے رَد دنت بهارءَ
پُراں بندیت، پُراں گواریت په مارا
زبادجانءَ بگش اے بے مُرادی
وتی اهدءِ مُراداں جیڑگءَ اِنت
وتءَ وت پسّه دنت وت پُرسگءَ اِنت
داں چنتءَ اے کلیراں تاک پِر نیست
داں چُنتءَ پَد نه جنت ابرم وتارا
داں چُنتءَ اے وڈا جاور نه گیگ اَنت
گشنت نوں مَرگ چه ما گله اِنَت که
اڑان اَنت پاد گوں کانپولاں راهءِ
داں چُنتءَ زندگیءِ ڈُونڈ کپتگ
داں چُنتءَ ملکموت پونزءَ به بندیت
گوزان اِنت وهد چه وهدءَ کزاءِ
نپّس ڈکّیت همک دیمءَ درائے
داں چنُتءَ گوات ارواهءَ زبهر اِنت
گشنت تئی شهر وشبوانی شهر اِنت
دلءِ بندیک هر پئیمءَ که سِسته
بلے دردءَ وَ گُکّے یار مان دے
زباد جانءَ بگش اردیں کسے کیت
چه وشیں موسماں بویے رواں دئے

چمّاں په آگهیءِ گِلگ بےگُمان اتاںمئے واب زانه پمّا کُجا مهربان اتاںدرچکےءِ هُشکیں تاک بهارءِ امانتاںگو...
05/10/2026

چمّاں په آگهیءِ گِلگ بےگُمان اتاں
مئے واب زانه پمّا کُجا مهربان اتاں

درچکےءِ هُشکیں تاک بهارءِ امانتاں
گواتءَ جنازه داتگ اتنت کوپگان اتاں

نوں سُرمه دانءَ پئیم نباں پُرحریدی ئیں
ماندارگءَ چه پیش ادا مئے گِدان اتاں

بامءَ په کِیل کٹّتگ اَنت نور ءِ گوازیءَ
آ اشرپی که یار شپءِ کیسگان اتاں

داں امرےءَ بگندے نپّس کَش اِتگ بلے
گِستائیانی پاس چو سَکراتءَ گران اتاں

هرّو زهیراں کئیل کته کدّهے ءُ من
هرّو موالیانی وڈا تتّران اتاں

مُرگےءَ آفرین ببات گوں محبت ءَ
ماهءِ سرا اوں جنگلےءِ داستان اتاں

پیشانیانی کِرچک کمرزانیان اتاں
دل شاهیگان ، کُڈک ءُ کاپر کسان اتاں

بےتوکلیءَ چارگءَ تهنبُل نه بوتگ اَت
اِشتاپیں وهدءِ پاد سواساں اڑان اتاں

آباد بات ئے ! پمّا تپرکه مبو دلءَ
اے وشیانی ارس اتاں ماں دیدگان اتاں

انچو دُچار کپتگیں ما همسپر نئیں
تو اوں روانءُ من همے راهءَ روان اتاں

دیوانگےءِ چکّ پَدءَ اَت گوں دمکے ءَ
پادینکے ءِ توار داں گوشاں کپان اتاں

روچءَ هُدا بزانت کجا در گُزر کُتاں
لهتے چراگ اتاں که شپءِ پاسپان اتاں

ابرم وتی لکیراں کروجیت ءُ شَر کنت
ریکءِ سرءِ نبشتگیں آپءِ نشان اتاں

گوں زندگیءَ شِیر ءُ شکر بوتگیں ما داد
مئے تالهءِ گِلاس ءَ چیا زهر مان اتاں

جاوراے نگیگیں جاوراں چے کُت کنئے”کُشته کارے“ پُرسگءَ اِنت ”کُشتگین“ءِ ”دومی همراه“ءَ که باریں ”مُرتگین“ءَ چے کُتگگواچنی ...
29/09/2026

