East to YeeHaw

12/10/2025

尋日上堂終於成功post trot足足一整個圈。

為咗做好呢個動作，我開始咗人生第一次做占，專練腳同core。上堂主動問老師同其他同學feedback；落堂就loop啲KOL嘅馬術影片，甚至同我IG嘅followers傾貼士。

練習初期，我因為不能有效同正確咁使用韁繩控制速度，幾次差啲失平衡墮馬，真係會驚同frus到喊。
但係：驚係唔會令隻馬做得更好。
人馬心意互通嘅前提，永遠係「先做好自己」，而唔係怪隻馬frus到自己。

所以我尋日上堂之前，我靜落嚟問自己：
今日想做到乜？我要點先做到？
調整好心態，亦到用翻最近睇馬匹治療師嘅reels學到嘅bonding技巧，去同Boa溝通，去克服對佢、對自己個份唔夠信任。

結果係：我地尋日做到了。

雖然post trot係一個basic，但係對我嚟講，係一個horsemanship嘅milestone，同時包含咗做人嘅lesson。
要成為一個cowgirl，當然要夠倔、夠硬，但係亦都要夠soft去聽、去學、去信。

馬真係人嘅一面鏡。

12/02/2025

今日喺到諗：桃花源係唔係真係咁好？有良田、美池、桑竹，但係可能冇好西食，成條村就係得咁多人，唔會有新朋友加入，所以可能好悶、冇乜活動，可能冬天好凍，我地不得而知。

不過我諗入面嘅人為嘅係避秦，避到秦嘅話天氣有幾凍、人煙有幾稀少、娛樂有幾寡、食物有幾單調，佢地都唔會介意嘅。有時候，呢啲因素就算好唔吸引都好，都好過秦嘅殘暴嘅；好在其實都有得耕田，而且「怡然自樂」。唔好問人點解到漢朝天下太平都唔離開桃花源，都係個句啦 — 最緊要避秦，下話？

上星期二冇羽絨（件嘢仲喺屋企冇著過）著住件普通外套毛毛衫加條老牛就直接喺户外月黑風高-11度拖馬。馬大哥仲要走佬，搞到我喺雪地追住佢跑，搞咗大半個鐘。禦寒能力每年提高，都唔知係壯健咗定係再捱得苦咗。其實都冇所謂，得閒玩馬耕田，怡然自樂。

11/28/2025

我唔想俾人覺得我tone-deaf、唔夠sensitive；但係又不吐不快：

大埔火災，睇住香港人再次自發性、冇大台咁企出嚟，
略盡綿力、就算萍水相逢都係幫得幾多就幾多，呢份獅子山精神真係再次令我又感動又自豪。

我身在外地，睇咗好耐好耐 live，喊咗好多好多次。
甚至天真咁諗：「好想插翼飛返香港，同大家共呢個患難。」

原來我以為自己放低咗嘅嘢，
其實一直都收埋喺心裏面，只係我習慣咗唔講。
但係身為一個真香港人，
呢份集體肌肉記憶從來冇消退過——
唔會因為我喺萬里之外、唔會因為我搵到更適合自己嘅生活，
就消失不見。

如果覺得攰，就好好休息啦。
願大家平安，未來見。

11/27/2025

唉
It could have all been avoided.

加拿大外交部長阿南德（Anita Anand）和加拿大駐港澳總領事館對受大埔火災影響的人致以最深切的慰問。

Foreign Affairs Minister of Canada Anita Anand and the Consulate General of Canada to Hong Kong and Macao express our heartfelt condolences to those affected by the tragic fire in Tai Po.

11/24/2025

尋日星期日去咗 Lone Star Tack & Feed，終於買多咗上堂用嘅道具，同埋最重要嘅 —— 俾 Boa 嘅零食 🐴✨

呢排開始入冬，上堂前要喺戶外帶 Boa 入室內場；落堂之後又要帶佢返去 pasture。4 點半已經天黑，基本上係完全睇唔到路；加埋嚟緊 -20°C 以下嘅氣溫，接下來去到5月為止嘅星期二課堂將會係對我禦寒能力嘅一大考驗。

所以今次一次過買咗：
🔹 頭燈 — 冬夜必備
🔹 工作手套 — 唔戴真係會凍到手指失去知覺、連閘都開唔到
🔹 刷同 hoof pick — 基本清潔 set 俾自己用得順手啲
🔹 仲有兩大包馬零食 + Stud Muffins

至於零食，希望 Boa 食完之後聽聽話話，落堂嗰刻唔會一心只想撻我落地🐴😆

11/21/2025

大家好，我係 Sharon！一個喺香港石屎森林土生土長、原本活得好中環、上IFC 70幾樓開會嘅urban girl。

但！人生極其奇妙。我竟然搬咗去加拿大一個冇乜人識嘅省份。

呢個故事，由一首電視劇片尾曲開始。有一日，我竟然用心聽片尾曲入面嘅歌詞。冇人帶路冇人推薦，純粹聽片尾曲聽到入心。講真，以前嘅我係 最討厭 country music 嗰種人——覺得唔關我事、覺得永遠唔會聽。我發掘落去之後，竟然莫名其妙咁愛上咗 country music。就係嗰一刻，country music 打開咗另一扇門。

跟住……就無法回頭。

本來只係聽歌 ➜ 變成儲 boots（而家有 3 對） ➜ 研究牛仔褲（好似有6條了） ➜ 自己一個去rodeo ➜ 日常著 western fashion 出街 ➜ 想耕田 ➜ 意識到自己已經半隻腳踏咗入 redneck 世界

嗰啲節奏令我開始愛上離開城市嘅動作，愛上廣闊嘅大地。

9 個月入面，我自己一個走遍Alberta 嘅小鎮 rodeo、去 Calgary Stampede 做義工、試騎馬、參加農業展。跟住我突然醒起：「喂，成個衣櫃都係西部風，唔可以只係著得似，係咪應該行前一步學吓點做 cowgirl？」

於是報名去學騎馬，仲開咗呢個 page同instagram嘅英文版EasttoYeeHaw（主要使用），記錄我由香港女仔 → 半個 redneck → 準 cowgirl 嘅進化史。

感謝你嚟到呢度，希望呢段奇怪又真摯嘅逆生長人生，會令你覺得世界永遠有第二種生活模式可以揀。