Ali Ján Dád

Ali Ján Dád من زندگیءِ مردماں

واب دُرشکیں موسمانی تاں بهاراں سر بِباںکونج باریں چه خُراسانءَ کدی واتر بِباںمارا ماں لُنٹاں چو...
14/06/2026

واب دُرشکیں موسمانی تاں بهاراں سر بِباں
کونج باریں چه خُراسانءَ کدی واتر بِباں

مارا ماں لُنٹاں چو مُزواکءَ جتءُ دئور دات تو
هئیر ! په تو زندگی مئے رنگ بهتاور بِباں

هئو اڑے گُنگی که تو گویاکیءِ زنگءَ جنئے
زیمرانی درد آوازانی سگّءَ در بِباں

روچ اِے پئیمیں نوں امروزءِ نسیبءَ مان نیست
ایمنی بندات باں په وشدلی آسر بِباں

مهر شاهیمے نهے واباں بُتوریت پُرشتگیں
بے هیالینانی ترانگ وت هیالءَ گور بِباں

اَبرم ءِ بی بی بِلڑّیت ءُ بُروت چے وانِکءَ
ساهگانی سِتر روچ ءِ دیدگاں پَدّر بِباں

چونیں جوڈشتے چےپئیمیں پُرشتءُ پروشے باتنءَ
تو وتی اوستءَ کروجے من وتءَ باور بِباں

چه وتی هاکءَ دراهگ مُشکلے مُشکلتریں
یار هر پئیمءَ نگیگیں نوبت ءُ جاور بِباں

نوں دل ءُ دیوانگی روچے بِدِّر اَنت جامگے
سِستگیں بندیکے ءِ گُکّاں گوں چیر ءُ سر بِباں

مئے دلءِ ٹپ مئے گِچین اِنت در چِتگ ما په وتءَ
داد مئے دوستانی آستونکاں ستّر خنجر بِباں

قمر بنت الضرّرقمر بیا مانداریں آزمانءِ کاپَرءَ ساهگ پراموشیںکه اِے پاسءَ هُدا جندءَ گوں دلگوشیںقمر سیائیں شپءِ پیشانیءَ ...
01/06/2026

قمر بنت الضرّر

قمر بیا مانداریں آزمانءِ کاپَرءَ ساهگ پراموشیں
که اِے پاسءَ هُدا جندءَ گوں دلگوشیں
قمر سیائیں شپءِ پیشانیءَ
نورءِ چراگیں در
اِدا بے پُرشت ءُ پُروشءَ زندگی بےلزتیں لئیبے
قمر امروز اِسرارے کپن پوشیں
وتی بےوانکیءِ برمشاں پِلکّان اِنت
قمر مُرگانی پادینکاں بِکّش ءُ اِیر کن سوتانی موچکینءَ
قمر گواتءِ نَلءَ دَزگِر چه اِے کوهءَ شِپانکینءَ
که دمبُرتگ زهیروکاں
چو کبرستانءِ وابیں مارےءَ اِنت اُمر هاموشیں
قمر بنت الضرّر بیا اِے شپءَ چو شیشگءَ پُروشیں
که اِے پاسءَ هُدا جندءَ گوں دلگوشیں

قمر اِے ریگزاریں تُن
چه آپءِ بُوتِنءَ پیش اِنت
چه بشامءِ وسءَ گیش اِنت
گُشنت دریا ءِ پیشانی وتی کِرچکاں چے سرّتکه
اِدا نودانی مُلمائی وتءَ کٹّیت ءُ باهینیت
اِے ریکءِ نام هوشام اِنت
رگامءِ دزرسءَ گیش اِنت
گشنت چولانی بندیکے وتی گُکّاں چے پرّتکه
دلءَ هورکیں گِلاسءَ کن جگر بُرّیں زهیرانی
بُگش گواتءَ که نوں وشبو پدا واتر نکنت پُلانی پیژگاهءَ
قمر اِے گوپتگیں دوچانی بندیکاں
لُڑیناں کن چه سرجاهءَ
نِدارگ سر نیاهنت ته زهیر اِش پرچے سر بیاهنت
دلءَ تهنا میارے پِر نبیت چم اوں گنهگاراں
وتی ناکردنیں کاراں
قمر بنت الضرّر چهرے بدے نازانی کاٹاراں
دلءِ همرائیءَ بِلّے دوئیں دیدگ اوں در بیاهنت