جاور

اے نگیگیں جاوراں چے کُت کنئے
”کُشته کارے“ پُرسگءَ اِنت
”کُشتگین“ءِ ”دومی همراه“ءَ که باریں ”مُرتگین“ءَ چے کُتگ
گواچنی هیران ءُ جیڑیت گوں وتءَ
سنگءُ سیاه اهدے گوں ایمانءِ بُتءَ
ایمنیءُ جنگءِ نیامءِ نوبتءَ
کئے هداءِ چهرگءَ جنت، است کئے
گوں کئےءَ نندئےءُ کئی زنگءَ جنئے
اے نگیگیں جاوراں چے کُت کنئے
گوں وتی گالاتگیں بیوانکیانی لئیبواں
گوں ملُوریں ساهتانی سِسته سادیں چیکّواں
پُرشتگیں اوپار هرّو رَد کپیت چو زهگےءَ
بولیاں مانگیشتگ اهدءِ نه گیشوکیں زبان
موتک مودگ بیت نه سئوتے چاڑ گیپت پربندگءَ
اُمر ویرانیں کهیری ساهگے روچءِ سرءَ
شانتلے دل سدکّی گیگءَ نه گندیت نندگءَ
گردشاں وهدءِ وتءَ چار راهے انچیں سر کتگ
کس وتی بےمارگیءِ مارگءِ پئیمءَ نه اِنت
راست انچیں چهرگے که چاَرگءِ پئیمءَ نه اِنت
اے که اپسوزے نگاهاں
اے که زئیمے ماں دلءَ
اوست کسءَ پِر نه بیت، پیشدارگءِ پئیمءَ نه اِنت

اے نگیگیں جاوراں چے کُت کنئے
پیرکءَ دَیر اِنت سلاه بند اِنتءُ نشته سنگرءَ
ناکوءِ هونانی تُنیگیں حسّد بےهاترءَ
پت وتی زِدّءَ هوار اِنت دُژمنانی لشکرءَ
دروگ بندیت بےمڑاهءَ زهگ گوں ماتءَ وتی
په گبّرے پُروش جندءِ کوپگءَ وت کم بکن
په دو کلدارءَ بجن بیگواه بکن براتءَ وتی
یار هدّ اِنت اے وڈیں بے باوریں بےامنیءَ
پرک ءُ درکے نیست وتیءُ ڈنّیءَ
هرّو یکے بئیتءُ کالارءَ به گیپت کشان بکنت
هرّو یکے بئیتءُ گوں ریزاں به بندیتءُ ببارت
هرّو یکے بئیتءُ بیهارے بدنت بازارےءَ
هرّو یکےءِ گِسءَ ماندارءُ بےپردگ بکن
هرّو یکےءِ گُشانءَ کشءُ چمّاں در بکن
مهرءُ کینگ اندرءَ بندیکےءَ پیڑاتگ اَنت
گندگءَ گُک داتگ اَنت، چکّاسگءَ گوں سِستگ اَنت
تُرس ازتّے نهے مجبوری یے
چشمکے انچیں وتءَ رد دنت جندءِ چارگءَ
انچیں اسرارے که گوں وت پشت نه کپته په وتءَ
کسّی چم دیستءَ نه اِنت وت کردنی جندءِ وتی
مزهبءُ لیکه به بنت که حاکمءُ آشوبی یے
کس وتی بد رنگیءَ چارت نه کنت
دُرست آدینکءِ تها پولنت وتی زیبائیاں
کئے په مهشر سِتکءُ دل تچکیں هسابے دات کنت
کرّ چوں سرپد بیت
گُنگءَ کئے هبر پرمات کنت
چه کئےءَ کسّے به پُرسیت، کئے جوابے دات کنت

چو چے پئیمءَ بیت کسےءَ هچیءَ گوں کار نیست
اے که لس مهلوک اِنت اشیءَ هِچّیءِ بستار نیست
ایمنیءُ جنگءِ میانءِ جنترءَ هر روچ دُرشگ بیت
بے گُناهءُ بےمیارءَ
انچو بےموتءَ کُشگ بیت
شهر کبرستان بوان اَنت وتی آبادیءَ
روچے یکےءِ جنازه کوپگاں بیگار کنت
اے که لس مهلوک اِنت شطرنجءِ نزوریں جاگه اِنت
مُهرگے اے وارت هرّو ، مُهرگے آ گار کنت
زندگی بے وارس اِنت
هچی نه گندیت په وتءَ
زندگی نادزرس اِنت که گریتءُ کندیت اهوتءَ
مردمءَ حیوانءُ انسانءِ گِچینءَ چے کُتگ
”کُشته کارے“ پُرسگءَ اِنت
”کُشتگین“ءِ ”دومی همراه“ءَ که باریں ”مُرتگین“ءَ چے کُتگ
مُرتگیں وت اوں نزانت که من کُجام دیناں شُتاں
مُرتگینءَ هچ وڈیں ارزشت نیست
ملکموتءَ مَرگ بس اومان کنت
کُشته کارءَ زندگیں مارشت نیست
سُپتگیں لاشءَ دگه ده تیر سُمبیت سینگءَ
زندگینءَ چے کُته ءُ مُرتگینءَ چے کُتگ
مردمءَ حیوانءُ انسانءِ گِچینءَ چے کُتگ
شهر شهرے نے که جنگل جنگلے
کئے کجام دیمءَ بلوٹیت سر بگیپت
راه راهے، نے که منزل منزلے
زندگیءُ مرگ چوناها دُوئیں نامهرم اَنت
گوں کئےءَ همراه بئے،گوں کئے شُت کنئے
اے نگیگیں جاوراں چے کُت کنئے

