22/06/2026
শ্রী শ্রী রাধাগোবিন্দ মন্দির, জোড়ামন্ডপ, মাধবপুর, কমলগঞ্জ মৌলভীবাজার, সিলেট ( হঙ্করিসিতা-১৭১৭ খ্রিষ্টাব্দ)
ইমার লাম বেলিয়া আহানির পরে হঙকরিসি মন্দিরগো এগো। আমার মন্দির মান্ডপ এতা হঙ্করিসিতা ১৭১৭ খ্রিষ্টাব্দত। মনিপুরর লাম বেলিয়া আহানির সময় আমার দৌ এতাউ লগে করিয়া আনিয়া আহিসিতা, বেলিয়া আহিলাঙ সময় অহত সিলেট(শ্রীহট্ত, জেহান শ্রী চৈতন্য মহাপ্রভুর জন্মস্থানহান) লাম এহেনউ ভারতবর্ষর লাম হান ইয়া আসিলহান। আপা-বপা আসির মতে মনিপুর লামহান আকমুত বেলিয়া আহিসিহান নাবে ধাপে ধাপে দাপায় দাপায় আহিয়া অঙিসিগাহান বিভিন্ন অঞ্চল। ১৫০০-১৬০০ খ্রিষ্টাব্দর হাদিঅগর বুকগোতত্ত বেলিয়া আহানি অকরিসিহান রাজার আমলে। মনিপুর হান আকমু দিমাউ নাবে বহুবার বিভিন্ন সময়ে হামলা ইসেহান, বিভিন্ন জাতি সম্প্রদায়র উপদ্রপে ধর্মপালন করে নুয়ারিয়া জাতহান বাচানির কাজে ইমার লাম বেলিয়া আহিসিহান। বারো আমার পূর্বপুরুষ যদি সময় অহত বেলিয়া নাহিতা অতাইলে আমি অউ লেইমাঙ ইয়া বরলাঙগা অইস যেসারে লকতাকগোর পারগোত আসি অতা লেইমাঙ ইলা। আমার এতা ইতিহাস নির্দিষ্ট করিয়া লেখিয়া না থুয়াসি, আর মনিপুর আমলর ইতিহাস পুরিয়া কিত্তাউ নেই, আপা-বপা আসির থতাতই আগোর থতাত্ত আগোই হুনিসি অতা আমি অউ হুনোরাঙ। সময় অহত না লেখিসি ঠিক আসে কিন্তু আমারতা এপাগা লেখানি থকিসেতা কিদিয়া বুল্লে এপাগা যেহান অর অহনই আগামী দিনর ইতিহাসহান। আমার মান্ডপ- মন্দির এতাই আহিসি সনহান ধরিয়া থুয়াসে, হুদ্দা এরে রাধাগোবিন্দ মান্ডপ এগো নাবে আমার জোড়ামণ্ডপর তিনগি মান্ডপ হঙকরিসিতা ১৭১৭ খ্রিস্টাব্দে বারো মন্দিরর দলিলাদি আসে। আমার দৌ এতা আমি কতিহান বাহানা পাসিতা লাম বেলিয়া আহিতে নিজর ঠইগোর লগে কল্করিয়া দৌগি অউ লগে করিয়া আনিয়া আহিসিতা, মন্দিরর এইগা গিরক শ্রীমান কৃষ্ণকান্ত চ্যাটার্জীর শ্রীমুখেত হুনেদিক বিস্তারিত। মনিপুর লামে রাজারগাঙ বারো মাদইগাঙ কোন কোন লকেইত আসিলা বিস্তারিত হারপিক-
খুমেল মাটি-
বিষ্ণুপ্রিয়া মণিপুরী সমাজে বহুল প্রচলিত বরণ ডাকানির এলাহাত দৌরাজা অর্থাৎ দেবরাজ ইন্দ্ররে প্রার্থনা করিয়া বেয়াপায় এলাহান দিতারাতা-
সরালেলতে রাজারো
লেইপাক পুঙৈ করল
বরণ দিয়াদে দৌরাজা।
সরালেলতে রাজারো
খুমেলর মাটি হুকেইল