قمر بے چاڈیں بیگاهاں کوارءَ کن
قمر اِے نیوگانی باگ زیبا اِنت
بلے زیبائیءِ نیمون اوں تَلکے سرْپگ لوٹی
دلءِ دُزّ ءَ گِرگ لوٹی
اگاں اِے رندی هورءَ دیم ترّینگ کپیت کورءِ
قمر پرّیچ ملگورانی پیچاں ابرمءَ رَد دئے گوں بچکنداں
ادا کئێ شِرکنیں آوازءِ شِیرگ آبشاران اَنت
اِے بیگم جنگیءِ گونگءَ بُگوْج جورے بِکِش اودا
که بانداتءِ گماں زهرے بِچارینیت تهءِ مردم
قمر اِے چمگاں، اِے کانیاں دیهه ءُ بَلاهاں دے
که بےمُلءَ بُچونسنت اِش
تما وهدءَ که نودانی جگر در بئیت
قمر هرچی گوں هچءَ اِنت
نبوتگ هچ که هچ سر بئیت

قمر سنجءَ ماں پندولءَ بکن سرگِر
گُباراں مان گیشیں رولهءِ رنگانی ارواهءَ
قمر جنگل نوں آدینکءَ کُجام دیمءَ بجنت درچکانی دیوالءَ
اِے ویرندانیں گیابانءَ
وتءَ چارِت نه بنت موسم
گوں راوّا ءَ چو مهمانءَ
قمر روچءَ چگل دے سُرمگیں چمانی دریاءَ
جُڑاں شنگین ءُ یکِّرءَ بکن
پچگِر بهارگاهءَ
قمر اِے کپّی ئیں پاساں
داں چُنتءَ ماندیانءَ وهد دیمءَ رئوت
قمر تئی باکسیں زیبائیءِ کُربان بات روزرد کندیلیں
قمر بنت الضرّر ڈِیلے بجن بُن دے اِے دُنیاءَ هلاهوشیں
که اِے پاسءَ هُدا جندءَ گوں دلگوشیں

مُرتگیں پُل که وتی هاکءِ میارءَ ایر اَنتدرچکےءِ واب په آئوکیں بهارءَ ایر اَنتتو وتی زهیر شمشتاں ءُ در اتک...
27/05/2026

مُرتگیں پُل که وتی هاکءِ میارءَ ایر اَنت
درچکےءِ واب په آئوکیں بهارءَ ایر اَنت

تو وتی زهیر شمشتاں ءُ در اتکئے سپرءَ
چم من چیدگ کُتگاں کورء کِنارءَ ایر اَنت

ماهءِ ڈاِچی دِگه گیابانےءِ چاڈاں زُرتگ
کبگےءِ کرام شپءِ بستگیں بارءَ ایر اَنت

چم زیبائیءِ پاسانی عوّض چے بدینت
زیم ارواهءِ په نازانی شُمارءَ ایر اَنت

بلکیں وشبو وتی پولءَ پدا واتر بئیت اِنت
هورکیں گُلدانےءَ موسم گوں ودارءَ ایراَنت

مارا درگوْز بکنئے وهد ترا ماپ نه کنت
اهدےءِ برمش ءُ چِڑکه مئے توارءَ ایر اَنت

چو خُراسانءَ دُرهیں مُرگ رونت ءُ کاینت
کونج زاننت که چِے اسراَر کتارءَ ایر اَنت

تئی نگاهانی رزا اوں چو کمانءَ به سرپْیت
مئے دلءِ دُرائیں نشانگ تئی وارءَ ایر اَنت