کُجام تاوان نپ کُت زندگیءَوتءَ چو نامءُ دپ کُت زندگیءَمنءَ مرگءَ پناهءَ زرت شُگریںترا سک کم شرپ کُت زندگیءَ
29/09/2026

کُجام تاوان نپ کُت زندگیءَ
وتءَ چو نامءُ دپ کُت زندگیءَ

منءَ مرگءَ پناهءَ زرت شُگریں
ترا سک کم شرپ کُت زندگیءَ

شور دنت بےچاڑیاں توپان کنت مُلمائیءَهیلهے گون اِنت دلءَ هر روچ په دلسیائیءَاُمر سرگوستےءِ نام اِنت ته سرءَ ...
16/09/2026

شور دنت بےچاڑیاں توپان کنت مُلمائیءَ
هیلهے گون اِنت دلءَ هر روچ په دلسیائیءَ

اُمر سرگوستےءِ نام اِنت ته سرءَ بِلّے گوزیت
زندگی من هر کُجا کایاں گوں تئی همرائیءَ

چنچو تچک اَنت دومیءِ دیمءَ اے اهدءِ آدمی
دُروگ بند اَنت گوں وتءَ هرّو وتی تهنائیءَ

آزمانے اندر ءَ پوشان کنت جنگل وتءَ
کبگ ماهءِ چیدگ ءَ پولیت وتی زیبائیءَ

روچ ءُ شپ یکیں وڈا هر نیمگءَ برجم نه اَنت
وهد گڑیالءَ کُتگ بے سُهب ءُ بے بیگائیءَ

گواچنی گیابانے ءَ تاکاں پتاتگ سِستگیں
واب گندیت آگهی درچکے بهارءِ دُرائیءَ

سُتکگیں بالو پُراں چنڈاں پدا پاد اتکگ اَنت
بیم پیداکیں چراگ ءَ چه وتی رُژنائیءَ

شَرّ ءُ شِرّ ءَ داں کدءَ زیر ءُ زبر گیشینت بنت
پوشتگ وژنامی ءِ دُروگیں کبا رُزوائی ءَ

داد پدریچے ترا اوں بلکیں روچے پَد بِجنت
نوبتے واتر بشوهازیت وتی بیگوائی ءَ

هر روچ ٹُکراں به ٹهینئے پدا پُرشیتآدینکءِ بولیءَ داں مزانئےکه چے گُشیتسگّگ کپیت نپّس نپّسءَ اُمر مردمءَمرگءَ...
13/09/2026

هر روچ ٹُکراں به ٹهینئے پدا پُرشیت
آدینکءِ بولیءَ داں مزانئےکه چے گُشیت

سگّگ کپیت نپّس نپّسءَ اُمر مردمءَ
مرگءَ مجال نیست بلے زندگی کُشیت

ریکءَ شمشته چول کُجا چون پُرشتگاں
دریا نزانت که تُن چیا چاگلءَ جُشیت

استالاں چنک جنان چه وابانی پیلِکاں
بےوابی سوت جنت شپءَجِنترءَ دُرشیت

شمبو کُجا گِه اِنت بلے نیستیءَ بچار
تِینءَ اوں تاپگےءِ شگاناں شرءَ مُشیت

یکّےءِ گوش دُروگءَ ابید هچ نه اشکناں
یکے ستّر په راست وتی کِسّهءَ گُشیت

هورءَ سما اِنت کور نوں کُچّاں بدل کناں
چمانی کانیءَ اِنت حیا چمگے هُشیت

وهد ءِ سواس داد گُشنت تا بتاوگیں
روچءِ سرءِ داں ساهگےءَ بئیت پیلُشیت

تو بار داته کندگانی پُشتءَ پدّرءَ نه اِنت مُلوری یے مئے اندرءَ رُدان ءُ زاهرءَ نه اِنتنه کپتگ ...
04/09/2026

