19/06/2026
Kung nakagawa ka ng kasalanan, huwag mong ituloy-tuloy.
May nagawa ka mang pagkakamali noong nakaraan, huwag mong hatulan ang iyong sarili. Pagsisihan mo ang mga nagawang kasalanan (1 Juan 1:8–9). Dumalo kang muli sa mga pagkakatipon (Hebreo 10:25) at kausapin ang KNP o manggagawa sa lokal.
Ang pagpapatawad ng Dios ay napakalaki, lalo na sa mga may takot sa Kanya. Kung ang nagawa mong kasalanan ay hindi mo sinasadya—bunga ng kahinaan ng laman, natukso, o nakalimot—magbalik-loob ka, kapatid. May awa ang Dios. Kung nadapa ka man, makakabangon kang muli.
“Sapagkat ang matuwid ay nabubuwal na makapito at bumabangon uli, ngunit ang masama ay nabubuwal sa kasakunaan.”
(Kawikaan 24:16)
Makakabangon kang muli. Pagpilitan mo; may makapagpapabangon sa iyo. Ipakita mo lamang na mayroon kang pagnanais. Mayroong maaaring magbangon sa iyo.
“Sino kang humahatol sa alila ng iba? Sa kaniyang sariling panginoon ay natatayo siya o nabubuwal. Oo, patatayuin siya, sapagkat makapangyarihan ang Panginoon na siya’y maitayo.”
(Roma 14:4)
Magtiwala ka sa Dios na makakabangon kang muli, kung ipakikita mo ang iyong pagnanais na makapagpatuloy sa paglilingkod. Mararamdaman mo naman kung itinakwil ka na o hindi pa. Kung may nararamdaman ka sa puso mong nais mong makapaglingkod, may Espiritu Santo na nag-uudyok sa iyo. Huwag mo itong balewalain.
Dati ka namang sumusunod. Huwag mong iwan ang iyong unang pag-ibig.
Hindi sapat ang kikitain mo, ang kayamanan, o kahit makamtan mo ang buong sanlibutan kung mapapahamak naman ang iyong kaluluwa (Marcos 8:36). Sandali lamang ang buhay sa mundo. Alin ang pipiliin mo: kaunting ginhawa ngayon, tapos ay parusang walang hanggan, o hirap ngayon ngunit ginhawa naman sa darating?
• Ang kaluluwa natin ay iisa lamang.
• Ang pag-asa at buhay ay huwag nating sayangin.
May magpapahina ng loob mo; huwag mo silang intindihin. Lakasan mo ang iyong loob. Manalangin ka sa Dios at magsisi sa mga nagawang kasalanan. Malaki ang Kanyang pagpapatawad.
- Ingkong 🤍