وهد بے رِپک ءُ رواجءَ وتی ڈولءَ گردیت
سِستگیں بورےءِ واگ اَنت گِرءُدارءَ ایراَنت

آگهی داد دریگانی دپءَ گِپت نه کنت
پُرشتگیں واب چو پشکپتگیں کارءَ ایر اَنت

رِپکرِپک چماں چِنّگ کپیت تُنءِگواچن اِنت یا گُمان مُردِنی اِنت اُمر هشکاوگےءَ دریایےمور پِر رتکّه پُرشتگیں واباںبینگے پِ...
16/05/2026

رِپک

رِپک چماں چِنّگ کپیت تُنءِ
گواچن اِنت یا گُمان مُردِنی اِنت
اُمر هشکاوگےءَ دریایے
مور پِر رتکّه پُرشتگیں واباں
بینگے پِٹّتگ سرءِ توکءَ
شُوگرءِ نادرائیءِ پئیمءَ
اِشک لزت زبهریءِ نام اِنت
آپ هوشامءِ مانزمان نه اِنت
رِپک چماں چِنّگ کپیت تُنءِ
زندگی ساهگے نه روتاپے
وهد چه گردشاں پشومان اِنت
دمک بنت یا هیال تاب ورنت
مان گیشانءَ دُور ءُ دراج برنت
مارا دریاءِ بی بیءَ گُشته
زیمراں جنگلے سرءَ زُرته
باریں چے جُیڑگءَ اَنت درچک دلءَ
لَڈت اَنت پُل چه بهارگاهءَ
مُرگ واتر نیتکاں اِے راهءَ
یک کشءَ پردهےءِ پُشتءَ اِنت
سُهب وش اتکءَ نئیت بیگاهءِ
روچ ءُ شپ انچیں جاگهے ایر اَنت
وت وتی درمیانءَ دیوال اَنت
گوں سمینءَ شپءَ کُله کته که
واب بُن گِپتگ اَنت چو سوچُکیءَ
روله ءَ بُکچهءَ کُجا بنداں
بیگهءِ بے مُرادیں بانورءِ
چُپتگیں هِنیاں کُجا میناں
ماهءِ هیناریں چم نمبین اَنت
رِپک چماں چِنّگ کپیت تُنءِ
مارا دریاءِ بی بیءَ گُشته
چول نوں هینزکءَ نه منتین اَنت

تران(افغان سئوتےءِ پُژدرءَ)گُشتے که اِشک چے یے ، گُشتوں که بے میار اِنت گُشتے که هوش گار اِنت، گُشتوں کیا پکار اِنتگُ...
12/05/2026

تران

(افغان سئوتےءِ پُژدرءَ)

گُشتے که اِشک چے یے ، گُشتوں که بے میار اِنت
گُشتے که هوش گار اِنت، گُشتوں کیا پکار اِنت

گُشتے که گوں نه کپتگ کسّے بهارگاهءَ
گُشتوں که کُنٹگےءَ دامن اڈینته راهءَ

گشتے که باریں چولاں دریا ءِ چے دلءَ اِنت
گشتوں که تُن ریک ءَ هوشام ءِ چاگلءَ اِنت

گشتے په آزمان ءَ اِے مُرگ بال بنداں
گشتوں که باریں ماهءِ دیدگ اوں واب گنداں

گُشتے په گِندُکی ما اِمروز ءِ پتّر ءَ ایں
گُشتوں که زندگی اِنت هئو چو مُساپرءَ اِیں

گُشتے که ایوکی ءَ اِمروز چنچو گران اِنت
گُشتوں که من په کئیپاں تئی یات مهربان اِنت

گُشتے کج اَنت اندوه، گُشتوں دل اندرءَ اَنت
گُشتے زهیر زگریں ؟ گُشتوں که چادرءَ اَنت

گُشتے که آستونک ءِ بندیک پر رچان اَنت
گُشتوں که لهتے رنگ اَنت سنجءِ کٹورءَ مان اَنت