تو بار داته کندگانی پُشتءَ پدّرءَ نه اِنت
مُلوری یے مئے اندرءَ رُدان ءُ زاهرءَ نه اِنت

نه کپتگ انگه نوبتءِ نگاهءِ روژنائیءَ
آ داگ که دلءِ سرا اِنت دامُنءِ سرءَ نه اِنت

مِرّگ وَ جیڑهے نه اِنت بلے بچار زندگی
میار نیست بالوءَ چراگ پتّر ءَ نه اِنت

اے آدمی ءِ ابرمءِ نزوری ءِ توانی اِنت
نه زُوریت دروگ مردمءَ داں راست باورءَ نه اِنت

دلءِ گُبار ماں دلءَ گُبار در گُبار بنت
زهیرءِ دَنز چنڈگءِ وڈا ماں چادرءَ نه اِنت

داں روتگانی بولیءَ نه پهمگءَ اِنت بانزلے
چنالےءِ مهبتءِ سما کپودرءَ نه اِنت

کُجام کیامت اِنت که ما نه سگتگ په هاترءَ
کُجام روچءَ زندگی گوزیت چو مهشرءَ نه اِنت

تئی گیشیں مهروانی اِنت تئی داتگیں نشانی اِنت
مئے زئیم انگه آزگ اِنت بلے چو پیسرءَ نه اِنت

دُرهیں سوار کپتگ اَنت ءُ ٹپ ءُ ٹوریں میّتاں
سِپائی یے مئے گار اِنت دُژمنانی لشکرءَ نه اِنت

تئی آستونکءِ دوچاں مرچی سُهریں رنگءِ پُل مان
مجیڑ مئے هیال چونها گوں خنجرءَ نه اِنت

گُشنت که داد ایوکءَ در اتکه زِی چه میتگءَ
ما منزلءَ اوں پول اِتگ ندیسته رهسرءَ نه اِنت

گپچلےءِ تها واجه مُوسا بچار مئیگءُ تئی کِسمتءَماءُ تو اتکگیں گِندُکءِ نیّتءَگپچلےءِ تها دئور داته وتءَشپ وتی کیسگءَ چنڈگ...
24/08/2026

گپچلےءِ تها

واجه مُوسا بچار مئیگءُ تئی کِسمتءَ
ماءُ تو اتکگیں گِندُکءِ نیّتءَ
گپچلےءِ تها دئور داته وتءَ
شپ وتی کیسگءَ چنڈگءَ اِنت پدا
چے هسابءَ رد اِنت
چو چتور بیت کنت
ساهگے گیشءُ استالےکم تَرّیته
دُرست اوشتاتگاں
وهدءِ گاریں گڑی باریں کئے دُزّته
نے زمین زرت کنت کنزگءِ توکلءَ
نے زمانءَ چشیں واهشے ماں دلءَ
ساچءُ جمبر بباں، گواتءُ وشبو، اگاں نود گوں شنزگاں
جُنزگی کس نه اِنت دُرست اوشتاتگاں
اے پریشانیءَ
مارا بُهتامےءِ جاگه اوں مان نیست گیش پیشانیءَ
اے وڈیں مُشکلیں جاورءِ گرانیءَ
چنچو اوپار درکار بیت مردمءَ
مارا باندا فرعونے شگانی مکنت
واجه مُوسا نه بوج ئے کمرزانیءَ

گواچنیءِ در اِنت
گِندُکءِ پتّر اِنت
کوه ِ طورءِ سر اِنت
ساهگے گیشءُ استالے کم تَرّیته
چو چتور بیت کنت
شپ وتی کیسگءَ چنڈگءَ اِنت پدا
کلکشانءَ وتی پیلکءَ پٹّته
ماهءَ پندول سے رندا چَپّی کُته،
ماهیکانءَ وتی دیدگءِ اُرّدگاں هُرتیءَ چارته
وهدءِ گاریں گڑی باریں کئے دُزّته
آزمان شاهد اِنت
زانت کنت گُنگیءَ
زانت بےوانکیءِ زیارتءِ بُرزیءَ چنچو پدیانک پِر
سرکپگ بیت، نه بیت
داں توارے وتی منزلءَ سر به بیت
لبزےءَ چنکدر سگّ درکار بیت
دانکےءَ اندرءِ زیلءِ پجّارگءَ
انتزارءَ ابید چےچےءِ کار بیت
داں که مانا وتی بنجلءَ په ترهگ گوں سلامتّیءَ
بے ملامتّیءَ بئیت ءُ واتر به بیت
واجه مُوسا کئےءَ گپ باور به بیت