বরণ দিয়াদে দৌরাজা।। ইত্যাদি।
এলা এহাত উল্লেখ করিসি খুমেল-মাটি বুলতে সাতহান সরানো বেষ্টিত ইয়া আসে ফাম অহানরে বুজার। সরা অহানি ইলতায় (১) খাইখং, (২) লাইখং, (৩) মরাংখং, (৪) ইসুখং (৫) ফিসুখং (৬) নৌতুখং, (৭) নুজেংখং। এরে সাতগি সরা বা খঙে বেড়িয়া থসে হমবুক এহান ইলতায় খুমেল-মাটি। মহাভারতে বর্ণিত মহারাজা বভ্রুবাহনে পাতালে গিয়াসিলগা সুরুং ওগোউ এহাত আসেহান।
প্রাচীন নাঙ এতার বর্তমান নাঙহানি নিল্করিয়া এপাগা ইসেতা-
প্রাচীন নাঙ - এপাগার নাঙ
১। খাইখং - ঙাইখং।
২। লাইখং - তৌবুল।
৩। মরাংখং - খংজম।
৪। ইসুখং - নাচৌ।
৫। ফিসুখং - থিনংগৈ।
৬। নৌতুখং - কনুংখং।
৭) নুজেংখং - নিংথৌখং।
রাজ্য শাসনে সুবিধারকা পিসেদে খুমেল মাটি এহানরে চারিহান লৈকাই বা ভাগে ভাগ করিসিলা। ঐ সময় লৈকাই বুলতে অঞ্চল আহানরে বুঝিলো। লকেই চাইরোহানি ইলতায় (১) সেকতা, (২) লমাংদং, (৩) লুয়াং, (৪) খংচৈশোক।
লোকতাক হানর উত্তরেদে মৈতৈ রাজায় পালসিলা দক্ষিণ বারাদে মৈরাঙে পালসিলা। লোকতাকর পূর্ব, পশ্চিম বার উত্তরর খানি অংশল খুমেলে পালসিলা ফাম ওহান ইলতায় খুমেল-মাটি। খেন্তাম অহন লুয়াং, আঙোম বার মঙাং বা মাঙাল রাজ্য নমিল সময়হান। খুমোল পুরাণে পণ্ডিত নবখেন্দ্র সিংহ গিরকে মাতেসে যে, “শ্রীযুত কর্তামহারাজার হাকতাকে রাজার প্রজা অয়া রাজার বি ক্ষেতি করলা অতাই নিংখৌনাই বা রাজারগাঙ বার রাণীর প্রজা ইয়া বি ক্ষেতি করলা অতারে লৈমানায় বা মাদইগাঙ বুলিয়া পরিচিত ইলা। নিংথৌনায়ে লৈমানায়ে বি খেইকরলা। মৈরাঙে বার নিংখৌনায়ে লোকতাক পেইলা। লৈমানায়ে ইপোক পেইলা। অহনর পিসেদে দেশহান নুঙেই ইয়া পালইলা। সময় অহান শামুরোইবা রাজার হাকতাকহান।
এহানোউ হারপা পাররাঙ যে, নিংথৌখং, নাচৌ এতা লোকতাকর পশ্চিমেদে আসেতা ইয়া অহত বসবাস করলা মানু অতারে রাজারগাঙ বা নিংখৌনাই বুললা। খঙাবক, হৈরোক, ককচিং অঞ্চল লোকতাকর মুঙেদে আসেতা। অহানে এতাত বসবাস করিয়া আসিলা মানু অতারে লৈমানাই বা মাদইগাঙ বুললা। হাব্বি ইতিহাসে নাপেইলেই লামর বর্ণনা এতা পারাঙ। রাজারগাঙ বারো মাদইগাঙ দিতা নাবে আকতা হে ইমে, অঞ্চল ভেদে ভাষাহান অতারতে তঙাল ইসে অহন ইমে। দিয়তায় তিলোয়া বিষ্ণুপ্রিয়া মনিপুরী। জয় ইমা বিষ্ণুপ্রিয়া মণিপুরী।
#বিষ্ণুপ্রিয়া #মনিপুরী