گُشتے که لاس لهتیں درپشنت شپءَ درا اَنت
گُشتوں کسےءِ مُهرگ ماں کلکشءِ گورا اَنت

گشتے که اهوتءَ بس گوں وت هبر کُتیناں
گشتوں اِے کوٹیءَ چے آدینک در کُتیناں

گُشتے بگر اِے لَبز ءَ مانا ءَ سر گوزان اِنت
گُشتوں انارءِ گپ اِنت بیمار ءِ داستان اِنت

گُشتے گوں کاروان ءَ مئے لیڑهے نیتکگ
گشتوں که هیبتان ءِ بگّ ءَ هوار کپتگ

سر گپته بوجی یے ءَ گُشتے کسے روان اِنت
گُشتوں کسے ءِ بهتءَ بس انتظار مان اِنت

گشتے اِے چونیں دنزاں ماں بیگه ءِ مُجان اَنت
گشتوں که لشکرےءِ پُلکاں پد ءُ نشان اَنت

گُشتے کسے گوں دگرءَ گون اِنت وتءَ جتا اِنت
گُشتوں که آدمیءِ کِسّه همے وڈا اِنت

گشتے بچار ما هءِ زیبائیءَ پِر اتکگ
گُشتوں که مُردگیں دل کبر ءَ وتی در اتکگ

گشتے که مهر چمءِ ایمان ءُ آپءِ نام اِنت
گشتوں دلءِ مسیتءَ شیتان پیش امام اِنت

گُشتے کسے ءِ نام اِنت آپ ءِ سرا نبشتگ
گُشتوں بگندے کور ءَ کانیگے ءَ شمشتگ

گُشتے کئے اِنت که سُهب ءُ بیگاهءَ نالگءَ اِنت
گشتوں که اُمر زهرے شهدءِ پیالگءَ اِنت

گُشتے که هر مساپر لوٹیت په منزلءَ روت
گشتوں که باریں راهءِ ترانگ اوں چه دلءَ روت

گُشتے دلءَ منءَ دے، گُشتوں که گوں ترا اِنت
گُشتے که سر گنوکیں؟ گُشتوں تئی زانسرءَ اِنت

تو گُشے تئی وشیاں گوں یار مئے یاری نه اِنت ما هما گم سگتّگ که پمّا اجباری نه اِنت دل وتی مانرُسّگءِ کئیپءَ گوں...
04/05/2026

تو گُشے تئی وشیاں گوں یار مئے یاری نه اِنت
ما هما گم سگتّگ که پمّا اجباری نه اِنت

دل وتی مانرُسّگءِ کئیپءَ گوں مُلما اِنت تها
دیدگ ءِ زیبائی بالادانی برهداری نه اِنت

ما ببا دات اَنت هما بازی که روچے بُرتگ اَنت
مئیگءُتئی نابُودیءَ مستر مئے هُژیاری نه اِنت

زندگی بے کیمتءَ ایر اِنت پچیں دُکّانےءَ
مرگ تئی سوداگرءِ کیسگ نوں بےپاری نه اِنت

ما اِے باگءِ کُنٹگاں اوں دیدگاں داریں وتی
پُل ءُ وشبو ءَ گوں تهنا مئے وفاداری نه اِنت

هئیر ، امروز اِنت اگاں چو مهشرءَ اِنت چےکنے
مئے سِزاواری ءِ کدّ ءَ مئے گُنهگاری نه اِنت

ما ردیں اهدے ءَ پیدا بوتگیں انسان اتیں
اِے که ما گونکپتگیں مئے نوبتءُ باری نه اِنت

وهد سَکراتے سرا مئے بے چڑکاءَ گوزیت
دل زدگبالیں همے پئیم اِنت که اُفاری نه اِنت

داد ارزان اِنت هما هرچی که گرانءَ کپت کنت
ازم راستءِ وارسان اِنت دُروگءِ درباری نه اِنت

دو دیدگ پاتوئیں، زندانےءَ اَنتتوامیں رنگ روشندانےءَ اَنتزِرے اَبرم وتءَ اوگارگءَ اِنت دُرها گوں بُوجی...
27/04/2026