مارا یک رِزّهے کنزگی اوں نه اِنت چه وتی جاگهءَ
ما ءُ تو چونها هردو وژنامیں مردم نئیں
هٹّے ڑےءَ دگه هچ نپے گون نیست
سوب مان نیست رندءِ پشومانیءَ
واجه موسا نه بوجئے کمرزانیءَ
آزماں شاهد اِنت
ماءُ تو هردوئیں داں ادا اتکگیں
یک هسابءَ همےجاگهءَ نشتگیں
کئے دگه بیت کنت
اینچو کئی دزرس اِنت، اے وڈیں کار اے جاگهءَ کئے کُته
ساهگے گیشءُ استالے کم تَرّیته
وهدءِ گاریں گڑی باریں کئے دُزّته
ماهءَ پندول سے رندا چَپّی کُته
کلکشانءَ وتی پیلکءَ پٹّته
واجه مُوسا بچاَر
اے مناں، اے توئے آ دگه وَ هما هستی اَت اتکگ اَت
هئو هما هستی اَت اَتکگیں اتکءُ شُت
هئو هما مئیگءُ تئی اوستءُ ایمانءِ بُت
واجه مُوسا بچار
مئیگ ءُ تئی کِسمتءَ
ماءُ تو اتکگیں گندُکءِ نیّتءَ
گپچلےءِ تها دئور داته وتءَ

بلانوش ” شے بَلانوش بلیدیءِ نامءَ “بلانوش پادا چه بنگءِ ملارءَکه زهمانی ساهگ سرا اَنت مارا بلانوش کسّه کتاباں نه اَنت مر...
18/08/2026

بلانوش

” شے بَلانوش بلیدیءِ نامءَ “

بلانوش پادا چه بنگءِ ملارءَ
که زهمانی ساهگ سرا اَنت مارا
بلانوش کسّه کتاباں نه اَنت مردمانی دلءَ اَنت
نبشته وتی اُمرءَ انگت کسان اِنت
کئے اِنت راست ءُ سقراطءِ دوداں بداریت
جهان دپترےءَ
کُجام دُروگ باور بکنت گواچِنیءَ
کئے اِنت زانت کنت کئی سرءِ گوستگینءَ
بلانوش !
ما ملکموتءِ نِگاهاں ندیسته مهبت په هچ زندیگینءَ
زمانگ همک نوبتءَ جنگ جاهے
نه کُٹّنت جنجالءُ جیڑه جهانءِ
همک چارِکءَ هون رتکه زمینءِ
بهارگاهءِ نوداں گوں کونجانی ارساں
بلانوش زهرءِ پیاله پلینتگ
همودا که مهشر سرا اتکه وهدءَ هما جاگهءَ زندگی مهتلینتگ

بلانوش پادا !
بگند کوه ِسُلطان پُرّ اِنت چه ماراں
پدا اژدها درکپان اَنت چه گاراں
بلانوش اے جور پُل تئی میاراں
کئے اِنت بئیتءُ گیابانےءِ بےوسیءَ تسلّاءِ لهمیں پناهے بپوشیت
تهاری کُج اِنت سِتر ماهے بپوشیت
کُج اِنت آزماں کبگ بالے شهاراں
په دوستاں وتی، په وتی دزگهاراں
کُج اَنت کوچگءِ لُوڑ دنزے به بنداں
کُج اَنت هار ءُ تُوپان راهے به رنداں
بلانوش پادا بگند پُروشگءَ اَنت جنیں چُک دستءِ وتی منگلیاں
بلانوش اوستے بدے هتلیاں
بلانوش پادا بچار رولهیءَ
کُجا روچ کپتگ
کُجا سُهب ءُ بیگاهءِ بندیک گُکّیں
وتی تاب ءُ ریساں چتور گران باں چنچو ارزان گیشّنت
کُجا تَچک بنتءُ کُجا مان گِیشّنت
کُجام رنگ نورءِ شپءَ پوشگی اِنت
کئے اِنت راستیءِ چهرگ پجّه بیاریت
بلانوش تاوانءِ دیمءَ بچار گوں زمینءُ زمانءَ
کُجا سبرءِ درچکءَ برے گون باریں
کُجام باگ مُلما بکنت باگپانءَ
بلانوش پادا بُگش یار باریں چِه کردار ءُ کارے
اگاں دل ڈگارے
کُجام توم باریں کُجا چَنڈگی اِنت
داں چُنتءَ کُجام درد آکوشگی اِنت
کئے اِنت راستءُ سقراطءِ دوداں بداریت
بلانوش پادا
بُگش باریں اے رندی زهرءِ پیاله کئےءَ نوشگی اِنت

