21/06/2025
#هواحالات
☁️ د سختو بارانونو او سېلابونو خبرداری ـ افغان حکومت خبرداری ورکړ
د افغان حکومت د ترانسپورت او هوايي چلند ریاست د شنبې او یکشنبې (۳۱ جوزا او ۱ سرطان) لپاره د هېواد په شپږو ولایتونو کې د سختو بارانونو او سېلابونو د احتمال خبرداری ورکړی دی.
په خپره شوې خبرپاڼه کې ویل شوي چې دا خطر په لاندې ولایتونو کې شته: نورستان، کونړ، لغمان، ننګرهار، پکتيا او خوست.
د هوا پېژندنې د معلوماتو له مخې، د باران اندازه به په بېلابېلو سیمو کې له ۱۰ تر ۳۰ میلیمتره پورې وي.
همداراز، یاد ریاست خبرداری ورکړی چې د هېواد په ختیځو، جنوبي، لوېديځو او مرکزي ولایتونو کې به توند بادونه له دوړو سره مل وي. د بادونو سرعت په ځینو سیمو کې له ۵۰ تر ۸۵ کیلومتره په ساعت اټکل شوی دی.
د افغان حکومت اړوند ادارو له خلکو غوښتي چې د احتمالي سېلابونو او خطرناک موسم په وړاندې لازم احتیاطي تدابیر ونیسي، څو د ځاني او مالي زیانونو مخه ونیول شي.