دو دیدگ پاتوئیں، زندانےءَ اَنت
توامیں رنگ روشندانےءَ اَنت

زِرے اَبرم وتءَ اوگارگءَ اِنت
دُرها گوں بُوجیاں تُوپانے ءَ اَنت

دمانے روچ پَسّنِد ءَ بداریت
دو ساهگ اهوتءَ دیوانےءَ اَنت

هماهانی زهیراں آگه آں من
هما که واب کبرستانے ءَ اَنت

چرے کِشکءَ گوزنت ته مان ترّاں
دلءَ تئی یات چو مهمانےءَ اَنت

وت ءَ باهیں که دُنیا ءَ بِکّٹئے
اِے لئیبءَ سیت گوں تاوانےءَاَنت

جهانءَ هردوئیں چم کیسگءَ اَنت
جهانءِ واب ماں دُکانےءَ اَنت

په کندیلاں گنوکیں بالو اِیں ما
شپءَ مئے پُر ماں سُرمگدانےءَاَنت

چِے گپّے، چاڈ تئی بچکندگانی
چو بے چاڈیں دلءِ ارمانےءَ اَنت

اِے مردم چو وَ شهرءَ جہمنند اَنت
تهه ءِ ویرانی ءَ گیابانےءَ اَنت

مُلور اِنت آزمان ءِ شاهیگانی
کپودر داد بندیں بانےءَ اَنت

آرٹیمسبیا اپالو کُجئے تو گوں تمبورگءَآرٹیمس انشپیگوں کمانءَ وتیماهءِ گولائیءَ وارت پِرتَرکُیمُدّتے پیش منچه عطاءِ گچین ل...
22/04/2026

آرٹیمس

بیا اپالو کُجئے تو گوں تمبورگءَ
آرٹیمس انشپی
گوں کمانءَ وتی
ماهءِ گولائیءَ وارت پِرتَرکُی
مُدّتے پیش من
چه عطاءِ گچین لچّهانی لڑءَ
لچّهے ونتگ اَت
ماهءِ زیبائیءِ کِسّهے ونتگ اَت
مُرگ پُروشنت وتی بانزلاں سرگرنت منزلے پیادگءَ
بیا اپالو کُجئے تو گوں تمبورگءَ
گپ ءُ هالاں بکن رنگ ءُ رژنائیءِ
باریں چے گواچن ءُ دُروگ چے بیت کنت
پرک ءُ درکءَ بُگش چم ءُ زیبائیءِ
اِے که مئے ”گوله“ اِنت
ما همے اِشکُته
آدمءَ په وتی پیرکءَ کشّته
کرد ءُ کارءَ شُتگ شادیانی رَگءَ
آزمانءِ دلءَ روت ءُ چانکُر جنت
هر کُجا که بُروت ته وتی هُوریءَ بارت گوں جنگلءَ
باندا اِے وانِکءَ
جِنّ ءُ جاتو چننت ءُ کوارءَ کننت
دُور ماں کلکشانیں ُپچےءِ تلءَ
اِے که مئے دُتتک اِنت
اِے که مئے لاڑُک اِنت
بُرکهےءَ مبیت ماں ”بلیک هولے“ءَ
گِلّه چے پِر ببیت اِشک تئی هاجتاں تو که بے گِله ئے
وائے دل په ترا
گپ ءُ گالی نه اَنت کبگ گیشیں گَلءَ
په تئی ریٹائیءَ وائے دیوانگی
آرٹیمس انشپی
ماهءِ گولائیءَ وارت پِرتَرکُی
انچو زمبادےءَ درنجُکیں رهگوزے
سیمسرءَ داں بُروت چیزےءِ پولگءَ
لیاریءِ کِشکےءَ
انچو ”سیون سی“ءِ ژند ءُ ژولیں بسءَ
لِنچکیں مردمے
گُلشنءَ داں بُروت دمکےءِ گولگءَ
انچو گوں پرپٹءَ گُژنگیں چرسی یے
زامُرانءَ درئیت گوادرءَ داں بُروت هلوهءِ زُورگءَ
بیا اپالو کُجئے تو گوں تمبورگءَ
گوں سُروزءَ وتی
آرٹیمس انشپی
ماهءِ گولائیءَ وارت پِرتَرکُی