بلانوش کسّه کتاباں نه اَنت مردمانی دلءَ اَنت
بلانوش ڈَمبانیءِ دَمب زاننت
چیا مردمے گار جندءَ وتی کنت، کُجام هاترءَ میتگے وتکُشی کنت
بلانوش منگول مورءُ سلور اَنت
چرے میتگءَ بس کلاکےءَ دُور اَنت
سرءَ پچگرنت اوں کُلاهءَ بُزور اَنت
بلانوش پادا
که نوداں بلاهے کوارءَ کنان اِنت
کسے ساهگءَ تئی چه تو پچگران اِنت
بلانوش همساهگاں اوست پر نیست
بلانوش هندی چه تو نارزا اَنت ، ارب بے وپا اَنت
بلانوش قاجار کئی دوزواه اَنت
په لُٹءُ پُلءَ بس ادا شنگءُ شانگ اَنت
بلانوش اوگان په کئے پناه اَنت
وتی اندری جیڑهاں بهرءُ بانگ اَنت
بلانوش زهمانی ساهگ سرا اَنت
بلانوش چم کوچگءِ گوں ترا اَنت
بلانوش پادا بدے باریں هالاں که ایمانءَ چنچو پشل بوّگی اِنت
کُجام کِبلهءَ راست پیشانی یے کنت
هُدا چنچو رندا بدل بوّگی اِنت

بلانوش کسّه کتاباں نه اَنت
مردمانی دلءَ اَنت
بلانوش اشتاپیءَ دیستگ اَت ما جنینے شپادءَ
گنوکی روان اَت چه ڈکّءَ گشادءَ
گشنت کاراوانے هما دیمءَ مهتل په تَبلءِ توارءَ
که مردم دگه ٹکّےءِ جیڑهانی سَلاهءُ بناءَ دگے هلکےءَ اَنت
بلانوش توکل که بےتوکلی په تو گرانیں شِگانے
بلانوش کوڑاچئی دودمانے
بلانوش ڈاچی دُرها لڈءُ باراں
کتاراں گوزنت سارباناں مهاراں
بگند مَهریاں گوں مُلوکیں سواراں
بلانوش پادا چه بنگءِ ملارءَ بلیدی تگردءَ وتی پیچگءَ اَنت
گِدانانی بندیکاں پرّیچگءَ اَنت
دُرها کَچّ ءُ گنداوگءَ لَڑّگءَ اَنت
بلانوش کمری پدا نالگءَ اَنت
نزان ئے که گِستائیءِ درد گران اِنت
بلانوش بئیلی تئی سرگران اِنت
دموکه سرءَ ارس شودیں گُشان اِنت
مُلوری چه بچکندگانی زهیراں
وتی سرجمیں سیمسراں سرگوزان اِنت
اگازی گشنت اوں گوں رمبءَ روان اَنت
ملنگانی ٹُولی چداں در کپان اَنت
کپوتانی کوکو دلءَ سندگءَ اَنت سروزانی یاتءَ
بلانوش !
هامین ایر ااِنت کپاتءَ
بلیده ، بلیده نه اِنت بے کلاتءَ
بلانوش پادا چه بنگءِ ملارءَ
بلانوش مَرگءَ مڑاهے پکار اِنت
بَلانوش کبراں کلمپوگ مان نیست
دُرها آگهیں بوتگاں اِے که واب اَنت
بلانوش بنگپتگیں گورپاتءِ پَداں داستانے پُراں ماں پتاته

بلانوش کسّه کتاباں نه اَنت مردمانی دلءَ اَنت
بلانوش لهتے کُلوه ءُ سلاماں
په تو گون اتاں گوستگیں کاروانءَ
بلانوش اِشکُن که مئے دُژمنانی لَڑءَ هور نزیکیں دوستانی ناماں
بلانوش پادا که جاور نگیگ اَنت پدا مکرانءَ
زرءَ بسته سنگر گشنت لشکرےءَ
دری بُوجی اَنت ننگراں ماں تیابءَ
بلانوش پادا
که زروانےءَ اتکگءُ مان رچان اَنت
گشنت دُز دریائی مورءِ هسابءَ
گشنت مئیگ ءُ تئی میر دزگیر بوته ءُ زندانےءَ اِنت
بلانوش پالے به ترّین په یاراں
توارے بدے باریں هیروپ ءُ هاراں
بلانوش کُٹءَ کن هپتیں تلاراں
گُشنت مولدانی امانءَ مئے بی بی در اتکه گِسءَ دور گیابانےءَ اِنت
بلانوش دعایے بکن ملگزاراں
بلانوش گوانکے بجن سرمچاراں
بلانوش ریکءَِبکن دستءِ مچءَ ببر دور داں کوه ِسلطانءِ کُٹءَ
بلانوش ننگءَ بنادین گَٹءَ

