08/09/2026
Ավարտվեց Գրքի երևանյան միջազգային փառատոնը, որը Երևանի սրտում մեկտեղել էր հազարավոր ընթերցողների, գրքասերների և գրողների։
Փառատոնին իր ուրույն մասնակցությունն ունեցավ ՀԿՄ Ս․ Շահնազարյանի անվան մշակույթի տունը։
❓ Ի՞նչ էր անում մեր թիմն այս 3 օրերին․
✅ Ներկայացնում էր ՀԿՄ հրատարակչության պատմությունը։
⠁ Պատմում էր Բրայլյան գրատպության մասին՝ սկսած Լուի Բրայլի գյուտից, մինչև Նիկողայոս Տիգրանյանի կողմից այդ գրատպության հարմարեցումը մեսրոպյան այբուբենին։
⠃ Մարդկանց հնարավորություն էր տալիս աչքերը փակ շոշափել Բրայլի համակարգով գրված տեքստերը և հայտնվել կետերի այդ «մոգական» աշխարհում։
⠛ Հնարավորություն էր տալիս մարդկանց ձեռք բերել անհատական էջանիշեր, որոնց վրա Բրայլի համակարգով գրվում էր նրանց ցանկացած բանը՝ անուններից սկսած, մինչև սիրելի արտահայտություններ՝ հայերենով, ռուսերենով, անգլերենով և նույնիսկ գրաբարով։
✅ Եվ որ ամենակարևորն է՝ ապահովում էր հումորային բարձր տրամադրություն, որը կոտրում էր հազարավոր կարծրատիպեր հաշմանդամության և կուրության մասին․․․
🎙️ Սեպտեմբերի 4-ին ՀԿՄ Ս․ Շահնազարյանի անվան մշակույթի տան տնօրեն Սիփան Ասատրյանը Հայաստանի ազգային պատկերասրահում, որպես բանախոս, մասնակցեց փառատոնի շրջանակում կազմակերպված «Գրականության հասանելիությունը» թեմայով քննարկմանը՝ անդրադառնալով ոլորտում առկա մարտահրավերներին, խոչընդոտներին և հնարավոր լուծումներին:
📖 ⠁⠃⠛ Այս երեք օրերին հազարավոր մարդիկ տեղեկացան բրայլյան գրատպությամբ մեր գրավոր ժառանգության, ՀԿՄ, ՀԿՄ հրատարակչության և ՀԿՄ Ս․ Շահնազարյանի անվան մշակույթի տան գործունեության մասին։
Շնորհակալություն ենք հայտնում Գրքի երևանյան փառատոնի կազմակերպիչներին՝ հրավերի և մասնակցության հնարավորության համար։