برے برے (دومی بهر) برے اے دل گُشیت که نوبتانی بی بیءِ تلائیں هارءَ دُز ءُ انچو رَهرواجی وش تواریں مُرگےءِ گورءَ بدے چو ش...
20/04/2026

برے برے
(دومی بهر)

برے اے دل گُشیت
که نوبتانی بی بیءِ
تلائیں هارءَ دُز ءُ انچو رَهرواجی وش تواریں مُرگےءِ گورءَ بدے
چو شیشگےءَ آگهیءَ شود ءُ واب مان کن
جهانءِ وادهاں شموش ءُ گوں وتءَ زبان کن
برو گوں داں همائودا که گوات روت گوں وشبوءَ
بهارگاهءِ برهنگیں مُلوریءَ بُزور سنجءِ چادرے سرا بدے
په هورکءُ هالی ئیں ودار
ترکاں گِپت کئے بکنت ریگزاریں اُمرےءِ
برے برے اِے دل گُشیت
که گون کپ گوں زندگیءِ بےمسالیں جادُو ءَ
کسانیءَ مزن بکن ءُ مشکلءَ بُزور گیشیں مشکلے سرا بدے
برے برے اے دل گشیت
که بےتواریءَ پدا په شور ءُ شارےءَ ببر
بساز نوکیں چیدگےءُ زندگیں بُتے بکن
اِے دیدگانی مُهرگاں رجین نوکیں رنگےءَ گمانءَ سورتے بکن
دریگءَ بوج باتنءِ
اِے بےنوائیں بندهءَ گوں سرجمیں گنوکیاں
هُدائی هاجتے بکن
برے برے که نشتگاں ته جُست دیمءَ پاد کیت
بجیڑئے سر اوں پِر مبیت سوال انچیں یاد کیت
برے برے ابیتکیءَ وتارا پُرساں اهوتءَ
که ماه گندے کبگےءِ نبوتگیں مُهبتءَ زمینءَ بئیت ءُ سر ببیت
ته جنگلءِ چے هال بیت
برے برے گُمان بیت کتاب مارا ردّ دینت ءُ آکِلی گنوکی یے
برے برے سرءِ تها نسگّیں بےتواریاں اناگهءَ دمال بیت
برے برے اِے دل گُشیت
که ازم اشِکءِ جامگءَ گورءَ بکنت کمال بیت
برے برے اِے دل گُشیت
که مرگءُ زندگی دُوئیناں پُروشءُ چشمکے بکن
پدا وتءَ بچار گوں نباشدیں زمانگءَ
دو شیشگانی اندرءَ
چو بے کراریں روهےءَ جهانءِ شاهگانیءَ
کُجام چَهرگءَ جنئے
گوں ملکموتءِ رند پداں روان بئے چو ساهگے
اگاں که نه
زرئے گوں ساه کشّگءَ حیاتءِ شهرگءَ جنئے
برے برے اِے دل گُشیت
که گوشت ءُ ناکُنءَ بسند چو هواریں لبزےءَ چه مانهاں جتا بکن
بچار باریں چون بیت
گسر کپنت کجا گُمان بےگُمانیں پُژدرءَ
کُجام هیال بے هیالی داں کدینءَ گون بیت
بچار باریں چون بیت
برے برے اِے دل گُشیت
که الّه دین ءِ وسریں چراگءَ پروش گهتر اِنت
ادا وَ چونها شپءَ، ءُ روچءَ پرک ءُ درک نیست
اِے کینوس کسان ءُ اکس گندگءَ مزنتر اِنت
برے برے اے دل گُشیت
چو کوٹی یےءَ آزمانءِ پردهءَ بدل بکن
که وهدءِ زنگی ئیں گڑی نوں ترّگءِ وڈا نه اِنت
بدار دُرائیں پرّگاں
که بےمُرادیں آدمءَ گوں بےمڑائیں شادیءَ
نه جنگلے ترهینت کنت، نه شهرےءَ کرار کئیت
برے برے اِے دل گُشیت
بگیشیں دشتءُ دجلهءَ
توامیں شَرءُ گندگاں دو نیمگءَ بکن بچار
اِے آبی ئیں پلانِٹءَ چو کُوٹگّےءَ تل بکن
تلے په آدمءَ ببر تلے رسین شادیءَ
توامیں رنگاں ابرمءِ کلُونڈ ءُ کِکّلی بکن
برے برے اِے دل گُشیت
دلءِ تبءَ اچانکءُ اناگهءَ بدل بکن
چے ”گوله“ءَ درا بُرو ءُ جاگهءَ بدل بکن
شُهاز نوکیں منزلے
بِجل همودا گوں وتءَ همودا زندگی بکن
نِدارگاں چه در بکپ نِدارگانی چارگءَ
دو مِسرهءِ کتارگءَ
دلءَ کروج دیدگاں شموش ءُ شائری بکن
همےکه تُن سرّچیت ابیتکیءَ چو برپےءَ شرابءِ تاسءَ دَور دئے
گوں سرجمیں مُلوریاں بُنوش ءُ شائری بکن