بلانوش پادا
سکینے بدے مرشدی اے مُریداں
همک سُهب راهءَ گوزاں کورلمبءَ
اجب مان ترّیناں میلانک باں دیمءَ ویرانیں باگانی بےچاڑیں پاتو
بلانوش جُستانی گرنچے پتو جنگلءَ گوپگءَ اِنت
کُجانگو شُتاں چمگانی روانی
بلانوش گوں وت جناں گِله ءُ زنگ گیشکورءِ کانی
بلانوش پادا
بهارءَِ بُگش دلتپرکه مبیت که
دُرهیں رنگ سنجءَ نه بکشاتگاں ما
امانتءَ اِیر اَنت داں کیامتءَ اِیر اِنت
بلانوش پادا بگند یار پدریچ تئی مِنّه وار اِنت
دَڑامبءَ چه داں کوه ِسلطانءَ پما برند نوکیں راهے
هزار سنگرانی ٹهین جنگ جاهے
بلانوش کوهاں بکن په وتی اِے مُریداں پَناهے
بلانوش قاجاراں تریاکےءَ زهرماَرے دپءَ دے
بلانوش منگولاں دارے دپءَ دے
بلانوش بے تو کئے اِنت زهر شیریں تماهاں بنوشیت
کئے اِنت رولهءَ ماں گلاسءَ بریچیت
کُجام تُنی ئیں چم هوشامءِ اِشکءَ
کئے اِنت ملکموتءِ نگاهانی نامءَ
کئے اِنت زندگیءِ اداهانی نامءَ
شکر مان بکنت رنج ءُ آهاں بنوشیت
بلانوش کئے اے بلاهاں بنوشیت

نمدی دنز هر روچ گواتءِ نامءَ نمدی نبشته کننت ءُ روان دیاں بلے گوات کدی نمدیاں جواب نه کنت بس موسماں مٹ کنتگوات کدی کسےءَ...
03/08/2026

نمدی

دنز هر روچ گواتءِ نامءَ نمدی نبشته کننت ءُ روان دیاں
بلے گوات کدی نمدیاں جواب نه کنت
بس موسماں مٹ کنت
گوات کدی کسےءَ نمدی نبشته کنگءَ ندیستگ
اگاں کیت اوں هچ نه گشیت ءُ پدا وتی پداں کروجانءَ روت
بلے یک روچے شهرءِ پشتی نیمگءِ پلکاں
دنز وتی لنککاں گوں چیزے نبشته کنگءَ اتاں
لبز نه اتاں بس لهتے نشان اتاں
انچیں نشان اتاں که آهاں بس وهد ونت کُت کنت
پُلکاں گواتءِ نامءَ اولی نمدی نبشتگ اَت
تو مدام کائے بلے کدی ندارئے چیا ؟
گواتءَ ریگستان چو لُوڈءَ بال دات
بلے هچے نه گُشت

پدا دومی نمدی نبشته کنگ بوت
اے رندی لُمبتگیں دیوالےءَ
وتی پُرشتگیں هِشتاں گوں لبز تراشتگ اتاں
ویرانیں دریگےءَ وتی شیشگانی ریزگ لفافهءَ کُتاں
ڈکال جتیں درچکےءَ
وتی گُڈی پشکپتگیں تاک په دزرندءِ درورءَ جهلءَ اِیر کُت
گواتءَ نمدی دزگِپت بلے جوابے نه کت

یک رندے کوهنیں بانڈمے مُدتاں رند کلونڈگ بوت
چه اودا ناسرجمیں نمدیانی کبرستانے درکپت
یک کبرےءَ تهنا لبز ”واتر" نبشتگ اَت
دگے کبرےءَ ”لوگ“ کپیءَ لکوک اَت
همے گُمان بوت
که نبشته ءِ وهدءَ ندءِ سیائی هلاس بوتگ اَنت
دگه یک کبرےءَ بس یک ” نُکتهے“نبشته اَت
پورا نبشته کنوکءَ نبشتهءِ وهدءَ
درُستیں گپ بےتواریءِ امانت کتگ اَنت

