20/01/2024
"ЗӨӨЛӨНӨӨР ХАШХИРСАН НЬ"
"Баавгай болохсон" УСК-ны сэтгэгдэл
1. ДААХ АЧАА
Киноны үйл явдал энэ цаг үед өрнөнө. Өлзийбат бол айлын том хүү. Аавыг нь энэ харгис хатуу, хүйтэн, саарал хот залгичихажээ хөөрхий. Хагас өнчин. 3 дүү, ээжийнхээ хамт амьдрах хүүд үүрэх, даах ачаа дэндүү их. Түүныг хүүхэд гэж томьёолох зүйл арван жилийн форм, физикийн хичээл байхаас өөр зүйл түүнд даанч үгүй. Хүүхдээрээ том хүн болсон нэгэн. Кино хараалын үгээр эхлэхээс авахуулаад асар их хүнд хэллэг орсон нь орчин, амьдралын барааныг хүмүүст шууд наах шиг. Хэлсэн үгс нь муухай байгаа ч зөвшөөрөгдөх хэм хэмжээндээ хоолонд хийсэн давс шиг таарч. Зарим кинонд эдгээр үгс наалддаггүй бол харин энэ кинонд наалдах шиг наалдлаа. Өлзийбатыг хүүхэд нас хаана хэдэн настайд нь дуусав даа гэх бодол төрнө. Магадгүй их хотын эрээн саарал өдрүүд дотор ороод замхарсан бололтой.
2. ДААХГҮЙ АЧАА
Өлзийбат шантарсангүй харин ээж шантарлаа. Ээжийн хувьд энэ хот даахааргүй том ачаа нь байжээ. Өнчин хэдэн хүүхдүүд нь нуруун дээр нь суугаад аалж шиг нуруунаас нь мэрж идэх мэт түүнд санагдсан юм шиг. Арга барьсан түүний архитай нөхцсөн өдрүүд нь үр хүүхэд нь үргэлж хэрүүл уруул л авчирна. Ээжийн дүр хэтэрхий арчаагүй санагдах. Түүнийг өмхий нойл угаах хүсэлгүй байгаа нь, үр хүүхэдээ бодолгүй нүүрс биш архи хэрэглэж байгаа нь цухалдуулмаар. Хүүхдүүдээсээ ч ухаан дутмаг байгаа нь харагдана. Согтуу гэрт ирдэг хэсэг бол түүнийг даахгүй ачаандаа дарагдсан хүний үг сонсогдоно. Гэвч эцэг, эх байх гэдэг шантарлаа гэж шал угаахаа больж болохгүй л хүнд хариуцлага санагдана.
3. ДҮРҮҮДЫН ДҮР
Энэ кинонд сул эсвэл хэрэггүй мэт санагдах дүр байхгүй нь хамгийн их таалагдав. Алтан хөрш, Ардын багш, сургуулиа хаясан хүү, хороо хорныхон, шударга нагац эгч, ахынхаа ачааг дэмнэлцэх дүү нар гээд маш сайн бодож, олон жилийг бүтээлдээ зориулсан нь харагдана. Хөрш өвөө бол хамгийн түшигтэй дүр шиг. Хөөрхий ядарсан хүүхдүүдэд туслаж байгаа бус хүнд нь мөн чанарт нь туслаж байгаа нь таалагдав. Удаагүй үнэгүй будаа тараана гэж хорооны эгч хүртэл бүгд өөрийн гэсэн даалгавартай ирээд даалгавараа 100% биелүүлсэн санагдана.
4. ГОЙД ҮЗЭГДЭЛ ҮЗЭГДЭЛҮҮД
Энэ кинод муу болчихлоо доо гэсэн хэдэн сцен байсан ч гойд сайн сценүүд дэндүү олон байсан нь мууг бараг мартуулчих шиг. НЭГТ: Ээждээ уурлаад хаалга саваад гарч явах Өлзийбат өвөөгөөс тамхи авч татаад найзындаа очдог хэсэг. Гайхалтай кадрын хэлэмжтэй сайн үзэгдэл. Найзындаа бүжиглэдэг дууны үг хүртэл үзэгчидэд нэгэн зүйлийг хэлээд байх шиг. ХОЁРТ: Нагацынхаа ирээд ширээнд дээр сонин шиддэг хэсэг. Бас л биднийг доромжилж чадаж байгаагүй гэсэн тэр тоглолт нь гойд санагдав. ГУРАВТ: Оршуулга. Зарим зүйлыг товч бичихгүй бол залхаах шинжтэй. Тэнд Өлзийбатын өвөөд хэлдэг текст гол зурах шиг санагдсан. Ер нь маш сайн олон хэсэгтэй.
5. ТОВЧХОН ДҮГНЭХЭД
Би өөрөөсөө асуудаг "Ямар киног сайн кино болдог юм ?" гэдэг бодлынхоо хариултанд нэг алхам дөхөх шиг надад санагдлаа. Үнэн кино. Худлаа зүйлгүй, хэт уран сайхангүй байгаа нь өөрөө том уран сайхан ч юм шиг. Амьдралд ялагдах гээд байх шиг санагдаж байгаа арван жилийн хүүхдийн тухай кино боловч ардуураа олон зүйлийг тээж яваа юм шиг. Өлзийбатад тоглосон хүүд хамгийн том талархал. Утаа бол энд хамгийн том шалтгаан нь гэж би харсангүй. Бүгд хичээх ёстой гэдгийг л харлаа. Сайн бүтээл болжээ. Зарим хүмүүс муу зүйлсийг нь ярих л байх та нарт тэр зайг нь үлдээе. Эцэст нь мөнгө биш жинхэн бүтээл хардаг хүнээс ийм л кино гардаг юм.....МӨНГӨНД МӨН ЧАНАРАА ХУДАЛДСАН, ХУДАЛЧ уран бүтээлч АХ ЭГЧ НАРАА.....
If Only I Could Hibernate \ Баавгай Болохсон
#БААВГАЙБОЛОХСОН