ناچ مئے ابرم اِنت (عارف بلوچءِ پله مرزیءَ)مُور مُرگے تها مان هر مردمءِ ناچ مئے اَبرم اِنتتئی وس ءُ واک چے، تئی کِساسءَ ن...
12/04/2026

ناچ مئے ابرم اِنت

(عارف بلوچءِ پله مرزیءَ)

مُور مُرگے تها مان هر مردمءِ
ناچ مئے اَبرم اِنت
تئی وس ءُ واک چے، تئی کِساسءَ نه اِنت
دل وتی زیمرءِ پژدرءَ بِنکو یے
بِلّے دامءَ کپیت
ابرمءَ گوں دگے جنگ ءُ داوا نبیت
ناچ مئے اَبرم اِنت
ژانگ پادءَ کُتگ ژامبلینتگ وتءَ اِے جُڑاں بستگیں
گوات کشّیت بچار گونزلی چنڈ کنت
اِے مَڑاهءَ کُجام مهشرءَ داں برئے
اچ وتءَ دمبرئے
اِے وڈا کشّگءَ هر نپس کیامتے
اِیر کپ جاگهے زندگی سُهبتے
مکتبیاں بچار
وانگءِ ساهتءَ نندگی جاگهءَ لُڈّگءَ اَنت تها
تو اوں چنڈین گوں بے نوائیں سرءَ
په وتی هاترءَ
نوں که گوں کپتگئے
کئیپ دروازگے په تو پچ بوتگیں، تو تها اتکگئے انگه توکءَ نئے
حیف تئی زانگءَ
اِے شرپمندی ءَ چے کنئے وسّریں
تو نزانئے وتءَ
تو اگاں اِیسُپ ئے تئی کَتّب لانٹی یے
هچ نجومی نکنت مٹّ تئی کِسمتءَ
شوم !
تئی گم ببیت یا که وشی ببیت
چه تئی کدّءَ کدی گیش ءُ کمتِر نبیت
بس تئی سر پِر نبیت