دنز انچیں نبشته کارے که گوں نَدءَ نبشته نه کنت
برے گوں چمانی زئیماں
برے گوں ساهءِ رَوّا ءَ نبشته کنت
اے هاکءِ هر رزّهےءِ سرا یک زمانگےءِ نپس چو برپءَ بدیتگ
هر رزّهےءِ سرا یک شمشتگیں پیشانیےءِ هید کپتگ اَنت
اے زمینءِ هر رزهے یک کرتکگیں لوگےءِ گُڈی دیوال اِنت
گواتءِ کاراں سر هچ پِر نه بیت
گوات نمدیانی دزگروک ئوت اِنت
دُز وت اِنت
پدا وتی دُزیءِ شاهد اوں وت اِنت
برے یک میتگےءِ نمدیاں بارت دگه انچیں میتگےءَ دور دنت
که اودا کس دنزءِ نبشتگیں زبانءَ سرپد نه بیت

یک روچے وتی دستءِ دلءَ چم کپتاں
دیست که دستءِ لکیرانی تها دنز ایر نشتگاں
نزیکترءَ چه چارت ته دیست که منی نام نبشتگ
بلے انچیں نبشته رهبندےءَ که انگت ودی نه بوتگ
من تاں دیرءَ آروچی وتی جندءِ پوست ونت
ته همے جیڑت که
شالا مردم اوں هاکءِ نبشتگیں نمدی یے
که گواتءَ گون اِنت په ناآشنائیں ڈسّےءَ برگءَ
ما درست لفافه اِیں
مئے هڈ کاگداں
مئے رگانی تها سیائی اَنت
ءُ دل ......
دل هما مُهر اِنت
که آئی سرا هر روچ دریکگ کم کمءَ پُرشان اَنت

برے برے دنز کبرانی سروناں نندنتءُ چه اودا ناماں درچن اَنت
هُرت چوپنت ءُ پدا گواتءِ دستءَ دینت
پمیشکه برے برے اگاں درامدیں دیارےءَ
کسےءِ نام گوشاں بکپیت ته دلءِ دریکگ تُرندتر بنت
بگندے همے ساهت
دیریگیں نمدی یےءِ روان داتگیں جواب به بیت
که دیرءَ پد سربوتگ

یک روچے بیگاهےءِ مُلوری رولهءَ چارگءَ ات
روچ برکت بوگءَ پیسر گُڈی نمدیءَ گواتءِ دستءَ دیگءَ اَت
پدا شپ بوت
ماهءَ رژنائی بوگءِ جهد کت
استالاں وتی کُلیں نُکته اِیر کناں کت اَنت
گیدیءَ وتءَ هالی ئیں دپترےءِ پئیمءَ پچ کُت
گوات تاکاں لیٹینان اَت ءُ دنز نبشته کنان ات
چه هما بیگاهءَ پد
همے که لوڈ بئیت من دروازگءَ نه بنداں
همے امیتءَ که کئے بزانت کدی
دُوریں دمکےءِ پُلکانی
یا زمین چنڈ ءَ چیر ترّیتگیں شهرےءِ
یا که انچیں مردمےءِ نبشتگیں نمدی یے
که آئیءَ بس وتی نام گوات باهوٹ کتگ
منی ڈسءَ نشانءَ بئیتءُ سر به بیت

یک روچے اگاں جهانءِ کُلیں کتاب بسچنت ءُ پُر به بنت
دُرستیں زبان وتی لبزءُ ماناهاں ببا بدینت
اگاں درستیں شهر ءُ میتگ وتءَ بے هیال به بنت
بلے انگت دنز گواتءِ نامءَ نمدی نبشته کن اَنت
لهتے پیگام انچیں پیگام اَنت
که سر بوگءِ واستا روان دیگ نه بنت
بلکیں گیدیءِ بےوانکیءَ
بس سپر کنگءِ هاترءَ دیم دیگ بنت

Adresse

Göttingen

Website

Benachrichtigungen

Erfahren Sie als Erste/r von Neuigkeiten und Aktionen: Wir schicken Ihnen eine E-Mail, wenn Ali Ján Dád etwas veröffentlicht. Ihre E-Mail-Adresse wird für keinen anderen Zweck verwendet, und Sie können sich jederzeit abmelden.

Verknüpfungen

Teilen

Kategorie