اے کمرزانیءَ چے کنے بستگیں
اِے مَڑاهءَ کُجام مهشرءَ داں برئے
اچ وتءَ دمبرئے
ناچ مئے ابرم اِنت
په تو سُرنائی ئیں وهدءَ ارمان بیت
ڈُهلی ئیں دل تها مان رُسّان بیت
اِے مُلوری په تئی کندگاں گران بیت
سُهبتے زندگی
هر کُجا ٹیمبُکءِ برمش گوشاں کپیت
جنگلے گیر کیت اندرءِ شادیءَ
ائیکُکو جنت گوں کائناتءِ گماں
هِژم گیپت پاد کئیت کِکلی چنڈ کنت
ما دُرها گواتی اِیں
مُور مُرگے تها مان هر مردمءِ
گوات کشیت بچار گونزلی چنڈ کنت
چو دلاپ ئے چیا، جند سیّه دِل کُته
چو سریچکءَ چیا انچو میلانک بئے مئپلانی تها
سُهبتے زندگی
اِیر کپ جاگهے نوں که گوں کپتگئے
پادا اِے چادرءَ چنڈ ءُ لانکءَ ببند
په وتی هاترءَ
تو اوں چنڈین گوں بے نوائیں سرءَ
چو گِروکءَ بجنت بِلّے دامن تئی
گوات کشیت بچار گونزلی چنڈ کنت
چو که سنگءِ بُتءَ
تو نه جُنزئے وتی جاگهءَ رِزّهے
زندگی سُهبتے
بیا گوں زیبائیءِ گوپتگیں سئوتےءَ ایر کپ جاگهے

جمبرانی کُلوه مُرگےءَ گون اتاں
تو کدی جیڑتگ سیر پرچے نبنت درچک چو لَرزُکءَ تاک لرزینگءَ
سنج اوں جُتک جنت پیڑگاهءَ وتی
رنگ پرّتکگیں وت بشارت دینت
روچ جادوگرے
چار موسم همےپئیمءَ کیت ءُ گوزیت
چار سرگوپ گشے بئیت سُور ءِ سرا
چار سنگت گشے که دوچاپی بکنت شادئی پتّرے
ناچ مئے اَبرم اِنت
تو کدی دیستگ اَنت آسک گوں ترّدگاں
چم تئی کپتگ اَنت کبگےءِ لُڈگاں
تو کدی دیستگ اَنت هِرّ ترانپولیءَ
تو کدی اِشکُتگ که زمین چه ازل ترّگءَ اِنت وتی مرکزءِ گولیءَ
شِنگ ءُ شانگ اِنت چتور کلکشانءَ بچار
گوں گوریگءِ وتی سِستگیں مُهرگاں
چنچو استال ماں آزمانءِ دلءَ
سِٹّکُی جنت شپءِ تلّو ءَ سرپدئے
چه وتی جاگهءَ تو نجُنزئے چیا
بس چو سنگءِ بُتءَ
گوں اناءَ وتی پرچتگ چیدگئے
ناچ مئے ابرم اِنت
اُمر تمبورگے فیزُکءَ جُست کن
داں سُرءَ اِنت ترا ، چه تئی اندرءَ گوں وتءَ ساز کنت
تو کدی جیڑتگ وهد اِے ساهتاں باندا مِگراز کنت
اِے سروزءَ بُزور بےتواری وتءَ بِلّے گویاک کنت
بِلّے دیوانگی دامنءَ چاک کنت
وهد که پِرگوزیت تئی شکر آپ بنت دل وتی جاتگیں آرگاں کم کنت
کئے وتءَ په وتءَ اینچو بےرحم کنت
مور مُرگے تها مان هر مردمءِ
هر کُجا ٹیمبُکءِ برمش گوشاں کپیت
تو اوں چنڈین گوں بےنوائیں سرءَ
په وتی هاترءَ
کمے پیشانیءِ کِرچکاں کمتر بکن
نوں که گوں کپتگئے دلکشیں بیگهے
جور ءُ کُچّل مبو
گوں وتی وشّیءَ بینگے بو وتءَ کئیل کن کدّهے
اِیر کپ جاگهے
زندگی سُهبتے ، اِیر کپ جاگهے..!

Adresse

Göttingen

Webseite

Benachrichtigungen

Lassen Sie sich von uns eine E-Mail senden und seien Sie der erste der Neuigkeiten und Aktionen von Ali Ján Dád erfährt. Ihre E-Mail-Adresse wird nicht für andere Zwecke verwendet und Sie können sich jederzeit abmelden.

Verknüpfungen

Teilen

Kategorie